ගෝලීය සිනමා ක්ෂේත්රය මේ වන විට ප්රවේශපත්ර අලෙවිය අතින් කැපී පෙනෙන උද්යෝගිමත් අදියරකට එළඹ ඇති අතර, මේ වසරේ සමස්ත ගෝලීය බොක්ස් ඔෆීස් ආදායම 2025 වසරට වඩා සියයට 7 ක වර්ධනයක් පෙන්වමින් ඩොලර් බිලියන 35 ක් දක්වා ඉහළ යනු ඇතැයි විශ්ලේෂකයෝ පුරෝකථනය කරති. කොවිඩ් වසංගතයට පෙර පැවති මට්ටමට වඩා සමස්ත ටිකට් අලෙවිය තවමත් යම් පමණකට අඩු අගයක පැවතුණද, චිත්රපට පහක් මේ වන විටත් ගෝලීය වශයෙන් ඩොලර් බිලියනය ඉක්මවූ ආදායම් ලබා ඇති අතර තවත් චිත්රපට තුනක් ඩොලර් මිලියන 500 සීමාව පසුකර තිබේ.
ඉදිරියේදී තිරගත වීමට නියමිත "Avengers: Doomsday" සහ "Dune: Part Three" වැනි දැවැන්ත චිත්රපට හරහා සිනමාහල් වෙත තවදුරටත් අතිවිශාල ප්රේක්ෂක පිරිසක් ආකර්ෂණය වනු ඇතැයි අපේක්ෂා කෙරේ.මෙම සිනමා පුනර්ජීවනය පිටුපස සිටින ප්රධාන බලවේගය වන්නේ තරුණ ජෙනරේෂන් ඉසෙඩ් (Gen Z) පරම්පරාවයි. ජෙනරේෂන් ඉසෙඩ් සහ මිදෙන්නියල් පරම්පරාවන් නිවෙස්වලට වී නෙට්ෆ්ලික්ස් (Netflix), යූටියුබ් (YouTube) හෝ ටික්ටොක් (TikTok) නැරඹීමට පෙළඹීම නිසා සිනමාහල්වල පැවැත්ම තර්ජනයට ලක්වනු ඇතැයි මීට පෙර මත පළවූ අතර, ෆැන්ඩැන්ගෝ (Fandango) සමීක්ෂණයකට අනුව 2025 වසරේදී ඇමෙරිකාවේ ජෙනරේෂන් ඉසෙඩ් තරුණ තරුණියන්ගෙන් සියයට 90 කට ආසන්න පිරිසක් සිනමාහල් වෙත ගොස් ඇත. ඔවුන් පසුගිය වසරේ සාමාන්යයෙන් 7 වතාවක් සිනමාහල් වෙත ගොස් ඇති අතර, එය ජෙනරේෂන් එක්ස් (6.1 වතාවක්) සහ බේබි බූමර්ස් (5.7 වතාවක්) පරම්පරාවන්ට වඩා ඉහළ අගයකි. ජූලි 31 වන දින තිරගත වූ "Spider-Man: Brand New Day" චිත්රපටය උතුරු ඇමෙරිකාවේ පළමු සති අන්තයේදී ඩොලර් මිලියන 360 ක ආදායමක් ලබමින් 2019 වසරේ "Avengers: Endgame" තැබූ වාර්තාව අභිබවා ගිය අතර, එම ආරම්භක සති අන්තයේ ප්රේක්ෂකයින්ගෙන් තුනෙන් දෙකක්ම වයස අවුරුදු 18 ත් 34 ත් අතර පසුවූවන් වූ අතර මෙම චිත්රපටය ගෝලීය වශයෙන් ඩොලර් බිලියන 1.7 කට වඩා උපයා ඇත.
