දිවයින පුරා හදිසියේ අත්විඳීමට සිදුවූ සමස්ත විදුලි බිඳවැටීමත් සමඟ, මෙරට ප්‍රධානතම විදුලි උත්පාදන මධ්‍යස්ථානය වන නොරොච්චෝල ලක්විජය ගල් අඟුරු බලාගාරයේ ක්‍රියාකාරීත්වය ද මුළුමනින්ම ඇණහිට තිබේ. බලාගාර කළමනාකාරීත්වය තහවුරු කරන පරිදි එහි ඇති විදුලි ජනන ඒකක තුනම මේ වන විට සම්පූර්ණයෙන්ම අක්‍රිය තත්ත්වයට පත්ව ඇත.
ඒ සමඟම නොරොච්චෝල බලාගාරය මගින් සැපයූ සමස්ත ධාරිතාවම මේ මොහොතේ ජාතික විදුලිබල පද්ධතියට අහිමි වී ගොස් තිබේ.බලධාරීන් පෙන්වා දෙන ආකාරයට මෙම දැවැන්ත බලාගාරය එකවර අක්‍රිය වීම පසුපස ඇත්තේ ස්වයංක්‍රීයව ක්‍රියාත්මක වූ ආරක්ෂිත පියවරකි. ජාතික පද්ධතියේ හදිසියේ හටගත් කාර්මික දෝෂයත් සමඟ එහි සංඛ්‍යාතය ක්ෂණිකව කඩා වැටීම හේතුවෙන් බලාගාරයේ ආරක්ෂාව වෙනුවෙන් ජනන යන්ත්‍ර මෙලෙස ඇණහිට ඇත. කෙසේ වෙතත්, මෙහි ප්‍රතිඵලය වී ඇත්තේ මෙරට දෛනික විදුලි අවශ්‍යතාවයෙන් සියයට 40කට අධික ප්‍රමාණයක් සපයන මූලික බලශක්ති ප්‍රභවය ජාතික පද්ධතියෙන් මුළුමනින්ම ගිලිහී යාමය.
මෙය ක්ෂණිකව යථා තත්ත්වයට පත් කළ හැකි තත්ත්වයක් නොවන බව විදුලිබල ඉංජිනේරුවරු පෙන්වා දෙති. ජල විදුලි හෝ ඩීසල් බලාගාර මෙන් ගල් අඟුරු බලාගාරයක් බිඳවැටුණු සැණින් යළි පණගැන්වීමේ තාක්ෂණික හැකියාවක් නොමැත. ඒ සඳහා නිශ්චිත තාක්ෂණික ක්‍රියාවලියක් පසුකළ යුතුව ඇත. මේ මොහොතේ අධික උෂ්ණත්වයක පවතින බොයිලේරු සහ වාෂ්ප ටර්බයින සම්පූර්ණයෙන්ම සිසිල් වීමට ඉඩ හැරිය යුතු අතර, ඉන් අනතුරුව නැවතත් පීඩනය ගොඩනඟා ජාතික පද්ධතියට සම කිරීම සඳහා අවම වශයෙන් පැය 48ත් 72ත් අතර කාලයක් ගතවනු ඇත.
මෙගාවොට් 300ක ධාරිතාවකින් යුත් ජනන යන්ත්‍ර තුනකින් සමන්විත ලක්විජය බලාගාරය මෙලෙස අක්‍රිය වූ පළමු අවස්ථාව මෙය නොවේ. මීට පෙර දිවයින පුරා විදුලි බිඳවැටීම් වාර්තා වූ සෑම අවස්ථාවකදීම මෙම බලාගාරය ද අක්‍රිය වූ අතර, එම යන්ත්‍ර යළි පණගන්වා පද්ධතියට එක් කරන තෙක් නිර්මාණය වන මෙගාවොට් 900ක දැවැන්ත විදුලි හිඟය කළමනාකරණය කරගැනීම බලධාරීන්ට දැඩි අභියෝගයක් විය. මෙවරද එම අභියෝගාත්මක තත්ත්වයට මුහුණ දීමට සිදුවනු ඇති බව වත්මන් තත්ත්වය මගින් පැහැදිලි කෙරේ.
