නීත්‍යානුකූලව බදු නොගෙවා ශ්‍රී ලංකාවට ආනයනය කරන ලද සුඛෝපභෝගී BMW මෝටර් රථයක් සන්තකයේ තබාගැනීම සහ බදු වංචා කිරීම යන චෝදනාවලට තමන් වරදකරු බව හිටපු අමාත්‍ය ජොන්ස්ටන් ප්‍රනාන්දු මහතා සිය නීතිඥවරුන් මාර්ගයෙන් කොළඹ කොටුව මහේස්ත්‍රාත් අධිකරණයට දැනුම් දී තිබේ. කොළඹ පිහිටි පෞද්ගලික හෝටලයක අතහැර දමා ගොස් තිබියදී සොයාගන්නා ලද මෙම අභිරහස් වාහනය වටා ගෙතුණු ආන්දෝලනාත්මක සිදුවීම් මාලාවක එක් සුවිශේෂී කඩඉමක් ලෙස මෙය සටහන් වෙයි.
මෙම සිදුවීමේ මූලාරම්භය පසුගිය ජනාධිපතිවරණයට පෙර දිනය දක්වා දිවයයි. කොළඹ පිහිටි හෝටලයක අංගනයේ WP C 24-0430 දරන කළු පැහැති BMW රථයක් සැකකටයුතු ලෙස ගාල්කර ඇති බවට අපරාධ පරීක්ෂණ දෙපාර්තමේන්තුවට තොරතුරක් ලැබී තිබිණි. ඒ අනුව වහාම ක්‍රියාත්මක වූ විමර්ශකයන්ට, රථය අදාළ ස්ථානයේ නැවැත්වූ පුද්ගලයාගෙන් වැදගත් කරුණු කිහිපයක් අනාවරණය කරගැනීමට හැකි විය. ඔහු පොලීසියට පවසා තිබුණේ මෙම රථය ජොන්ස්ටන් ප්‍රනාන්දු මහතාට අයත් එකක් බවත්, ඔහුගේ රියදුරා විසින් එය හෝටලයට ගෙනවිත් දැමූ බවත්ය.
අපරාධ පරීක්ෂණ දෙපාර්තමේන්තු නිලධාරීන් විසින් රථය පරීක්ෂා කිරීමේදී හිටපු අමාත්‍යවරයාට අයත් ලේඛන කිහිපයක් ඒ තුළ තිබී සොයාගන්නා ලදී. එහෙත්, වාහනයේ ලියාපදිංචියට අදාළ කිසිදු ලියවිල්ලක් එහි නොවීය. වඩාත් ගැටලු සහගත තත්ත්වය මතු වූයේ, රථයේ ප්‍රදර්ශනය කර තිබූ ලියාපදිංචි අංකය නාවල ප්‍රදේශයේ පිහිටි පෞද්ගලික සමාගමකට නිකුත් කරන ලද්දක් බවට වැඩිදුර විමර්ශනවලදී තහවුරු වීමත් සමගය.
මෙම තොරතුරු මත පදනම්ව විමර්ශන පුළුල් කළ අපරාධ පරීක්ෂණ දෙපාර්තමේන්තුව, පසුගිය ඔක්තෝබර් 23 වැනි දින ජොන්ස්ටන් ප්‍රනාන්දු මහතාගෙන් ප්‍රකාශයක් සටහන් කරගැනීමෙන් අනතුරුව ඔහුව අත්අඩංගුවට ගත් අතර, පසුව රක්ෂිත බන්ධනාගාරගත කෙරිණි. මේ අතරවාරයේ, මෙම සුඛෝපභෝගී වාහනයේ සැබෑ අනන්‍යතාව පිළිබඳව සොයාබැලූ ශ්‍රී ලංකා රේගුව තහවුරු කළේ අදාළ BMW රථයේ චැසි අංකය සහිත කිසිදු වාහනයක් නීත්‍යානුකූලව මෙරටට ආනයනය කර නොමැති බවයි. ඊට සමගාමීව රජයේ විශ්ලේෂක දෙපාර්තමේන්තුව විසින් සිදුකළ පරීක්ෂණයේදී අනාවරණය වූයේ මෙය නීතිවිරෝධී ලෙස එකලස් කරන ලද වාහනයක් බවයි.
කෙසේ වෙතත්, මෙම BMW රථයේ කතාව ශ්‍රී ලංකාවේ දේශසීමාවලින් ඔබ්බට විහිදෙන ජාත්‍යන්තර ජාලයකට සම්බන්ධ එකක් බවට පොලිස් විමර්ශන මගින් මේ වනවිට කරුණු අනාවරණය වෙමින් පවතී. පොලීසිය පවසන පරිදි, ජර්මනියේ නිෂ්පාදනය කර එංගලන්තයේ ගැනුම්කරුවකු වෙත අලෙවි කර තිබූ මෙම වාහනයේ චැසි සහ එන්ජින් අංක, 2021 වසරේදී එක්සත් රාජධානියේදී සොරකම් කරන ලද බවට වාර්තා වූ සුඛෝපභෝගී වාහනයකට සම්බන්ධ බවට සොයාගෙන ඇත. ජනාධිපතිවරණය ආසන්නයේ කොළඹ හෝටලයකින් හමුවූ අභිරහස් වාහනයක්, එංගලන්තයේදී සිදුවූ සොරකමකට සම්බන්ධ වෙමින් අවසන් වූයේ මෙලෙස හිටපු අමාත්‍යවරයෙකු අධිකරණය හමුවේ වරද පිළිගැනීමෙනි.