තරුණ ප්රේක්ෂකාගාරය ආකර්ෂණය වන්නේ සුපිරි වීර චිත්රපට සඳහා පමණක් නොවන අතර, සර් ක්රිස්ටෝෆර් නෝලන්ගේ "The Odyssey", "The Drama", "Project Hail Mary" සහ "Wuthering Heights" වැනි විවිධ ශානරවල චිත්රපට සඳහාද විශාල තරුණ උනන්දුවක් නිර්මාණය වී ඇත. 26 හැවිරිදි අධ්යක්ෂවරයෙකු විසින් නිර්මාණය කරන ලද "Obsession" නැමැති භීෂණ (horror) චිත්රපටය, එහි පිරිවැය මෙන් 650 ගුණයකට වඩා වැඩි ආදායමක් ලබමින් ගෝලීය බොක්ස් ඔෆීස් හි ඩොලර් මිලියන 490 ක් උපයා ගැනීමට සමත් විය. මෙම ප්රවණතාව බටහිර රටවලට පමණක් සීමා නොවී, ඉන්දියාවේ හින්දි බොක්ස් ඔෆීස් ආදායමෙන් අඩකට වඩා වයස අවුරුදු 30 ට අඩු තරුණයින්ගෙන් ලැබෙන අතර, සවුදි අරාබියේ සිනමා නැරඹුම්කරුවන්ගෙන් තුනෙන් දෙකක්ම වයස අවුරුදු 34 ට අඩු අය වෙති. වියට්නාමයේ එම අගය සියයට 90 ක් දක්වා ඉහළ යන අතර, ජපානයේ "Demon Slayer: Infinity Castle" ඇනිමේ චිත්රපටය එරට ඉතිහාසයේ හොඳම ආරම්භක සති අන්ත ආදායම වාර්තා කිරීමටද තරුණ ප්රේක්ෂකයින් විශාල ලෙස සිනමාහල් වෙත රොක් වීම හේතු විය.
සිනමාව කෙරෙහි තරුණ පරපුරේ මෙම නැඹුරුව ප්රවර්ධනය කිරීමට සමාජ මාධ්ය ප්රබල පිටුවහලක් වී ඇති අතර, යුරෝපීය තරුණයින්ගෙන් අඩකට ආසන්න පිරිසක් ටික්ටොක් හරහා අලුත් චිත්රපට හඳුනා ගනිති. 2022 වසරේදී "Minions: The Rise of Gru" චිත්රපටය නැරඹීමට කූට් කට්ටල පැළඳ පැමිණි "GentleMinions" රැල්ල මෙන්ම 2025 වසරේ "A Minecraft Movie" තිරගත කිරීම් අතරතුර ප්රේක්ෂකයින් කෑගසමින් අසුන්වලින් නැගිටීම වැනි වෛරල් ප්රවණතාද මෙයට උදාහරණ වේ. චිත්රපට නැරඹීම සටහන් කරන සහ විචාර හුවමාරු කරගන්නා Letterboxd යෙදවුමේ පරිශීලකයින් සංඛ්යාව මිලියන 30 දක්වා වැඩි වී ඇති අතර, එහි වැඩිම ක්රියාකාරී පරිශීලකයින් වන්නේ වයස අවුරුදු 18-24 අතර තරුණයින්ය. සිනමා දත්ත විශ්ලේෂක ස්ටීවන් ෆොලෝස් පවසන පරිදි, සිනමාව වටා වූ සංස්කෘතිය නැවත වරක් තරුණ සංස්කෘතියක් බවට පත්ව ඇත.
ජෙනරේෂන් ඉසෙඩ් පරම්පරාව සිනමාව සලකන්නේ මිතුරන් සමඟ එකතුව අත්විඳින විශේෂ සමාජීය උත්සවයක් ලෙස වන අතර, රාත්රී ආහාර හෝ පාන වර්ග සඳහා යොමු වෙමින් ඔවුන් සිනමා නරඹන සන්ද්යාව තවත් විශේෂ කර ගනිති. විශේෂිත පොප්කෝන් බාල්දි සහ පහසු අසුන් (reclining seats) සඳහා වැඩිපුර මුදල් වියදම් කිරීමට ඔවුන් පෙළඹී ඇති අතර, ඇමෙරිකානු සිනමා ජාලයක් වන AMC හි එක් ප්රේක්ෂකයෙකුගෙන් ලැබෙන ආදායම 2026 දෙවන කාර්තුවේදී 2019 සමාන කාර්තුවට වඩා සියයට 44 කින් (මුදල් උද්ධමනයට ගැළපූ විට සියයට 11 කින්) ඉහළ ගොස් ඇත. කුඩා ජංගම දුරකථන තිර දිගේ නොනවත්වා ඇඟිලි යැවීමෙන් මිදී, ඇමෙරිකානු ලේඛිකා සුසාන් සොන්ටැග් වරක් විස්තර කළ පරිදි අඳුරු සිනමාහලක් තුළ නොදන්නා පිරිසක් අතර අසුන්ගෙන "සිනමාපටය මඟින් පැහැරගනු ලැබීමේ" ඇනලොග් ආශ්වාදය විඳගැනීමට වර්තමාන තරුණ පරපුර දැඩි කැමැත්තක් දක්වති.
(ද ඉකොනොමිස්ට් ඇසුරිනි)