ප්‍රීතිමත් විවාහ මංගල්‍යයක් අවසන් වූයේ කිසිවෙකුත් නොසිතූ ඛේදවාචකයක් ඉතිරි කරමිනි. හෝමාගම, ගොඩගම ප්‍රදේශයේ උත්සව ශාලාවක පැවැති විවාහ මංගල්‍යයකට සහභාගී වී සිටි තරුණයින් දෙපිරිසක් අතර හටගත් ගැටුමක් අවසානයේ ඉන් එක් තරුණයෙකුට සිය ජීවිතය අහිමි වී තිබේ.
සිද්ධිය සම්බන්ධයෙන් විමර්ශන සිදුකරන මීගොඩ පොලිසිය සඳහන් කළේ, ඊයේ (5) සවස මෙම ගැටුව සිදුව ඇති බවය.මෙම අවාසනාවන්ත සිදුවීම ආරම්භ වී ඇත්තේ අදාළ විවාහය පැවැති උත්සව ශාලාව තුළදීමය. එහිදී මෙම තරුණයින් දෙපිරිස අතර මුලින්ම බහින්බස් වීමක් හටගෙන ඇති අතර, එය කෙමෙන් දුරදිග ගොස් ඇත.
ශාලාව තුළදී ඇති වූ එම වචන හුවමාරුව එතෙකින් නිමාවට පත් නොවී, පසුව උත්සව ශාලාවෙන් පිටතදී එය ගැටුමක් දක්වා වර්ධනය වී ඇති බව සඳහන් වේ. උත්සව ශාලාවේදී ඇති වූ බහින්බස් වීමකින් පසු එම ශාලාවෙන් පිටතට පැමිණි තරුණයින් 20කට පමණ ආසන්න පිරිසක් අතර ගැටුම හටගෙන තිබේ.
ගැටුමෙන් අනතුරුව හෝමාගම මූලික රෝහලට රෝහල් ගත කළ එක් තරුණයෙකු මෙලෙස මියගොස් ඇත.
මෙසේ ඛේදනීය ලෙස ජීවිතක්ෂයට පත්ව ඇත්තේ වයස අවුරුදු 34ක් වූ පුද්ගලයෙකි. ඔහු හෝමාගම, කිරිවත්තුඩුව ප්‍රදේශයේ පදිංචිකරුවෙකු බව සිද්ධිය සම්බන්ධයෙන් තොරතුරු දක්වමින් පොලිසිය ප්‍රකාශ කර තිබේ.
කෙසේ නමුත් මෙම මරණය ඝාතනයක්ද නැතහොත් ඇතිවූ රෝගාබාධ තත්ත්වයක් මත සිදුවූවක්ද යන්න පිළිබඳ විමර්ශන ක්‍රියාත්මකය.
සිද්ධිය වූ ස්ථානයට පැමිණි නුගේගොඩ පොලිස් කොට්ඨාසයේ අපරාධ පරීක්ෂණ නිලධාරීන් මූලික පරීක්ෂණ කටයුතු සිදුකළ අතර, මීගොඩ පොලිසිය වැඩිදුර විමර්ශන ආරම්භ කර ඇත.
