මිද්දෙණිය, උල්හිටියාව ප්රදේශයේදී සිදුකළ වෙඩි තැබීමකින් බරපතළ තුවාල ලැබූ සංවිධානාත්මක අපරාධකරුවෙකු වන 'බැකෝ සමන්' නමැත්තාගේ මව රෝහල්ගත කිරීමෙන් පසුව මියගොස් තිබේ. අගෝස්තු 12 වනදා පස්වරුවේ යතුරුපැදියකින් පැමිණි සන්නද්ධ පුද්ගලයන් දෙදෙනෙකු විසින් නිවස ඉදිරිපිට සිටි මෙම කාන්තාව ඉලක්ක කර ගනිමින් ප්රහාරය එල්ල කර පලාගොස් ඇත.
සිද්ධියෙන් පසු බරපතළ තත්ත්වයෙන් මිද්දෙණිය ප්රාදේශීය රෝහලට ඇතුළත් කරන විටත් ඇය මියගොස් සිටි බව වාර්තා වන අතර, සිද්ධියට සම්බන්ධ සැකකරුවන් අත්අඩංගුවට ගැනීම සඳහා පොලීසිය විසින් පුළුල් විමර්ශනයක් ආරම්භ කර ඇත.නැදුන්ගොඩ නිර්මල ප්රසන්න හෙවත් 'බැකෝ සමන්' නමැත්තා ශ්රී ලංකාවේ ප්රබල මත්ද්රව්ය ජාවාරම්කරුවෙකු මෙන්ම සංවිධානාත්මක අපරාධ කල්ලි නායකයෙකු ලෙස හඳුනාගෙන තිබේ. විදේශගතව සිටිමින් දකුණු පළාත සහ මිද්දෙණිය ප්රදේශය කේන්ද්ර කරගනිමින් හෙරොයින්, අයිස් මත්ද්රව්ය මෙන්ම ගිනි අවි ජාවාරම් සහ මුදල් විශුද්ධිකරණ කටයුතු මෙහෙයවූ මොහු, 2025 වසරේදී ඉන්දුනීසියාවේ ජකර්තා නුවරදී සිදුකළ විශේෂ මෙහෙයුමකදී 'කෙහෙල්බද්දර පද්මේ', 'තැඹිලි ළහිරු', 'කමාන්ඩෝ සලින්ත' සහ 'පානදුරේ නිලංග' ඇතුළු අපරාධකරුවන් පිරිසක් සමඟ අත්අඩංගුවට ගෙන දිවයිනට රැගෙන එන ලදී.
අනුර විදානගමගේ හෙවත් 'කජ්ජා' නමැත්තා සහ ඔහුගේ දරුවන් දෙදෙනා ඝාතනය කිරීමේ සිද්ධිය සම්බන්ධයෙන්ද බැකෝ සමන්ට එරෙහිව ප්රධාන චෝදනා එල්ල වී තිබේ. 2023 වසරේදී යූටියුබ් සම්මුඛ සාකච්ඡාවකදී කජ්ජා විසින් වසීම් තජුඩීන් ඝාතනය පිළිබඳ රහස් දන්නා බව පැවසීම තමාට තර්ජනයක් වූ බවත්, සිය මත්ද්රව්ය ජාලයේ තොරතුරු හෙළි කිරීම නිසා මෙම ඝාතනය සිදුකළ බවත් ප්රශ්න කිරීම් හමුවේ ඔහු පාපොච්චාරණය කර ඇත. චෝදනාවලින් බේරීමේ උත්සාහයක් ලෙස කජ්ජාගේ බිරිඳගේ ගිණුමට රුපියල් ලක්ෂ 3.5ක් බැර කළ බව සඳහන් කළ ඔහු, දරුවන් ඝාතනය කිරීමේ අභිප්රායක් නොතිබූ බවද ප්රකාශ කර තිබුණි.
මෙම නඩුව සම්බන්ධයෙන් බැකෝ සමන් සහ තැඹිලි ළහිරු රඳවාගෙන ප්රශ්න කිරීමට අධිකරණ අවසර හිමිවූ අතර, ඔහුගේ නීති විරෝධී වත්කම් සොයා සිදුකළ විමර්ශනවලදී කෝටි 8කට වඩා වටිනා සුඛෝපභෝගී බස් රථ දෙකක් පොලිස් භාරයට ගැනුණි. එමෙන්ම මිද්දෙණිය වැලිපිටිය ප්රදේශයේ පිහිටි ඔහුගේ මස්සිනාගේ නිවසේ තිබී මයික්රෝ පිස්තෝලයක්, පතොරම් සහ හෙරොයින් ග්රෑම් 550කට අධික ප්රමාණයක් සොයාගත් අතර, මුදල් විශුද්ධිකරණ පනත යටතේ අත්අඩංගුවට පත් ඔහුගේ බිරිඳ වන ශාධිකා ලක්ෂානි පසුව ඇප මත මුදාහැරිණි.
සංවිධානාත්මක අපරාධකරු බැකෝ සමන් දැනට අත්අඩංගුවේ පසුවන පසුබිමක, ඔහුගේ මව ඉලක්ක කරගනිමින් එල්ල වූ මෙම වෙඩි ප්රහාරය පාතාල කල්ලි අතර පවතින නායකත්ව ගැටුම් හෝ පළිගැනීමේ සිදුවීමක ප්රතිඵලයක් විය හැකි බවට විමර්ශන අංශ සැක පළ කරයි.