ශ්රී ලංකා ක්රිකට් කණ්ඩායමේ හිටපු නායක මහේල ජයවර්ධන ජාත්යන්තර ක්රීඩා සංවිධානයක් වන GMR Sports හි ක්රිකට් අධ්යක්ෂවරයා (Director of Cricket) ලෙස පත් කර තිබේ. විවිධ ක්රීඩා සහ ජාත්යන්තර වෙළෙඳපොළවල් කෙරෙහි අවධානය යොමු කරන ප්රමුඛ පෙළේ ගෝලීය ක්රීඩා ආයතනයක් වන GMR Sports විසින් සිය ක්රිකට් නායකත්වය සහ හැකියාවන් තවදුරටත් ශක්තිමත් කිරීමේ පියවරක් ලෙස මෙම පත් කිරීම නිවේදනය කර ඇත.
මෙම නව තනතුර යටතේ මහේල ජයවර්ධන වෙත පැවරී ඇත්තේ එක් කණ්ඩායමක පමණක් නොව, කලාප කිහිපයක් පුරා විහිදුණු ක්රිකට් ජාලයක උපායමාර්ගික මෙහෙයවීමයි. ඒ අනුව, කාන්තා ප්රිමියර් ලීගයේ (Women's Premier League) දිල්ලි කැපිටල්ස් (Delhi Capitals), ඩුබායි කැපිටල්ස් (Dubai Capitals) සහ සදර්න් බ්රේව් (Southern Brave) යන කණ්ඩායම්වල ක්රිකට් උපායමාර්ග, දක්ෂතා වර්ධනය සහ කුසලතා සංවර්ධන කටයුතු ඔහුගේ අධීක්ෂණය යටතට පත් වේ. ඊට අමතරව එක්සත් රාජධානියේ හැම්ප්ෂයර් ක්රිකට් (Hampshire Cricket) ආයතනය සමඟ ද ඔහු සමීපව කටයුතු කිරීමට නියමිතය.
ක්රිකට් මෙහෙයුම්, දක්ෂ ක්රීඩකයන් හඳුනා ගැනීම, ක්රීඩක සංවර්ධනය සහ කාර්යසාධන කළමනාකරණය පිළිබඳ උපායමාර්ගික මඟපෙන්වීම මහේලගේ ප්රධාන වගකීම් අතර වේ. අදාළ කණ්ඩායම්වල කළමනාකාරිත්වය, ප්රධාන පුහුණුකරුවන් සහ ක්රිකට් පරිපාලන කණ්ඩායම් සමඟ එක්ව ඔවුන්ගේ ක්රීඩා අරමුණු සහ දිගුකාලීන ඉලක්ක සපුරා ගැනීමට ඔහු සහාය වනු ඇත. එමෙන්ම, GMR Sports පද්ධතිය පුරා ක්රිකට් දැනුම, විශේෂඥතාව සහ යහපත් පරිචයන් හුවමාරු කර ගැනීම පහසු කිරීම සඳහා හැම්ප්ෂයර් ක්රිකට් ආයතනයේ ක්රිකට් අධ්යක්ෂ ජයිල්ස් වයිට් (Giles White) සමඟ ද ඔහු සහයෝගයෙන් කටයුතු කරයි.
සෑම කණ්ඩායමකටම ආවේණික අනන්යතාවන්ට සහ අභිලාෂයන්ට ගරු කරමින්, ශක්තිමත් ක්රිකට් ව්යුහයන් ගොඩනැගීම, තිරසාර කුසලතා මාර්ග නිර්මාණය කිරීම සහ ඉහළ කාර්යසාධන සංස්කෘතියක් පෝෂණය කිරීම කෙරෙහි GMR Sports දක්වන අවධානය මෙම පත් කිරීමෙන් පිළිබිඹු වේ. සිය පරම්පරාවේ විශිෂ්ටතම ක්රිකට් ක්රීඩකයෙකු ලෙස ඉහළම මට්ටමින් ශ්රී ලංකාව නියෝජනය කළ මහේල, පසුව ලෝක ක්රිකට් පිටියේ වඩාත් ගෞරවයට පාත්ර වූ පුහුණුකරුවෙකු ලෙස ස්ථාපිත විය. ජාත්යන්තර ක්රිකට් සහ ෆ්රැන්චයිස් තරගාවලි හරහා ඔහු ලබා ඇති අත්දැකීම් GMR Sports වෙත සැලකිය යුතු උපායමාර්ගික හා තාක්ෂණික ගැඹුරක් එක් කරනු ඇතැයි අපේක්ෂා කෙරේ.
