එයාර්බස් ගනුදෙනුවේදී රුපියල් මිලියන 100 ක අල්ලසක් ලබාගැනීමේ චෝදනාව මත රක්ෂිත බන්ධනාගාරගත කර සිටින නාමල් රාජපක්ෂ මහතා සම්බන්ධයෙන් කැබිනට් තීරණ දැනුම්දීමේ මාධ්ය හමුවේදී මාධ්යවේදීන් නැඟූ ප්රශ්න කිහිපයකට අමාත්ය විජිත හේරත් මහතා අදහස් දක්වා තිබේ. එහිදී දේශපාලනඥයන් ලබාගන්නා අල්ලස්, හිඟන්නන්ට ලබාදෙන මුදල් සමඟ සැසඳීම, Gen Z තරුණ පරම්පරාවේ ස්ථාවරය සහ පවතින නීතිමය ක්රියාමාර්ග පිළිබඳව අමාත්යවරයා කරුණු පැහැදිලි කළේය.
උදය ගම්මන්පිල මහතා විසින් හිඟන්නෙකුට රුපියල් 10ක් දීම වරදක් නොවන බවට කළ ප්රකාශයට ප්රතිචාර දක්වමින් අමාත්ය විජිත හේරත් සඳහන් කළේ, නැතිබැරිකම නිසා හිඟන්නෙකුට දෙන ආධාරයක් සහ දේශපාලනඥයන් ලබාගන්නා අල්ලස් හෙවත් ගතමනාවන් කිසිසේත්ම එක හා සමාන කළ නොහැකි බවයි. ගම්මන්පිල මහතාගේ අදහසින් නාමල් රාජපක්ෂ යනු හිඟන්නෙකුදැයි ප්රශ්න කළ අමාත්යවරයා, මෙවැනි මූල්ය ලබාදීම් හිඟන්නන්ට දෙන ආධාරවලට සමාන කරමින් අදහස් දක්වන පුද්ගලයන්ගේ මොළයේ පරික්ෂාවක් සිදුකිරීම කාලෝචිත බවද පෙන්වා දුන්නේය. මෙවැනි ප්රකාශ රටේ මහජනතාව කිසිසේත්ම පිළිනොගන්නා බවද හෙතෙම වැඩිදුරටත් පැවසීය.
හිටපු ජනාධිපති රනිල් වික්රමසිංහ මහතා විසින් මෙය දේශපාලන පලිගැනීමක් ලෙස හැඳින්වීම සහ මේ දෙස Gen Z තරුණයන් පිළිකුලෙන් බලන බවට කළ ප්රකාශයටද අමාත්යවරයා මෙහිදී පිළිතුරු දුන්නේය. ගෝල්ෆේස් පිට්ටනිය මූලික කරගනිමින් තරුණ පරම්පරාව අරගල කළේ රට විනාශ කළ දූෂිතයන් සහ හොරුන් පලවා හැරීමට මිස දූෂණය සුරක්ෂිත කිරීමට නොවන බව විජිත හේරත් මහතා අවධාරණය කළේය. එබැවින් මෙවැනි දූෂිතයන්ට දඬුවම් පැමිණවීම පිළිබඳව Gen Z පරම්පරාව පසුවන්නේ ඉහළ සතුටකින් බවත්, පසුගිය කාලයේ එම දඬුවම් ප්රමාද වීම ගැන පමණක් ඔවුන් පසුතැවුණු බවත් හෙතෙම සඳහන් කළේය. වංචාවෙන් හා දූෂණයෙන් තොර අනාගතයක් වෙනුවෙන් මැදිහත් වීමට ලැබීම ගැන වත්මන් තරුණ පරපුර ආඩම්බර වන බවද අමාත්යවරයා පැවසීය.
එමෙන්ම නාමල් රාජපක්ෂ මහතාට එරෙහිව දැනට පවතින නඩුව රනිල් වික්රමසිංහ මහතාගේ පාලන සමයේදීම පවරන ලද්දක් බව අමාත්යවරයා අනාවරණය කළේය. පසුගිය රජය සමයේදී මෙම නඩුව පවරා තිබුණද, විවිධ දේශපාලන ඩීල් හරහා එය යටපත් කර දැමීමට කටයුතු කර තිබූ බව හෙතෙම පෙන්වා දුන්නේය. වත්මන් රජය මගින් සිදුකර ඇත්තේ එලෙස යටපත් කර තිබූ නඩු නැවත විභාගයට ගෙන ඒම සඳහා අවශ්ය නීතිමය පහසුකම් සැලසීම පමණක් බව අමාත්ය විජිත හේරත් මහතා වැඩිදුරටත් තහවුරු කළේය.