දෛනික ජීවිකාව සරි කරගැනීම සඳහා සුපුරුදු පරිදි වහලයක අලුත්වැඩියා කටයුත්තක නිරත වෙමින් සිටි වඩු කාර්මිකයෙකු, අඩි දොළහක පමණ ඉහළක සිට ඇද වැටී ජීවිතක්ෂයට පත්වීමේ ශෝකජනක පුවතක් හෝමාගම පිටිපන උතුර ප්‍රදේශයෙන් වාර්තා වෙයි. මෙලෙස අවාසනාවන්ත ලෙස මියගොස් ඇත්තේ දාම්පේ, බෙරුකැටිය අංක 267/01 ලිපිනයේ පදිංචිව සිටි පනස් හැවිරිදි සමරප්පුලිගේ මංජුල සිසිර කුමාර නැමැති එක් දරු පියෙකි.
පොලීසිය සඳහන් කරන පරිදි, මෙම අනතුර සිදුව ඇත්තේ පිටිපන උතුර ප්‍රදේශයේ අලුතින් ඉදිකරමින් පවතින නිවසක වහලයේ අලුත්වැඩියා කටයුත්තක් අතරතුරදීය. මියගිය කාර්මිකයා සිය ඥාතියෙකුද සමග එම කටයුත්තේ නිරතව සිට ඇත. එහිදී වහලයේ අලුත්වැඩියාව සඳහා යොදාගෙන තිබූ යකඩමරං ලීයක් මතට ඔහු පය තැබූ සැණින්, එය අනපේක්ෂිත ලෙස මැදින් බිඳී යාමෙන් මෙම අනතුර සිදුව තිබේ.
ලීය බිඳී යාමත් සමග අඩි දොළහක් පමණ උසක සිට පහළට ඇද වැටුණු ඔහුගේ සිරුර කෙළින්ම පතිත වී ඇත්තේ පහත වූ කොන්ක්‍රීට් පොළොව මතටය. දැඩි ප්‍රහාරය හේතුවෙන් ඔහුගේ හිසට සහ කොන්දට බරපතළ හානි සිදුව තිබූ අතර, ඔහුව වහාම ප්‍රතිකාර සඳහා හෝමාගම මූලික රෝහලට ඇතුළත් කර තිබේ. එහෙත් රෝහල්ගතව ප්‍රතිකාර ලබමින් සිටියදී පසුගිය 04 වැනිදා ඔහු ජීවිතක්ෂයට පත්වූ බව හෝමාගම පොලීසිය පවසයි.
අනතුර සිදුවූ ස්ථානයට පැමිණි හෝමාගම හදිසි මරණ පරීක්ෂිකා සාම විනිසුරු මානෙල් ගමගේ මහත්මිය විසින් ස්ථානීය පරීක්ෂණයක් සිදුකරන ලද අතර, ඉන් අනතුරුව දේහය පිළිබඳ පශ්චාත් මරණ පරීක්ෂණය සිදුකරන ලෙස හෝමාගම මූලික රෝහලේ අධිකරණ වෛද්‍ය නිලධාරීවරයා වෙත නියෝග කළාය.
ඒ අනුව හෝමාගම මූලික රෝහලේ අධිකරණ වෛද්‍ය නිලධාරී වෛද්‍ය එම්.එස්. දිනෙත් මහතා විසින් පශ්චාත් මරණ පරීක්ෂණය සිදුකරන ලදී. එහිදී අනාවරණය වූ වෛද්‍ය වාර්තාවලට සහ සාක්ෂිවලට අනුව, ඉහළ සිට කොන්ක්‍රීට් පොළොවට ඇද වැටීමෙන් සිරුර අභ්‍යන්තරයේ රුධිර වහනයක් සිදුව තිබේ. ඊට අමතරව, පාදයක සිරාවක තිබූ ලේ කැටියක් ගමන් කර පෙනහළුවල සිරවීම මරණයට සෘජුවම බලපා ඇති බව තහවුරු විය.
මෙම වෛද්‍ය නිගමන මත පදනම්ව, මෙය හදිසි අනතුරකින් සිදුවූ මරණයක් බවට මරණ පරීක්ෂිකා මානෙල් ගමගේ මහත්මිය විසින් නිගමනය කරනු ලැබුවාය. සිද්ධිය සම්බන්ධයෙන් හෝමාගම පොලීසියේ පොලිස් කොස්තාපල් (97582) තිලකරත්න මහතා ඇතුළු නිලධාරීහු කණ්ඩායමක් විසින් වැඩිදුර පරීක්ෂණ මෙහෙයවනු ලබති.