ඉරිදා සතිඅන්ත පුවත්පතට ලබාදී ඇති සම්මුඛ සාකච්ඡාවකදී සිය පක්ෂ අභ්යන්තරයේ පවතින බෙදීම සම්බන්ධ පළවන කටකතා ගැන ටිල්වින් සිල්වා පැහැදිලි කිරීමක් කර තිබේ.
අගමැති ආචාර්ය හරිනි අමරසූරියට විරුද්ධව පැලවත්තෙ කණ්ඩායමක් වැඩකරනවා කියලා යන කතාවෙ ඇත්ත මොකක්ද...?
මෙහෙමයි, ඕක ඉළඇදෙන විහිළුවක්නෙ. මට හිතෙන්නෙ විපක්ෂයේ අය ඔය වගේ ඉන්න එක අපිට හරි වාසියි. මොකද කවදාවත් සිද්ධ වෙන්නෙ නැති, කවුරුවත් විශ්වාස කරන්නෙ නැති අවලාදයක් එක්ක ඉන්න එක ඔවුන්ට අවාසියි. මොකද තවත් අවුරුදු 10ක් ගියත් තත්ත්වය මේකමනෙ. දැන් ඇත්තටම ජේවීපී, එන්පීපී කියලා බෙදන්න බෑ. අපි ඔක්කොම දේදුන්න වගේ ඉරක් ගහලා වෙන්කරන්න පුළුවන් තැනක නෑ. හරිනි සහෝදරියයි, අපියි අතර තියෙන්නෙ ඉතාම හොඳ මිත්රත්වයක්, බැඳීමක්. අපේ පක්ෂයෙ හැමෝම අනුර සහෝදරයට ආදරෙයි, හරිනි සහෝදරියටත් ආදරෙයි. විරුද්ධවාදීන් හිතනවා, එන්පීපී එකත් ඒගොල්ලොන්ගෙ පක්ෂ වගේ කියලා. එහෙම එකක් නම් අපිට මෙච්චර දුර යන්න බෑ. මේක එහෙම එකක් නෙමෙයි. එක තැනක තිබුණා, මමයි අනුර සහෝදරයයි හරිනි සහෝදරියට වස දෙන්න යනවා කියලා. ඉතින් එතරම්ම බොරුවක් කියන්න තරම් තැනකට විපක්ෂය වැටුණු එක ගැන අපිට සතුටුයි කියලා තමයි කියන්න තියෙන්නෙ.
