කහටගස්දිගිලිය, මීමින්නාවල ප්‍රදේශයේ කැලෑබඳ කොටසක අභිරහස් ලෙස මියගොස් සිටි තවත් වන ඇතකුගේ මළ සිරුරක් අද (01) දිනයේ වනජීවී නිලධාරීන් විසින් සොයාගෙන තිබේ. කාවන්තිස්ස ඇතා මියගොස් මාසයක් ගතවන්නටත් පෙර වාර්තා වූ මෙම ඛේදවාචකයේ වඩාත් සංවේදී කරුණ වන්නේ, සොයාගන්නා අවස්ථාව වන විටත් මියගිය ඇතාගේ වම්පස දළය කිසිවෙකුත් විසින් කපාගෙන ගොස් තිබීමයි.
කහටගස්දිගිලිය වනජීවී කාර්යාලයේ නිලධාරීන්ට මෙම සිරුර හමුවී ඇත්තේ මීමින්නාවල ප්‍රදේශයේ කායන්ගොල්ලෑව වැවට යාබඳ කුඹුරක් අසල පිහිටි වන ලැහැබක තිබියදීය. සිරුරේ ස්වභාවය අනුව සතා මියගොස් දින කිහිපයක් ගතවී ඇති බවට නිලධාරීහු සැක පළ කරති. මියගිය සතාගේ වම් දළය කිසියම් පුද්ගලයකු විසින් කපාගෙන ගොස් ඇති බවට වනජීවී බලධාරීන් මේ වනවිටත් සැකපළ කරනු ලබයි.
මෙම සිදුවීම සම්බන්ධයෙන් පුළුල් විමර්ශනයක් මේ වනවිටත් ක්‍රියාත්මක ය. ඒ සඳහා කහටගස්දිගිලිය වනජීවී කාර්යාලය, දිවුල්වැව පොලීසිය මෙන්ම ශ්‍රී ලංකා යුද හමුදාව ද එක්ව පරීක්ෂණ කටයුතු ආරම්භ කර තිබේ.
වනජීවී දෙපාර්තමේන්තුවෙන් ලද තොරතුරක් මත පදනම්ව වාර්තා වන මෙම සිදුවීම සම්බන්ධයෙන් විපක්ෂ නායක සජිත් ප්‍රේමදාස මහතා ද සිය සමාජ මාධ්‍ය ගිණුමක් ඔස්සේ දැඩි කම්පනය පළ කර තිබිණි. මියගිය ඇතාගේ ඡායාරූපයක් ද ඊට එක් කරමින් ඔහු ප්‍රකාශ කර තිබුණේ මෙය තවත් එක් ඇතෙකුගේ ඝාතනයක් මෙන්ම අතිශය බිහිසුණු දසුනක් බවයි.
වන අලින්ට එරෙහිව සිදුවන මෙවැනි ඝාතන වළක්වා ගැනීම සඳහා කඩිනම් සහ තීරණාත්මක පියවර ගන්නා ලෙස බලධාරීන්ගෙන් ඉල්ලා සිටින විපක්ෂ නායකවරයා, මෙම අපරාධයට වගකිවයුතු පුද්ගලයන් "පාරිසරික ත්‍රස්තවාදීන්" ලෙස හැඳින්වීය. ඔවුන් වහා නීතිය හමුවට පමුණුවා ලබාදිය හැකි උපරිම දඬුවම් ලබාදිය යුතු බව ද ඔහු අවධාරණය කර ඇත. මීට පෙර මියගිය කාවන්තිස්ස ඇතාගේ මරණය සම්බන්ධයෙන් ද විශේෂ පරීක්ෂණයක් සහ වනජීවී සංරක්ෂණය වෙනුවෙන් කැපවූ වැඩපිළිවෙළක් අවශ්‍ය බවට හෙතෙම යෝජනා කර තිබිණි.
"මෙම විනාශය සහ ව්‍යසනය වළක්වා ගැනීම සඳහා අප සියලු දෙනා එක්වෙමු," යනුවෙන් සජිත් ප්‍රේමදාස මහතා සිය සටහනින් වැඩිදුරටත් ඉල්ලා සිටියි. කාවන්තිස්ස සද්ධන්තයාගේ වියෝවෙන් මාසයක් ඉක්ම යන්නටත් පෙර, වම් දළය අහිමිව ගිය මෙම ඇතාගේ නිහඬ සිරුර මෙරට වනජීවී සම්පත මුහුණ දී ඇති අවදානම පිළිබඳව යළිත් වරක් පෙන්වා දෙමින් තිබේ.