මෙම පත් කිරීම මහේල ජයවර්ධනට GMR Sports ආයතනය සමඟ ඇති සබඳතාවයේ නව පරිච්ඡේදයක් වුවද, ඔහු එම ආයතනයට ආගන්තුකයෙකු නොවේ. GMR Sports හි සභාපති කිරන් කුමාර් ග්රාන්ධි (Kiran Kumar Grandhi) පෙන්වා දෙන පරිදි, මීට පෙර දිල්ලි ඩෙයාර්ඩෙවිල්ස් (වර්තමානයේ දිල්ලි කැපිටල්ස්) කණ්ඩායමේ නායකත්වය දරා ඇති බැවින් මහේල එම සංවිධානය සහ එහි ක්රිකට් ගමන්මග පිළිබඳව මනා අවබෝධයකින් පසුවෙයි. "ක්රිකට් යනු GMR Sports හි ගෝලීය කළඹේ මූලික ගලක් වන අතර, අප ජාත්යන්තර වෙළෙඳපොළවල් හරහා අපගේ ව්යාප්තිය අඛණ්ඩව සිදු කරන විට ක්රිකට් නායකත්වය ශක්තිමත් කිරීම ප්රධාන ප්රමුඛතාවක් ලෙස පවතිනවා. මහේලගේ පත් කිරීම එම දිශාවට තැබූ වැදගත් පියවරක්," යැයි සභාපතිවරයා සඳහන් කළේය. සෑම කණ්ඩායමකම අනන්යතාවට ගරු කරමින් කණ්ඩායම් අතර දැනුම හා අත්දැකීම් බෙදා ගන්නා ඒකාබද්ධ ක්රිකට් පරිසර පද්ධතියක් ගොඩනැගීමේ දැක්ම ඉදිරියට ගෙන යාමට මහේල තීරණාත්මක කාර්යභාරයක් ඉටු කරනු ඇති බවත්, ඔහුව නැවත GMR Sports වෙත පිළිගැනීමට ලැබීම සතුටක් බවත් ඔහු වැඩිදුරටත් පැවසීය.
GMR Sports හි ප්රධාන විධායක නිලධාරී අන්කිත් බල්ඩි (Ankit Baldi) ද මහේලගේ පැමිණීම අගය කරමින් සඳහන් කළේ, ක්රිකට් විශිෂ්ටත්වය, නායකත්වය සහ සාර්ථක කණ්ඩායම් ගොඩනැගීමට අවශ්ය දේ පිළිබඳ අවබෝධය යන දුර්ලභ සංයෝජනය මහේල සතු බවයි. සිය ක්රිකට් අංශවල ගුණාත්මකභාවය අඛණ්ඩව ඉහළ නැංවීමේදී ඔහුගේ අත්දැකීම් අතිශයින් වටිනා බව පැවසූ ඔහු, මහේල GMR පවුලට පිළිගැනීමට ලැබීම පිළිබඳ සිය සතුට පළ කළේය.
සිය නව භූමිකාව පිළිබඳව අදහස් දක්වමින් මහේල ජයවර්ධන ප්රකාශ කළේ GMR Sports හි ගමන්මගේ උද්යෝගිමත් අවධියකදී එම ආයතනය හා එක්වීමට ලැබීම පිළිබඳව තමන් සතුටට පත්වන බවයි. විවිධ වෙළෙඳපොළවල් හරහා විවිධත්වයෙන් යුත් ක්රිකට් කණ්ඩායම් සමූහයක් එම සංවිධානය විසින් ගොඩනගා ඇති බවත්, ඒ සෑම කණ්ඩායමකටම තමන්ගේම අනන්යතාවක්, අවස්ථාවන් සහ අභිලාෂයන් ඇති බවත් ඔහු පෙන්වා දුන්නේය.
"කාන්තා ප්රිමියර් ලීගයේ දිල්ලි කැපිටල්ස්, ඩුබායි කැපිටල්ස් සහ සදර්න් බ්රේව් කණ්ඩායම් මෙන්ම පුළුල් හැම්ප්ෂයර් ක්රිකට් කණ්ඩායම සමඟ ද සමීපව කටයුතු කිරීමට මම බලාපොරොත්තු වෙනවා. මගේ අවධානය යොමු වන්නේ කුසලතා සංවර්ධනය කිරීම, කාර්යසාධන ව්යුහයන් ශක්තිමත් කිරීම සහ ක්රීඩකයන්ට මෙන්ම කණ්ඩායම්වලට ඉහළම මට්ටමින් අඛණ්ඩව තරග කිරීමට හැකි වටපිටාවක් ගොඩනැගීම කෙරෙහියි. සෑම කණ්ඩායමකම තනි අනන්යතාවන්ට සහ සංස්කෘතීන්ට ගරු කරමින් GMR Sports හි දිගුකාලීන දැක්මට දායක වීමට මම බලාපොරොත්තු වෙනවා," යැයි මහේල ජයවර්ධන වැඩිදුරටත් සඳහන් කළේය.