ගල්නෑව ප්‍රදේශයේ නිවසකට රාත්‍රී කාලයේ නාන කාමරයේ කවුළුවකින් රහසිගතව ඇතුළු වූ පුද්ගලයෙකු, එහි තිබූ ඇඳුම් පැළඳගෙන අශෝභන ලෙස හැසිරී නිවසේ ප්‍රධාන දොරෙන් පිටව යන අයුරු දැක්වෙන සීසීටීවී දර්ශන පෙළක් පසුගියදා බලධාරීන්ගේ අවධානයට ලක්විය. නිවසකට අයුතු ලෙස ඇතුළුවීම සහ අශෝභන ලෙස හැසිරීමේ චෝදනාව මත මෙම සිදුවීමට අදාළ සැකකරු පසුගිය 6 වැනිදා රාත්‍රියේ ගල්නෑව පොලිසිය විසින් අත්අඩංගුවට ගත් අතර, ඔහුව කැකිරාව මහේස්ත්‍රාත් අධිකරණයට ඉදිරිපත් කිරීමෙන් පසු එළඹෙන 20 වැනිදා දක්වා රක්ෂිත බන්ධනාගාරගත කිරීමට නියෝග කෙරිණි.
කෙසේ වෙතත්, පොලිස් විමර්ශනවලදී අනාවරණය වූයේ 'බණ්ටි' යන අන්වර්ථ නාමයෙන් හැඳින්වෙන 35 හැවිරිදි මෙම සැකකරු සාමාන්‍ය අපරාධකරුවෙකු නොවන බවයි. ගල්නෑව, නව නගරය, ඩී තුන ඇළ පාර ප්‍රදේශයේ පදිංචි කේ. බී. මධුරංග රත්නායක නමැති හිටපු යුද හමුදා සෙබළෙකු වන මොහු, මීට පෙර අනුරාධපුර ශික්ෂණ රෝහලේ සේවය කළ පුහුණු විශේෂඥ වෛද්‍යවරියක බරපතළ ලෙස දූෂණය කිරීමේ ආන්දෝලනාත්මක සිදුවීමේ ප්‍රධාන සැකකරු බව පොලිසිය විසින් තහවුරු කරගෙන තිබේ.
අතීතයේදී ද විවිධ අපරාධ රැසක් සම්බන්ධයෙන් චෝදනා ලබා ඇති මොහුගේ නෛතික පසුබිම අතිශය සංකීර්ණ එකකි. අදාළ වෛද්‍යවරිය දූෂණය කිරීමේ ප්‍රධාන සිද්ධිය සම්බන්ධයෙන් මාස හතකට ආසන්න කාලයක් රක්ෂිත බන්ධනාගාරගතව සිටි මොහුව, දැඩි ඇප කොන්දේසි සහිතව මුදාහැරීමට ප්‍රධාන මහේස්ත්‍රාත්වරයා මීට පෙර නියෝග කර තිබුණි. එහෙත් මාස තුනකට අධික කාලයක් ගතවීත් එම ඇප කොන්දේසි සපුරාලීමට ඔහුට හැකියාවක් ලැබුණේ නැත. ඊට අමතරව, ජීව අත්බෝම්බයක් ළඟ තබාගැනීමේ වෙනත් බරපතළ චෝදනාවක්ද ඔහුට එරෙහිව පැවති බැවින්, ඇප නියම වූ දින දීම සැකකරුට නැවතත් රක්ෂිත බන්ධනාගාරගත වීමට සිදුවිය. විදෙස්ගත වීම වළක්වාලමින් අධිකරණය මගින් තහනම් නියෝගයක්ද ඔහුට එරෙහිව පනවා තිබේ.
