ශ්‍රී ලාංකේය ටෙලිනාට්‍ය සහ සිනමා ප්‍රේක්ෂකයන්ගේ හදවත් තුළ 'ලොකු හාමුදුරුවෝ' ලෙස නොමැකෙන සටහනක් තැබූ ප්‍රවීණ චරිතාංග රංගන ශිල්පී රහල් බුලත්සිංහල අද (22) දිවියේ රඟමඬලෙන් සමුගත්තේය. අසනීප තත්වයෙන් පෞද්ගලික රෝහලක ප්‍රතිකාර ලබමින් සිටියදී ඔහු අභාවප්‍රාප්ත වූ බව දන්වා තිබේ. මෙරට කලා ක්ෂේත්‍රයේ කාගේත් ආදරය දිනාගත් ප්‍රවීණ රංගන ශිල්පිනී මෙන්ම හාස්‍යෝත්පාදක නිළි සුසිලා කෝට්ටගේ ගේ ආදරණීය ස්වාමිපුරුෂයා වූයේ ද ඔහුය.
මුල්ලේරියාව ප්‍රදේශයේ පදිංචිව සිටි ඔහු මියයන විට හැත්තෑ තුන් වැනි වියේ පමණ පසුවිය.
රහල් බුලත්සිංහල යනු සාම්ප්‍රදායික රංගන ගමනකට වඩා හාත්පසින්ම වෙනස් පසුබිමකින් කලාවට පිවිසි අයෙකි. යුද හමුදා නිලධාරියෙකු වූ සිය පියාගේ ආභාෂය නිසා ඔහු මුලින් ආරක්ෂක අංශ කෙරෙහි යොමුවීමට අදහස් කර තිබුණි. එහෙත් ඔහු සිය වෘත්තීය ජීවිතය ආරම්භ කළේ බන්ධනාගාර නිලධාරියෙකු ලෙසිනි. වසර විසි දෙකක් පමණ බන්ධනාගාර දෙපාර්තමේන්තුවේ සේවය කිරීමෙන් අනතුරුව, ජීවිතයේ පසුකාලීනව ඔහු කලා ක්ෂේත්‍රයට පිවිසියේය.
වේදිකා නාට්‍ය හරහා කලාවට සම්ප්‍රවේශ වූ ඔහුගේ පෞද්ගලික ජීවිත කතාව ද අපූරු හැරවුම් ලක්ෂ්‍යවලින් සමන්විත විය. එක්තරා අවධියක ප්‍රේමයේ පරාජිත හැඟීම් සහ වේදනාවන් හේතුවෙන් පැවිදි දිවියට ඇතුළත් වීමට පවා ඔහු තීරණය කර තිබුණි. එහෙත් වේදිකා නාට්‍ය කටයුතු අතරතුරදී හමුවූ සුසිලා කෝට්ටගේ ගේ ආදරය සහ බැඳීම ඔහුගේ ජීවන ගමන්මඟ සම්පූර්ණයෙන්ම වෙනස් කිරීමට සමත් විය.
ඔහු රංගන ශිල්පියෙකු ලෙස වඩාත් ජනප්‍රියත්වයට සහ ප්‍රේක්ෂක ගෞරවයට පාත්‍ර වූයේ 2021 සහ 2022 වසරවල විකාශය වූ 'නාඩගම්කාරයෝ' ටෙලිනාට්‍යයේ ලොකු හාමුදුරුවන්ගේ චරිතයෙනි. තමන්ට ලැබෙන චරිත වෙනුවෙන් උපරිම සාධාරණයක් ඉටු කිරීමට උත්සාහ කළ ඔහු, මෙම භික්ෂු චරිතය වෙනුවෙන් සිය ආහාර පාන සහ ජීවන රටාව පවා වෙනස් කරමින් අතිශය ගැඹුරු කැපවීමක් කළේය. ඊට අමතරව 'කෝපි කඩේ' පොඩි මහත්තයා ලෙසත්, 'කොඩි ගහ යට' වැනි ටෙලිනාට්‍යවලත් ඔහු කළ රංගනයන් ප්‍රේක්ෂක මතකයේ රැඳී තිබේ.
රූපවාහිනියට අමතරව සිනමාව තුළ ද සිය ප්‍රතිභාව සලකුණු කළ රහල් බුලත්සිංහල, 1995 වසරේ තිරගත වූ රෝදයා චිත්‍රපටයෙන් සිනමා ගමන ආරම්භ කරමින් පෙම් මල් මාලා (1997), ලෙෆ්ට් රයිට් සර් (2004), ක්වේ සෙරා (2014), සාම කුමරු කතාව (2019) සහ මෑතකාලීනව තේජා වැනි චිත්‍රපට සඳහා සිය රංගන දායකත්වය ලබා දුන්නේය. මේ වසරේ (2026) නිර්මාණය වූ 'ද එම්ප්ටි රෝබ්' කෙටි චිත්‍රපටයේ ද ඔහු ජ්‍යෙෂ්ඨ භික්ෂුවකගේ චරිතයට පණ පෙව්වේය.
නෙත් එෆ්.එම් රේඩියෝවේ 'මා බාල කාලේ', සියත රූපවාහිනියේ 'ආදරණීය ජීවිතය' සහ 'අසංග ලයිව්' වැනි මාධ්‍ය වැඩසටහන් හරහා සිය බන්ධනාගාර රැකියාවේ අත්දැකීම්, භික්ෂු චරිතය වෙනුවෙන් කළ කැපවීම් මෙන්ම පෞද්ගලික ජීවිතයේ රසබර තැන් ඔහු ප්‍රේක්ෂකයන් සමග බෙදාගෙන තිබුණි. ජීවිතයේ විවිධ භූමිකාවන් පසුකරමින් ඇවිත්, අවසානයේ සිය උපරිම කැපවීමෙන් චරිතයකට පණ පෙවූ අද්විතීය රංගන ශිල්පියෙකු ලෙස ශ්‍රී ලාංකේය ප්‍රේක්ෂකයන්ගේ ගෞරවාදරයට පාත්‍ර වූ රහල් බුලත්සිංහලයන්ගේ නික්ම යාම දේශීය කලා ක්ෂේත්‍රයේ නිහඬ අහිමිවීමකි.