බ්රිතාන්ය අග්රාමාත්යවරයා විසින් පාපන්දු ක්රීඩාංගණ තුළ පනවා ඇති මත්පැන් තහනම ඉවත් කිරීම පිළිබඳව සලකා බලන බවට ඉඟි පළ කර තිබේ. 1985 වසරේ ක්රීඩා ඉසව් (මත්පැන් පාලනය ආදිය) පනත මගින් එංගලන්තයේ සහ වේල්සයේ පාපන්දු පිටිය පෙනෙන මානයේ මත්පැන් පානය කිරීම තහනම් කර ඇත.
නමුත්, වෙනත් ක්රීඩා ලෝලීන්ට නොමැති මෙවැනි සීමාවක් පාපන්දු ප්රේක්ෂකයන්ට පමණක් පැනවීම අසාධාරණ බවට බර්න්හැම් (Burnham) පෙන්වා දෙයි. 2021 වසරේදී සිදු කරන ලද ප්රේක්ෂක සමාලෝචනයකදී ද මෙම තහනම පිළිබඳව නැවත සලකා බලන ලෙස ඉල්ලා ඇති අතර,පහළ මට්ටමේ පාපන්දු තරග සඳහා මෙය අත්හදා බලන ලෙස යෝජනා කර තිබුණි. ඉංග්රීසි පාපන්දු ලීගයේ ප්රකාශකයෙකු සඳහන් කරන්නේ වසර 40කට වඩා පැරණි මෙම නීති රීති වර්තමාන ක්රීඩාංගණ කළමනාකරණයට සහ ආරක්ෂාවට සරිලන පරිදි යාවත්කාලීන වී නොමැති බැවින් එය සමාලෝචනය කිරීමට ඔවුන් සූදානම් බවයි. පාපන්දු ආධාරකරුවන්ගේ සංගමයේ සභාපති ටොම් ග්රේට්රෙක්ස් ද අගමැතිවරයාගේ අදහස අගය කරමින් පවසන්නේ, වෙනත් ක්රීඩා හෝ ප්රසංග නරඹන විට එම අසුනේම සිට මත්පැන් පානය කිරීමට හැකි පසුබිමක පාපන්දු ප්රේක්ෂකයින් පමණක් අපරාධකරුවන් ලෙස සැලකීම අසාධාරණ බවයි. කෙසේ වෙතත්,
එක්සත් රාජධානියේ පාපන්දු පොලිස් ඒකකය (UKFPU) මෙම යෝජනාව සම්බන්ධයෙන් සිය කනස්සල්ල පළ කරයි. වෙනත් ක්රීඩාවල දක්නට නොලැබෙන ආකාරයේ ප්රචණ්ඩකාරී හැසිරීම් පාපන්දු ක්රීඩාව තුළ සුළු පිරිසක් හෝ සිදු කරන බවත්, ඊට මත්පැන් ප්රධාන සාධකයක් වන බවත් ඔවුන් පෙන්වා දෙයි. 1989 හිල්ස්බරෝ (Hillsborough) ඛේදවාචකයෙන් පසු ගෙන ආ නීති රීති හේතුවෙන් මේ දක්වා විශාල පාපන්දු ඛේදවාචකයක් වාර්තා වී නොමැති අතර, ප්රමාණවත් සාක්ෂි නොමැතිව මෙවැනි වෙනසක් කිරීම අනතුරුදායක බව ඔවුන්ගේ අදහසයි. මේ අතර, මාස 18ක සාර්ථක අත්හදා බැලීමකින් පසුව මෙම තරග වාරයේ ආරම්භයේ සිට කාන්තා සුපර් ලීගයේ (WSL) තරග සඳහා පිටිය පෙනෙන මානයේ මත්පැන් පානය කිරීමට අවසර ලබා දී තිබේ.
ඉංග්රීසි කාන්තා පාපන්දු ලීග දෙකේ සමාජ 26කින් 25ක්ම සිය ප්රේක්ෂකයන්ට මෙම අවස්ථාව ලබා දී ඇති අතර, ඊට එකම ව්යතිරේකය වන්නේ බ්රයිටන් සහ හෝව් ඇල්බියන් (Brighton & Hove Albion) කණ්ඩායමයි. මෙලෙස කාන්තා තරග සඳහා මෙම අවසරය ලබා දීමට ප්රධාන හේතුවක් වී ඇත්තේ එම තරගවලදී ප්රේක්ෂක ගැටුම් සාම්ප්රදායිකවම අවම මට්ටමක පැවතීමයි.
