රුසියානු ජනාධිපති ව්ලැදිමීර් පුටින් සහ ලොව ප්‍රමුඛතම ධනවතෙකු වන ඉලෝන් මස්ක් අතර චන්ද්‍රිකා තාක්ෂණය සම්බන්ධයෙන් "සමීප" සබඳතාවක් ගොඩනැගෙමින් පවතින බව අනාවරණය වී තිබේ. මොස්කව් නුවර පැවති රුසියා-අප්‍රිකා සමුළුව අමතමින් පුටින් පවසා ඇත්තේ මස්ක් යනු "නියම බුද්ධිමතෙක්" (real genius) බවයි.
චන්ද්‍රිකා මඟින් අන්තර්ජාල පහසුකම් සපයන රුසියාවේ 'රස්වෙට්' (Rassvet) ව්‍යාපෘතිය පිළිබඳව එම සමුළුවේදී අදහස් දක්වමින් රුසියානු ජනාධිපතිවරයා මේ බව ප්‍රකාශ කර ඇත."ඔහු බුද්ධිමතෙක්, නියම බුද්ධිමතෙක්. අපි මස්ක් මහතා ඇතුළු අපගේ ඇමරිකානු හවුල්කරුවන් සමඟ සමීප සම්බන්ධතා පවත්වනවා," යනුවෙන් පුටින් එහිදී සඳහන් කර තිබේ. රුසියාවේ 'රස්වෙට්' සහ මස්ක්ගේ ස්පේස් එක්ස් සමාගමට අයත් 'ස්ටාර්ලින්ක්' (Starlink) චන්ද්‍රිකා කක්ෂයේදී එකිනෙකට බාධා නොවන අයුරින් පවත්වාගෙන යාම සඳහා මස්ක් සමඟ මෙලෙස සබඳතා පැවැත්වීම වැදගත් බව පුටින් වැඩිදුරටත් පැහැදිලි කර ඇත. පවතින දේශපාලනික ගැටලු හමුවේ වුවද තමන් සහ ඇමරිකානු පාර්ශ්වය මෙය අන්‍යෝන්‍ය වශයෙන් අගය කරමින් දැඩි කැපවීමෙන් කටයුතු කරන බවද ඔහු පවසා තිබේ. කෙසේ වෙතත්, මේ සම්බන්ධයෙන් අදහස් විමසීමට කළ ඉල්ලීමට ස්පේස් එක්ස් සමාගම ප්‍රතිචාර දක්වා නොමැත.
දකුණු අප්‍රිකාවේ පිහිටි රුසියානු තානාපති කාර්යාලයද සටහනක් තබමින් ප්‍රකාශ කර ඇත්තේ 'රස්වෙට්' යනු රුසියාවේ ස්ටාර්ලින්ක් විකල්පය බවත්, එය මෙම ක්ෂේත්‍රය තුළ රුසියාව තබන මූලික පියවර පමණක් සනිටුහන් කරන බවත්ය. අභ්‍යවකාශ කටයුතු සම්බන්ධයෙන් රුසියාව ඉලෝන් මස්ක් ඇතුළු ඇමරිකානු පාර්ශ්වය සමඟ සමීප සබඳතා පවත්වන බව එම තානාපති කාර්යාලයද තහවුරු කර ඇත. අන්තර්ජාල චන්ද්‍රිකා නිරීක්ෂකයන්ට අනුව දැනට කක්ෂගතව ඇත්තේ රස්වෙට් චන්ද්‍රිකා විස්සකට මඳක් වැඩි ප්‍රමාණයක් පමණක් වුවද, ස්ටාර්ලින්ක් සමාගම පවසන පරිදි ඔවුන්ගේ චන්ද්‍රිකා 13,000කට ආසන්න සංඛ්‍යාවක් දැනටමත් අභ්‍යවකාශයට මුදාහැර තිබේ.
මෙම තාක්ෂණික සබඳතාව කරළියට පැමිණෙන්නේ පුටින් විසින් යුක්‍රේනය ආක්‍රමණය කර වසර පහක් සපිරීමට ආසන්නව තිබියදී, ඇමරිකාව සහ රුසියාව අතර යම් සමීපත්වයක් පෙන්නුම් කරන පසුබිමකය. රුසියානු හමුදා මැඩපැවැත්වීමේ ප්‍රයත්නයේදී යුක්‍රේනය ප්‍රධාන වශයෙන් ස්ටාර්ලින්ක් අන්තර්ජාල සබඳතා මත විශ්වාසය තබා තිබුණද, පසුගිය සතියේදී යුක්‍රේන හමුදාවන්ට හදිසියේම ස්ටාර්ලින්ක් සබඳතා බිඳවැටීම්වලට මුහුණ දීමට සිදුවිය. එය ස්පේස් එක්ස් සමාගම විසින් හිතාමතාම සිදු කළ බවට මස්ක් පිළිගෙන තිබේ.
දෙරට අතර දේශපාලන හා රාජ්‍ය තාන්ත්‍රික වාතාවරණය තුළද මෑතකදී කැපී පෙනෙන වෙනස්කම් කිහිපයක් වාර්තා විය. ඉරානය සමඟ පවතින යුද්ධය හේතුවෙන් ඉහළ ගිය ඉන්ධන මිල පහත හෙළීමේ පියවරක් ලෙස රුසියාවෙන් ඩීසල් ආනයනය කිරීම සඳහා ගිවිසුමකට එළැඹි බව ඇමරිකානු ජනාධිපති ඩොනල්ඩ් ට්‍රම්ප් මේ මස මුලදී ප්‍රකාශ කළේය. ඉන් අනතුරුව, ක්‍රියාත්මක වීමට නියමිතව තිබූ රුසියාවට එරෙහි ඇතැම් සම්බාධක ඉවත් කිරීමටද ට්‍රම්ප් පියවර ගත්තේය. ඊට නොබෝ වේලාවකට පසු රුසියානු අත්අඩංගුවේ සිටි ඇමරිකානු පුරවැසියෙකු නිදහස් කෙරුණු අතර, ඇමරිකානු විශේෂ නියෝජිත ස්ටීව් විට්කොෆ් විසින් පුටින් "මානවහිතවාදියෙකු" ලෙස හඳුන්වනු ලැබීය.
දකුණු අප්‍රිකාවේ උපත ලබා, පසුව කැනඩාවට සංක්‍රමණය වී ඇමරිකාවේ පදිංචි වූ ඉලෝන් මස්ක්ගේ ටෙස්ලා, ස්පේස් එක්ස් සහ ස්ටාර්ලින්ක් ඇතුළු සියලුම ව්‍යාපාරික ආයතන ඇමරිකාව කේන්ද්‍ර කරගනිමින් කැලිෆෝනියා සහ ටෙක්සාස් ප්‍රාන්ත ආශ්‍රිතව ක්‍රියාත්මක වේ. ඇතැම් අවස්ථාවල ධනයෙන් ට්‍රිලියනපතියෙකු බවටද පත්වන මෙම බිලියනපතියා, ජනාධිපති ඩොනල්ඩ් ට්‍රම්ප් ඇතුළු රිපබ්ලිකන් පාක්ෂික දේශපාලනඥයන්ගේ ප්‍රධානතම දේශපාලන මිතුරෙකු මෙන්ම මූල්‍ය ආධාරකරුවෙකු ලෙසද කටයුතු කරයි.