ජනප්‍රිය ජීව විද්‍යා ගුරුවරයෙකු වන තිස්ස ජනනායක මහතා විසින් සිදු කළ එක් ප්‍රකාශයක් පසුගිය දින කිහිපය පුරා සමාජ මාධ්‍ය තුළ දැඩි කතාබහකට ලක්විය. ඊට හේතු වූයේ, 'බුදුන්ගේ රස්තියාදුව' නමැති ආන්දෝලනාත්මක කෘතිය රචනා කරන ලද්දේ කේ.කේ.
සමන් කුමාර විසින් බවත්, ඔහු නිරාගමිකයෙකු බවත් පවසමින් ජනනායක මහතා සිදු කළ වීඩියෝවක් සමාජ මාධ්‍ය ඔස්සේ සංසරණය වීම ය. එහෙත් සැබෑ කරුණ නම්, එම කෘතියේ කතුවරයා කේ.කේ. සමන් කුමාර නොව, කේ.කේ. ශ්‍රීනාත් නමැත්තා වීම ය. මෙම මූලික කරුණ වරදවා දැක්වීමත් සමඟම, ජීව විද්‍යාව හැදෑරීමට එන දරුවන් හමුවේ බොරු තොරතුරු ප්‍රචාරය කරන්නේ යැයි චෝදනාවක් ඔහුට එරෙහිව එල්ල විය.මෙම දැඩි විවේචන හමුවේ පසුගිය 08 වැනිදා සිය ෆේස්බුක් ගිණුමේ සටහනක් තබමින් මෙන්ම යූටියුබ් නාලිකාව ඔස්සේ අදහස් දක්වමින් තිස්ස ජනනායක මහතා අදාළ සිදුවීම පැහැදිලි කළේය. එම ප්‍රකාශය 2026 වසරේ මාර්තු මාසයේ පැවති පන්තියකදී තම අතින් සිදුවූ වැරදීමක් බවත්, කතුවරයා කේ.කේ. ශ්‍රීනාත් බවත් ඔහු එහිදී පිළිගත්තේය. තමන්ට කේ.කේ. සමන් කුමාර මහතා සමඟ පෞද්ගලික ගැටලුවක් නොමැති බවත්, පවතින්නේ ඔහුගේ මතවාදය සම්බන්ධ ගැටලුවක් පමණක් බවත් කී ඔහු, සිය ප්‍රකාශයෙන් සමන් කුමාර මහතාට යම් හානියක් හෝ අගතියක් සිදුවූයේ නම් ඒ පිළිබඳව කනගාටුව පළ කරමින් සමාව අයැද සිටියේය. මෙවැනි වැරදි බොහෝ දෙනෙකු අතින් සිදුවිය හැකි බව ද ඔහු වැඩිදුරටත් සඳහන් කළේය.
කිසිදු රැකියාවක් නොමැති දේශපාලකයන් සමඟ සමීපව කටයුතු කරමින් ජීවිකාව පවත්වාගෙන යන බවට හඳුන්වා දෙන පුද්ගලයන් කිහිපදෙනෙකු සම්බන්ධයෙන් තමන්ට ගැටලුවක් පවතින බව ද ජනනායක මහතා සිය ෆේස්බුක් සටහනේ දක්වා තිබිණි. කෙසේ වෙතත්, තම අනුදැනුමකින් හෝ අවසරයකින් තොරව අදාළ වීඩියෝව වෙනත් පාර්ශ්වයක් විසින් සමාජ මාධ්‍යයට මුදාහැර ඇති බවත්, ඊට එරෙහිව අදාළ ආයතනයට ක්‍රියාමාර්ග ගැනීමට බලාපොරොත්තු වන බවත් ඔහු අවධාරණය කළේය.
තිස්ස ජනනායක මහතා මෙවැනි සමාජ මාධ්‍ය ආන්දෝලනයකට මැදිවූ පළමු අවස්ථාව මෙය නොවේ. මීට පෙර එම්.සී.සී. (MCC) ගිවිසුම හරහා රට දෙකඩ වන ආකාරය සිය උපකාරක පන්තියේ දරුවන්ට සිතියම් මඟින් පැහැදිලි කර දීම නිසාවෙන් ද ඔහු සමාජ මාධ්‍ය තුළ දැඩි විවේචනයට ලක්විය. එපමණක් නොව, වෛද්‍ය ෂාෆී ෂිහාබ්දීන්ගේ සිදුවීම පැවති දිනයන්හීදී කාන්තාවන් වඳ කිරීම සම්බන්ධයෙන් ඔහු පළ කළ නිවැරදි නොවන කරුණු හේතුවෙන් ද ඔහු වෙත වැඩි අවධානයක් යොමු විය.