පසුගිය පෙබරවාරි 23 වැනිදා, අනුරාධපුර ප්‍රධාන මහේස්ත්‍රාත් සියපත් සසිදු වික්‍රමරත්න මහතා විසින් මෙම හිටපු සෙබළාට මාස හයක අනිවාර්ය සිරදඬුවමක් සහ රුපියල් 1500 ක දඩයක් නියම කළේය. එම දඬුවම නියම වූයේ වෛද්‍යවරියගේ ස්මාර්ට් ජංගම දුරකථනය පැහැරගැනීමේ චෝදනාවට පමණක් ඔහු අධිකරණය හමුවේ වරද පිළිගැනීම හේතුවෙනි. අදාළ දුරකථනය සඟවා තබාගැනීමට ආධාර අනුබල දීමේ චෝදනාවට වරද පිළිගත් ඔහුගේ සහෝදරිය වන ශාලිකා හර්ෂණී රත්නායක සහ එච්. කේ. මිතිල සම්පත් කුමාරසිංහ යන අයටද මාස හය බැගින් වූ සිරදඬුවම් නියම වූ අතර, ප්‍රධාන මහේස්ත්‍රාත්වරයා විසින් එම දඬුවම වසර දෙකකට අත්හිටුවීමට නියෝග කර රුපියල් 1500 බැගින් දඩ නියම කරන ලදී.
බරපතළ ලිංගික දූෂණ චෝදනාව සම්බන්ධයෙන් පැවැත්වූ හඳුනාගැනීමේ පෙරෙට්ටුවේදී වින්දිත වෛද්‍යවරිය විසින් සැකකරුව ඉතා පහසුවෙන් හඳුනාගනු ලැබූ අතර, සැකකරු සම්බන්ධයෙන් ඩී.එන්.ඒ. පරීක්ෂණයක් සිදුකර ඊට අදාළ වෛද්‍ය වාර්තා අධිකරණයට ඉදිරිපත් කිරීමට ද පොලිසිය කටයුතු කර තිබුණි.
මෙම ප්‍රධාන නඩුව සඳහා මාස හතක් පුරාවට රක්ෂිත බන්ධනාගාරගතව සිටි විත්තිකරු වෙනුවෙන් කිසිදු නීතිඥවරයෙකු පෙනී නොසිටීම විශේෂත්වයකි. අගතියට පත් වෛද්‍යවරියගේ අයිතිවාසිකම් වෙනුවෙන් ජනාධිපති නීතිඥ කාලිංග ඉන්ද්‍රතිස්ස මහතාගේ උපදෙස් මත නීතිඥවරයෙකු අධිකරණය හමුවේ පෙනී සිටි අතර, පැමිණිල්ල මෙහෙයවීම සිදුකරන ලද්දේ අනුරාධපුර මූලස්ථාන පොලිසියේ ළමා හා කාන්තා කාර්යංශයේ ස්ථානාධිපතිනි ප්‍රධාන පොලිස් පරීක්ෂිකා නිශානි සෙනවිරත්න මහත්මියගේ උපදෙස් පරිදි උප පොලිස් පරීක්ෂක ඒ. සී. දයානන්ද මහතා විසිනි.
පොලිසිය විසින් සිදුකළ මෙම පුළුල් විමර්ශනවල සටහන් මේ වනවිට නීතිපතිවරයා වෙත යොමු කර ඇති බව උප පොලිස් පරීක්ෂකවරයා අධිකරණයට වාර්තා කර ඇත. ඒ අනුව, වෛද්‍යවරිය දූෂණය කිරීමේ ප්‍රධාන සිද්ධිය සම්බන්ධයෙන් නීතිපතිවරයා විසින් අනුරාධපුර මහාධිකරණය හමුවේ සැකකරුට එරෙහිව ඉදිරියේදී අධිචෝදනා ගොනුකිරීමට නියමිතව තිබේ.
මහාධිකරණය හමුවේ බරපතළ අධිචෝදනා ලැබීමට නියමිතව සිටියදීත්, ගල්නෑවේ නිවසකට අයුතු ලෙස ඇතුළු වී අශෝභන ලෙස හැසිරීමේ මෙම නවතම සිදුවීමත් සමඟ, සැකකාර හිටපු හමුදා සෙබළාගේ අපරාධ චර්යාව යළිත් වරක් සමාජයේ මෙන්ම නීතියේද දැඩි අවධානයට ලක්ව ඇත. ගල්නෑව පොලිසිය විසින් මෙම නව සිදුවීම සම්බන්ධයෙන් වැඩිදුර විමර්ශන ක්‍රියාත්මක කරමින් පවතී.