පසුගිය සෙනසුරාදා මුළු දිවයිනම අඳුරේ ගිල්වමින් සිදුවූ හදිසි පද්ධති බිඳවැටීමත් සමඟ මුළුමනින්ම අක්‍රීය වූ නොරොච්චෝලේ තාප බලාගාරයට යළි පණ දීමේ මෙහෙයුම් මේ වනවිට කඩිනම් වී තිබේ. එහි විදුලි ඉංජිනේරුවන් පවසන පරිදි, හෙට (22) පස්වරුව වන විට මෙගාවොට් 300ක ධාරිතාවකින් යුත් එක් ජනන යන්ත්‍රයක් හෝ ජාතික විදුලිබල පද්ධතියට යළි එක් කිරීමට අවශ්‍ය කටයුතු මේ වනවිටත් සූදානම් වෙමින් පවතී.
මෙම යථා තත්ත්වයට පත්වීමේ ක්‍රියාවලිය හෙට දිනයේදී සාර්ථක වුවහොත්, එය විදුලි පාරිභෝගිකයින්ට මහත් අස්වැසිල්ලක් වනු ඇත. බලශක්ති අමාත්‍යාංශයේ ලේකම් ජී.එම්.ආර්.ඩී. අපොන්සු මහතා හිරු ප්‍රවෘත්ති අංශයට තහවුරු කළේ, හෙට දිනයේදී එක් ජනන යන්ත්‍රයක් හෝ පද්ධතියට එක් කිරීමට හැකි වුවහොත් ඉදිරියට විදුලි කප්පාදුවක් අවශ්‍ය නොවන බවට ජාතික පද්ධති මෙහෙයුම් සමාගම (NSO) තමන් වෙත දැනුම් දී ඇති බවයි.
කෙසේ වෙතත්, අද (21) දිනයේදීත් පාරිභෝගිකයින්ට පැයක කාලයක් විදුලිය නොමැතිව සිටීමට සිදුවනු ඇත. ජාතික පද්ධතියේ සමතුලිතභාවය රැකගැනීම සඳහා පස්වරු 4:30 සිට රාත්‍රී 8:30 දක්වා කාලය තුළ මෙම පැයක විදුලි කප්පාදුව සිදු කිරීමට මහජන උපයෝගිතා කොමිසම විසින් ලබා දුන් දින තුනක අවසරය අදින් අවසන් වෙයි.
ජාතික පද්ධතියට මෙගාවොට් 810ක දැවැන්ත විදුලි ධාරිතාවක් අහිමි කරමින් නොරොච්චෝලේ බලාගාරයේ ජනන යන්ත්‍ර තුනම එකවර අක්‍රීය වීම, මෙරට විදුලි සැපයුමට දැඩි බලපෑමක් එල්ල කළේය. සාමාන්‍යයෙන් මෙරට දෛනික විදුලි ඉල්ලුම මෙගාවොට් 2800කට ආසන්න වුවද, ඊයේ දිනයේදී ක්‍රියාත්මක වූ විදුලි කප්පාදුවත් සමඟ සමස්ත ඉල්ලුම මෙගාවොට් 2589ක් ලෙස සටහන්ව තිබුණි.
හෙටින් පසු යළිත් විදුලිය කප්පාදු කිරීම දීර්ඝ කිරීම සම්බන්ධයෙන් මේ දක්වා කිසිදු ඉල්ලීමක් තම කොමිෂන් සභාව වෙත ලැබී නොමැති බව මහජන උපයෝගිතා කොමිසම පවසයි. මේ අතර, පවතින සමස්ත තත්ත්වය සමාලෝචනය කිරීම සඳහා ජාතික පද්ධති මෙහෙයුම් සමාගමේ නිලධාරීන් අතර විශේෂ සාකච්ඡාවක්ද අද දිනයේ පැවැත්වීමට නියමිතය.