ජීවිතයේ එක්වරක් අසාර්ථක වූ විවාහයකින් පසු, නව බලාපොරොත්තු සහිතව යළිත් කැදැල්ලක් තනාගැනීමේ අපේක්ෂාවෙන් සිටි කාන්තාවකගේත්, ඇගේ නව සහකරුගේත් ජීවිත එක්වරම නිමාවට පත්වූ අතිශය ඛේදනීය පුවතක් පුස්සැල්ලාව පොලිස් වසමට අයත් ගම්පොළ, දොරගල ප්‍රදේශයෙන් වාර්තා වේ.
ඊයේ (04) දහවල් කාලයේදී මෙම බිහිසුණු සිදුවීම වාර්තා වී ඇත්තේ 119 හදිසි ඇමතුම් අංශය හරහා පුස්සැල්ලාව පොලීසිය වෙත ලැබුණු තොරතුරකට අනුවය. පොලීසිය අදාළ නිවසට ගොස් පරීක්ෂා කරන විටත් නිවසේ ඇඳක් මත තියුණු ආයුධයකින් කපාකොටා ඝාතනය කරන ලද කාන්තාවකගේ සිරුරක් තිබී ඇති අතර, නිවස පිටුපස ගෙල වැලලාගෙන මියගිය පිරිමි පුද්ගලයෙකුගේ සිරුරක්ද සොයාගැනීමට හැකි වී තිබේ.
මෙලෙස අමානුෂික ලෙස ඝාතනයට ලක්ව ඇත්තේ දොරගල ප්‍රදේශයේම පදිංචිව සිටි 38 හැවිරිදි දිලානි ෂාලිකා දයානන්ද නැමැති කාන්තාවකි. සිය පළමු විවාහයෙන් වෙන්ව තනිව ජීවත්ව ඇති ඇය, පසුව කුරුණෑගල ප්‍රදේශයේ පදිංචිව සිටි 38 හැවිරිදි සමන් නැමැති පුද්ගලයෙකු සමඟ ප්‍රේම සබඳතාවක් ගොඩනඟාගෙන ඇත. දෙවන වරටත් විවාහ වීමේ අපේක්ෂාවෙන් සිටි ඔවුන් දෙදෙනා මෑතක සිට දිලානිගේ දොරගල පිහිටි නිවසේ එකට වාසය කර තිබේ.
මූලික පොලිස් විමර්ශනවලදී අනාවරණය වී ඇති ආකාරයට, ඊයේ දහවල් කාලයේදී කාන්තාවගේ නිවස තුළදී මේ දෙදෙනා අතර කිසියම් උණුසුම් ආරවුලක් හටගෙන ඇත. එම ආරවුල දුරදිග යාමේ ප්‍රතිඵලයක් ලෙස සමන් නැමැත්තා විසින් දිලානිට පිහියකින් පහර දී, ඇඳ මතදීම කපාකොටා ඇයව ඝාතනය කර තිබේ. අනතුරුව එම ස්ථානයේදීම නිවස පිටුපසට ගොස් ඔහුද ගෙල වැලලාගෙන සියදිවි හානිකරගෙන ඇති බව පොලීසිය පවසයි.
දෙදෙනෙකුගේ ජීවිත අකාලයේ අහිමි කරමින් ඝාතනයකින් සහ සියදිවි නසාගැනීමකින් කෙළවර වූ මෙම බිහිසුණු ආරවුලට මුල් වූ නිශ්චිත හේතුව හෝ අබිරහස මෙතෙක් අනාවරණය වී නොමැත. සිද්ධිය සම්බන්ධයෙන් පුස්සැල්ලාව පොලීසිය විසින් වැඩිදුර විමර්ශන කටයුතු ක්‍රියාත්මක කරනු ලබයි.