මෙවර සිදුවීමේදී ජනනායක මහතා අතින් වරදවා කියැවුණු කේ.කේ. සමන් කුමාර හෙවත් 'සර්පයා' යනු සිංහල සාහිත්‍යය තුළ සංකීර්ණ දාර්ශනික මානයන් ස්පර්ශ කළ, සාම්ප්‍රදායික නොවන ලේඛකයෙකි. ඔහු 'සර්පයෙකු හා සටන් වැද', 'නගා මැරුඅල' මෙන්ම 'නේරංජනේ ස්නානේ' වැනි කෘති රචනා කර ඇත. සාංදෘෂ්ටිකවාදය, මායා යථාර්ථවාදය හා පශ්චාත් නූතනවාදය වැනි එකිනෙකට වෙනස් බුද්ධිමය ධාරාවන් ඔස්සේ ගමන් කරන ඔහුගේ නිර්මාණ කියවා තේරුම් ගැනීම අභියෝගයකි.
සමාජයේ දැඩි කම්පනයක් ඇති කළ 'බුදුන්ගේ රස්තියාදුව' කෘතිය කේ.කේ. ශ්‍රීනාත්ගේ නිර්මාණයකි. එහි නම දුටු සැණින් බොහෝ දෙනකු තුළ ආගමික විරෝධයක් මතු වුවද, කතුවරයාට අනුව ඉන් අදහස් වන්නේ 'බුදුන්ගේ අභිනිෂ්ක්‍රමණය' යන්නයි; එනම් කිසියම් උතුම් අරමුණක් හෝ සත්‍යයක් සොයා ස්ථාවර තැනක නොරැඳී යන ගමනයි. එහෙත් එහි අන්තර්ගත ඇතැම් වචන මාලා සහ සිද්ධාර්ථ කුමාරයාගේ උපතට අදාළ විග්‍රහයන් බුදුදහමට හා බුද්ධ චරිතයට නිගරුවක් යැයි පවසමින් ආගමික හා දේශපාලන නායකයන් දැඩි විරෝධයක් දැක්වූහ. ඒ හේතුවෙන් කෘතිය ප්‍රකාශයට පත් වූ මුල් වකවානුවේදීම පොලිස් පරීක්ෂණ සහ නීතිමය තහනම්වලට පවා එය ලක් විය.
මෙම සමස්ත සිදුවීමෙන් සහ වාද විවාදයන්ගෙන් මතු කෙරෙන විශාලතම ඛේදවාචකය වන්නේ සමාජය තුළ පවතින කියවීමේ සහ අවබෝධයේ පටු ස්වභාවයයි. බුද්ධත්වය යනු සිද්ධාර්ථ ගෞතමයන් වහන්සේට පමණක් සීමා වූවක් නොව, ඕනෑම අයෙකුට අවිද්‍යාව දුරු කිරීමෙන් අත්දැකිය හැකි අභ්‍යන්තරයේ පවතින අධ්‍යාත්මිකව පූර්ණ ලෙස අවදි වූ ස්වභාවය බවට වූ පුළුල් අර්ථය වෙනත් මතවාද රැසකින් වසා දමා ඇත. කෙනෙකු විවේචනය කිරීමට පෙර ඔහුගේ ලෝකය කියවීමත්, එකඟ නොවීමට පෙර ඔහු සිතන ආකාරය තේරුම් ගැනීමත් බුද්ධිමය අවංකභාවයේ කොටසකි. කෘතියක් නොකියවා සහ තතු හරිහැටි නොදැන සිදු කරන ප්‍රසිද්ධ ප්‍රකාශ හරහා සමාජයට අත්වන්නේ හුදු මතභේද පමණක් බව මෙම සිදුවීම මනාව පෙන්වා දෙයි.
