father-wraps-bandages-around-son-to-save-him-from-accident-police-arrive

අනතුරක් සිදුවූ වහාම රෝහල වෙත පැමිණි පුද්ගලයෙකු, තම අත්පා වෙළුම් පටිවලින් ඔතාගෙන පොලිසිය ඉදිරියේ පෙනී සිටියේය. යතුරුපැදිය පැදවූයේ තමා බවත්, පදිකයා අනතුරට ලක්වූයේ තම අතින් බවත් ඔහු නිලධාරීන්ට ප්‍රකාශ කළේය.

එහෙත්, මේ සිදුවෙමින් පවතින්නේ රියදුරු බලපත්‍රයක් නොමැතිව යතුරුපැදියක් පදවා බරපතළ අනතුරක් සිදු කළ සිය බාලවයස්කාර පුත්‍රයා නීතියෙන් ගලවා ගැනීම සඳහා පියෙකු විසින් රඟදක්වනු ලබන අපූරු නාටකයක් බව එකල කිසිවකුත් දැන සිටියේ නැත.




සැබෑ අනතුර සිදුවී තිබුණේ හොරණ සිට රත්නපුර දෙසට ගමන් කරමින් තිබූ යතුරුපැදියක් දික්වෙනපුර ප්‍රදේශයේදී මාර්ගය හරහා මාරු වෙමින් සිටි පනස් හැවිරිදි පදිකයෙකුගේ ගැටීමෙනි. එම අවස්ථාවේ යතුරුපැදිය පදවා ඇත්තේ රියදුරු බලපත්‍රයක් හෝ නොමැති 17 හැවිරිදි තරුණයෙකි. ඔහු සමඟ තවත් දාහත් හැවිරිදි මිතුරන් දෙදෙනෙකුද එහි ගමන් කර තිබේ. අනතුරේ බරපතළකම කෙතරම්ද යත්, ගැටීමෙන් පදිකයාගේ පාදයක අස්ථි බිඳී ගොස් තිබුණි. තුවාලකරුගේ බිරිඳ සහ පුත්‍රයා එක්ව ගිලන් රථයක් ගෙන්වා ඔහුව හොරණ දිස්ත්‍රික් මහ රෝහලට ඇතුළත් කර ඇති අතර, පසුව වැඩිදුර ප්‍රතිකාර සඳහා කළුබෝවිල ශික්ෂණ රෝහලට මාරු කර යවා ඇත.

රෝහලේදී වෙළුම් පටි සහිතව පෙනී සිටි පියාට රෝහල්ගත වන ලෙස උපදෙස් දුන් පොලිස් නිලධාරීහු, වැඩිදුර විමර්ශන සඳහා අනතුර සිදුවූ ස්ථානයට ගියහ. එහිදී ප්‍රදේශවාසීන්ගෙන් කළ විමසීම්වලදී සහ ආරක්ෂිත කැමරා දර්ශන පරීක්ෂා කිරීමේදී හෙළි වූයේ යතුරුපැදිය පදවා ඇත්තේ වැඩිහිටියෙකු නොව, දාහත් හැවිරිදි තරුණයෙකු බවයි. යතුරුපැදියේ පසු පැදිකරුවන් ලෙස ගමන් කළ අනෙක් තරුණයන් දෙදෙනාද අනතුරින් තුවාල ලබා රෝහල්ගතව ප්‍රතිකාර ලබමින් සිටි අතර, ඔවුන්ගෙන් ලබාගත් ප්‍රකාශ මත යතුරුපැදිය සහ එය පැදවූ බාලවයස්කාර පුත්‍රයා අත්අඩංගුවට ගැනීමට පොලිසියට හැකි විය.




මේ අතර, අනතුර සිදුවූ ස්ථානයේ විමර්ශන අවසන් කළ පොලිස් නිලධාරීන් යළි රෝහලට පැමිණෙන විට, තුවාල ලබා සිටින බව පැවසූ පියා රෝහලෙන් පිටව ගොස් තිබුණි. පසුව හොරණ මාහේන ප්‍රදේශයේදී ඔහුව අත්අඩංගුවට ගැනීමට පොලිසිය සමත් විය. නිලධාරීන් විසින් ඔහුගේ අත්පාවල ඔතා තිබූ වෙළුම් පටි ඉවත් කර පරීක්ෂා කිරීමේදී තහවුරු වූයේ, එහි කිසිදු තුවාලයක් නොමැති බවත් ඒ සියල්ල ව්‍යාජ ලෙස මවා පෑ ඒවා බවත්ය.

සිය පුත්‍රයාගේ වරද තමන් වෙත පවරා ගැනීමට උත්සාහ කළ බැල්ලපිටිය, අක්කර 35 ප්‍රදේශයේ පදිංචි වල්පිටගේ ආනන්ද කුමාර නැමැති පනස් හැවිරිදි වියේ පසුවන මෙම පුද්ගලයා අවසානයේ අධිකරණයට ඉදිරිපත් කෙරිණි. සිද්ධිය සැලකිල්ලට ගත් හොරණ ප්‍රධාන මහේස්ත්‍රාත් ලක්මිණි විදානගමගේ මහත්මිය, ව්‍යාජ තුවාල මවා පෑ පියා මෙම මස 30 වැනිදා දක්වා රිමාන්ඩ් භාරයේ තබන ලෙස නියෝග කළාය. මීට අමතරව, අනතුර සිදුකළ දාහත් හැවිරිදි පුත්‍රයා රුපියල් ලක්ෂ පහක ශරීර ඇපයක් මත මුදාහැරීමටත්, බරපතළ තුවාල ලැබූ පදිකයාට රුපියල් ලක්ෂයක වන්දියක් ගෙවන ලෙසත් ඇය වැඩිදුරටත් නියෝග කළාය.