චීන මෝටර් රථ නිෂ්පාදකයින්ගෙන් එල්ල වන දැඩි තරගකාරිත්වය හමුවේ සිය අනාගත පැවැත්ම සහ තරගකාරීත්වය තහවුරු කර ගැනීම සඳහා ෆොක්ස්වැගන් (Volkswagen) සමාගමේ අධීක්ෂණ මණ්ඩලය විසින් දැවැන්ත ප්රතිව්යුහගතකරණ සැලැස්මක් අනුමත කර තිබේ. මෙම නව සැලසුමට අනුව 2030 වසර වන විට රැකියා 50,000ක් කප්පාදු කිරීමට නියමිත අතර, මෙය 2024 වසරේ අගභාගයේ සිට මේ දක්වා අනුමත කර ඇති තවත් සේවක දොට්ට දැමීම් 50,000කට අමතරව සිදු වන්නකි.
මීට අමතරව, 2031 සහ 2034 අතර කාලය තුළ ජර්මනියේ එම්ඩන්, ස්වික්කව්, හැනෝවර් සහ නෙකාර්සුල්ම් යන නගරවල පිහිටි කර්මාන්තශාලා හතරක අනාගත ක්රියාකාරීත්වය පිළිබඳව සමාගමට සහතික විය නොහැකි බවත්, එම කර්මාන්තශාලා සඳහා විකල්ප භාවිතයන් පිළිබඳව මේ වන විටත් සොයා බලමින් සිටින බවත් නිල වශයෙන් නිවේදනය කර ඇත.සමාගම විසින් නිකුත් කරන ලද නිවේදනයට අනුව, ඔවුන්ට දැනට වසරකට වාහන 500,000ක පමණ දැවැන්ත අතිරික්ත නිෂ්පාදන ධාරිතාවක් පවතී. මෙම අභියෝගය ජය ගැනීම සඳහා සමාගම සිය නිෂ්පාදන විවිධත්වය 50%කින් සහ සැපයුම් සංකීර්ණත්වය 75%කින් පමණ අඩු කිරීමට තීරණය කර ඇත. අඩු මාදිලි ප්රමාණයක් යටතේ වැඩි වාහන සංඛ්යාවක් නිෂ්පාදනය කරමින් පිරිවැය අවම කර ගැනීමේ අරමුණින්, ආකර්ෂණීය සහ ඉහළ තාක්ෂණයෙන් යුත් වාහන කෙරෙහි පමණක් වැඩි අවධානයක් යොමු කිරීමට ඔවුන් අපේක්ෂා කරයි. මෙම නව උපායමාර්ගය හේතුවෙන්, ඉදිරි වසර කිහිපය සඳහා නව මාදිලි හඳුන්වාදීමේ නිශ්චිත සැලසුමක් නොමැති 'සීට්' (Seat) වැනි පැරණි සන්නාමවල පැවැත්ම දැඩි අවදානමකට ලක්ව ඇති අතර, සමාගමේ ප්රධාන අවධානය ඔවුන්ගේ 'කුප්රා' (Cupra) වැනි සන්නාම වෙත යොමුව තිබේ.
"ෆියුචර් 2030" (Plan Futuro 2030) ලෙස නම් කර ඇති සමාගම් ඉතිහාසයේ මෙම ගැඹුරුම උපායමාර්ගික වෙනස සඳහා, දිගු සාකච්ඡාවලින් අනතුරුව වෘත්තීය සමිති මෙන්ම සමාගමේ ප්රධාන කොටස්කරුවෙකු වන ජර්මනියේ ලෝවර් සැක්සනි ප්රාන්ත රජයේද පූර්ණ අනුමැතිය ඒකමතිකව හිමිව ඇත. ෆොක්ස්වැගන් ප්රධාන විධායක නිලධාරී ඔලිවර් බ්ලූම් ප්රකාශ කර ඇත්තේ, මෙම තීරණය සමාගමේ අනාගතය සඳහා ඉතා ධනාත්මක පියවරක් වන අතර, ඉදිරි වසරවලදී සිය සන්නාමයන් වඩාත් ශක්තිමත් කිරීම සඳහා බිලියන ගණනක ආයෝජන සිදු කරන බවයි. ඊට සමගාමීව IG Metall වෘත්තීය සමිතියේ උප සභාපතිනි ක්රිස්ටියාන් බෙනර් සහ ලෝවර් සැක්සනි ප්රාන්තයේ අමාත්ය ජනාධිපති ඕලාෆ් ලීස් යන මහත්ම මහත්මීන් ද මෙම අර්බුදකාරී අවස්ථාවේදී ජාත්යන්තර තරගකාරීත්වයට මුහුණ දීම සඳහා ගෙන ඇති මෙම පොදු එකඟතාවයේ වැදගත්කම අවධාරණය කර ඇත.
මෙම පුළුල් සැලැස්ම හරහා 2030 වසර වන විට යුරෝ බිලියන 31ක මෙහෙයුම් ප්රතිඵලයක් සහ 9%ක ලාභ ආන්තිකයක් ළඟා කර ගැනීමට සමාගම අපේක්ෂා කරන අතර, 2027-2031 කාලය තුළ පර්යේෂණ සහ සංවර්ධන කටයුතු වෙනුවෙන් යුරෝ බිලියන 135ක් ආයෝජනය කිරීමටද සැලසුම් කර තිබේ. විශේෂයෙන්ම යුරෝපය වැනි වෙළඳපොළවල් තුළ විද්යුත් වාහන සඳහා චීන සමාගම් සමඟ තරග කිරීම සහ සාම්ප්රදායිකව ෆොක්ස්වැගන් සමාගම ආධිපත්යය දැරූ චීනය තුළ ඔවුන්ට අහිමි වෙමින් පවතින වෙළඳපොළ කොටස නැවත ගොඩනැගීම මෙම සමස්ත ක්රියාවලියේ ප්රධානතම සාධකයක් වී ඇති අතර, ඊට සමගාමීව ගෝලීය දකුණේ (Global South) රටවල් වෙත සිය අපනයන ව්යාපාරය පුළුල් කිරීමටද සමාගම පියවර ගනිමින් සිටී.
