රෝහල් පද්ධතියේ පරිපාලන කටයුතු වඩාත් කාර්යක්ෂම කරමින් මෙරට ජනතාවට ඉහළම ගුණාත්මක සෞඛ්‍ය සේවාවක් තහවුරු කිරීමේ අරමුණ පෙරදැරිව, දිවයිනේ ප්‍රධාන පෙළේ රෝහල් පහක් සඳහා නව අධ්‍යක්ෂවරුන් පත් කිරීම ඊයේ (02) සෞඛ්‍ය අමාත්‍යාංශයේදී සිදු කෙරිණි.
රාජ්‍ය සේවා කොමිෂන් සභාවේ සෞඛ්‍ය සේවා කමිටුව විසින් ලබා දුන් අනුමැතියට යටත්ව මෙම පත්වීම් සිදු කර ඇති අතර, ඒ සඳහා සෞඛ්‍ය ක්ෂේත්‍රයේ ජ්‍යෙෂ්ඨ පරිපාලන ශ්‍රේණිය නියෝජනය කරන නිලධාරීන් පස්දෙනෙකු වෙත නිල පත්වීම් ලිපි ප්‍රදානය කිරීම මෙහිදී සිදුවිය.
මෙම නව පත්වීම්වලට අනුව, දකුණු කොළඹ (කළුබෝවිල) ශික්ෂණ රෝහලේ නව අධ්‍යක්ෂවරිය ලෙස වෛද්‍ය ඩබ්ලිව්. එම්. යූ. එස්. විජේමාන්න මහත්මිය පත් කර ඇති අතර, උතුරු කොළඹ (රාගම) ශික්ෂණ රෝහලේ නව අධ්‍යක්ෂවරයා ලෙස වෛද්‍ය ඩී. ඒ. කේ. පෙරේරා මහතා පත් කර ඇත. මීට සමගාමීව කොළඹ රිජ්වේ ආර්යා ළමා රෝහලේ නව අධ්‍යක්ෂවරයා ලෙස වෛද්‍ය ඩබ්ලිව්. ඒ. පී. පී. රත්නසේකර මහතා සිය පත්වීම් ලිපිය ලබා ගත්තේය.
ඊට අමතරව, මඩකලපුව සහ පේරාදෙණිය යන ප්‍රධාන ශික්ෂණ රෝහල් සඳහා ද නව ප්‍රධානීන් පත් කර තිබේ. ඒ අනුව මඩකලපුව ශික්ෂණ රෝහලේ නව අධ්‍යක්ෂවරයා ලෙස වෛද්‍ය ජී. සුකුණන් මහතාත්, පේරාදෙණිය ශික්ෂණ රෝහලේ අධ්‍යක්ෂවරයා ලෙස වෛද්‍ය ඩබ්ලිව්. එම්. සී. එම්. විජේසිංහ මහතාත් අදාළ තනතුරු සඳහා පත් කරනු ලැබූහ.
සෞඛ්‍ය ක්ෂේත්‍රයේ යහපැවැත්ම උදෙසා සියලු දෙනා දැඩි කැපවීමෙන් යුතුව කටයුතු කිරීමේ වැදගත්කම මෙහිදී නව නිලධාරී මණ්ඩලයට විශේෂයෙන් අවධාරණය කෙරිණි.
මෙම පත්වීම් ලිපි ප්‍රදානය කිරීමේ අවස්ථාව සඳහා සෞඛ්‍ය හා ජනමාධ්‍ය අමාත්‍යාංශයේ ලේකම්, විශේෂඥ වෛද්‍ය අනිල් ජාසිංහ, සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන, අමාත්‍යාංශයේ අතිරේක ලේකම් ජී. එම්. ජනක කිත්සිරි ගුණවර්ධන සහ නියෝජ්‍ය අධ්‍යක්ෂ ජනරාල් (වෛද්‍ය සේවා) වෛද්‍ය සාගරී කිරිවන්දෙනිය යන මහත්ම මහත්මීන් ඇතුළු පිරිසක් එක්ව සිටියහ.
