පාර්ලිමේන්තු මන්ත්රී නාමල් රාජපක්ෂ මහතා බන්ධනාගාරගත කිරීම මගින් ඔහුගේ දේශපාලන ඉදිරිගමන අඩපණ කළ නොහැකි බව පාර්ලිමේන්තු මන්ත්රී රෝහිත අබේගුණවර්ධන මහතා පවසයි. මාධ්ය වෙත අදහස් දක්වමින් ඔහු පෙන්වා දුන්නේ, එළඹෙන සැප්තැම්බර් 12 වනදා සංවිධානය කර ඇති ජනරැලිය අකර්මන්ය කිරීමේ අරමුණින් නාමල් රාජපක්ෂ මහතා සිරගත කිරීමට උත්සාහ කළද එම සැලසුම් කිසිසේත්ම සාර්ථක නොවන බවයි.
ආණ්ඩුව විසින් සිදුකරනු ලබන මෙවැනි දේශපාලන පළිගැනීම් හමුවේ ජනතාව තවදුරටත් සංවිධානය වන බව සඳහන් කළ මන්ත්රීවරයා, මුලින් අපේක්ෂා කළ මට්ටමටත් වඩා විශාල ජනගහනයක් අදාළ රැස්වීම සඳහා එක්වීමට මේ වන විටත් ඉල්ලීම් ඉදිරිපත් කරමින් සිටින බව ප්රකාශ කළේය.
මහජනතාව වත්මන් ආණ්ඩුවට බලය පවරා දුන්නේ ඔවුන්ගේ බලාපොරොත්තු සහ අවශ්යතා ඉටුකර ගැනීම සඳහා මිස දේශපාලන ප්රතිවාදීන් සිරගත කරමින් පළිගැනීම්වල නිරත වීමට නොවන බවද රෝහිත අබේගුණවර්ධන මන්ත්රීවරයා වැඩිදුරටත් අවධාරණය කළේය.