ලෝක පාපන්දු පාලක මණ්ඩලය වන ෆීෆා (FIFA) හි සභාපති ජියානි ඉන්ෆැන්ටිනෝ විසින් ලෝක කුසලාන තරගාවලියේ කොටස් පෞද්ගලික ආයෝජකයන් වෙත අලෙවි කිරීමට සූදානම් කළ ආන්දෝලනාත්මක යෝජනාව අත්හැර දැමීමට තීරණය කර තිබේ. ලොව පුරා පාපන්දු පරිපාලන ආයතන සහ සංගම්වලින් එල්ල වූ දැඩි විරෝධය හමුවේ මෙම සැලසුම ක්රියාත්මක නොකරන බව ඔහු නිල වශයෙන් ප්රකාශ කළේය.
මෙම ආයෝජන ව්යාපෘතිය මගින් පාපන්දු ක්ෂේත්රය තුළ මතභේද සහ බෙදීම් නිර්මාණය වූ බවත්, එය ආරම්භක අරමුණු ඉටු කර ගැනීමට බාධාවක් වූ බැවින් යෝජනාව ඉදිරියට ගෙන නොයන බවත් ඉන්ෆැන්ටිනෝ සඳහන් කර ඇත. The Guardian හි වාර්තාවලට අනුව, පාපන්දු ක්රීඩාව එක්සත් කිරීම සහ සංවර්ධනය කිරීම සැමවිටම සිය මූලික අරමුණ වූ බව ෆීෆා සභාපතිවරයා වැඩිදුරටත් පවසා තිබේ.ඉන්ෆැන්ටිනෝ ඉදිරිපත් කළ මෙම යෝජනාවට අනුව, පිරිමි සහ කාන්තා ලෝක කුසලාන ඇතුළු ප්රධාන තරගාවලි පාලනය කිරීම සඳහා 'ෆීෆා ෆෝවර්ඩ් එන්ටර්ප්රයිස්' (FFE) නමින් අනුබද්ධ වාණිජ සමාගමක් පිහිටුවීමට සැලසුම් කර තිබුණි. මෙම නව ආයතනයේ සුළුතර කොටස් පෞද්ගලික ආයෝජකයන්ට අලෙවි කිරීම තුළින් ඇමරිකානු ඩොලර් බිලියන ගණනක අරමුදල් රැස් කිරීමට අපේක්ෂා කෙරිණි. මීට සහාය පළ කරන ලෙස ඉල්ලමින් ෆීෆා සාමාජික සංගම් 211 වෙත ඇමරිකානු ඩොලර් මිලියන 40 ක මුදලක් ලබා දෙන බවටද යෝජනා කර තිබූ අතර, සැප්තැම්බර් 19 වනදාට පෙර ඊට එකඟතාව පළ කළ යුතු බවට කාලසීමාවක්ද පනවා තිබුණි.
කෙසේ වෙතත්, මෙම පෞද්ගලික ආයෝජන සැලසුමට එරෙහිව යුරෝපීය පාපන්දු පාලක මණ්ඩලය වන UEFA ප්රමුඛව දැඩි විරෝධයක් එල්ල විය. මෙම යෝජනාව ක්රියාත්මක කළහොත් ඉදිරි ලෝක කුසලාන තරගාවලි වර්ජනය කරන බවට UEFA සංගමය තර්ජනය කළේය. ඊට අමතරව උතුරු හා මධ්යම ඇමරිකානු පාපන්දු සංගමය (Concacaf) සහ ආසියානු පාපන්දු සම්මේලනය (AFC) ද මෙම සැලසුම සෘජුවම ප්රතික්ෂේප කරමින් UEFA සංගමය සමග අත්වැල් බැඳගත්තේය. බ්රිතාන්ය අගමැති ඇන්ඩි බර්න්හැම් ද ඉන්ෆැන්ටිනෝගේ මෙම පියවර විවේචනය කරමින් කියා සිටියේ ඔහු ෆීෆා සංවිධානය මෙහෙයවීමට සුදුසු පුද්ගලයා නොවන බවයි.
ෆීෆා සංවිධානය තුළින්ම ද මෙම යෝජනාවට එරෙහිව දැඩි විරෝධයක් මතුවූ අතර ඉන්ෆැන්ටිනෝගේ ජ්යෙෂ්ඨ උපදේශක කාර්ලෝස් කෝඩෙයිරෝ සිය ධුරයෙන් ඉල්ලා අස්විය. මෙම යෝජනාව පාපන්දු ක්රීඩාවේ අනාගතය පාවාදීමක් බවත් එය ඉතා අහිතකර ගිවිසුමක් බවත් ඔහු සඳහන් කළේය. එමෙන්ම ෆීෆා හි ප්රධාන මෙහෙයුම් නිලධාරී කෙවින් ලැමූර් චෝදනා කළේ පාලක මණ්ඩලයේ පරිපාලනය මෙම ව්යාපෘතිය මගින් මුලා කර ඇති බවයි. Football 360 වාර්තාවලට අනුව, මෙම යෝජනාව සම්මත කර ගැනීමට සාමාජික සංගම් 106 කගේ සහාය අවශ්ය වූ නමුත් මහාද්වීපික සංගම් කිහිපයක්ම ඊට එරෙහි වීමත් සමග යෝජනාව පරාජයට පත්වීම ස්ථිර විය.
මෙම ආන්දෝලනාත්මක යෝජනාව මෙහෙයවීම සඳහා තෝරාගෙන තිබුණේ ජෝෂුවා කුෂ්නර් විසින් ආරම්භ කරන ලද 'ත්රයිව් ඉටර්නල්' නම් ඇමරිකානු ආයෝජන සමාගමයි. ලබන වසරේ මාර්තු මාසයේදී පැවැත්වෙන ෆීෆා කොංග්රසයේදී සිව්වන වරටත් සභාපති ධුරයට තරග කිරීමට අපේක්ෂාවෙන් සිටින ජියානි ඉන්ෆැන්ටිනෝට මෙම සිදුවීමත් සමග දැඩි දේශපාලන සහ පරිපාලනමය බලපෑමක් එල්ල වී තිබේ. එළඹෙන දිනවලදී පාපන්දු ක්ෂේත්රයේ සියලු පාර්ශවකරුවන් නැවත එක්රැස් කරමින් සාකච්ඡා මාර්ගයෙන් ඉදිරි පියවර ගැනීමට බලාපොරොත්තු වන බව ඉන්ෆැන්ටිනෝ පවසා ඇත.