ඉන්දියාවේ නැගෙනහිර ජාර්කන්ඩ් ප්රාන්තයේ රාජ්ය සේවා පත්වීම් පරීක්ෂණ ක්රමවේදයේ ප්රතිසංස්කරණ ඉල්ලා සිටින විරෝධතාකරුවන් විසිරුවා හැරීම සඳහා පොලිසිය විසින් කඳුළු ගෑස් සහ ජල ප්රහාර එල්ල කර තිබේ. ප්රාන්ත අගනුවර වන රාංචි හි පිහිටි ව්යවස්ථාදායක සභාව දෙසට පෙළපාලියෙන් ගමන් කිරීමට උත්සාහ කළ දහස් සංඛ්යාත සිසුන්, රැකියා අපේක්ෂකයින් සහ ස්වේච්ඡා සංවිධාන නියෝජිතයින් පාලනය කිරීම සඳහා පොලිසිය මෙම පියවර ගෙන ඇත.
මෙම සිදුවීම් අතරතුර කිහිප දෙනෙකු තුවාල ලබා ඇති බව වාර්තා වන අතර, තුවාල ලැබූවන්ගේ නිල සංඛ්යාව මෙතෙක් තහවුරු වී නොමැත.ජාර්කන්ඩ් රාජ්ය සේවා කොමිෂන් සභාව (JPSC) සහ ජාර්කන්ඩ් කාර්ය මණ්ඩල තේරීම් කොමිෂන් සභාව (JSSC) මගින් පවත්වනු ලබන රාජ්ය විභාග පද්ධතිය සම්පූර්ණයෙන්ම ප්රතිසංස්කරණය කරන ලෙස ඉල්ලමින් විරෝධතාකරුවන් සති දෙකකට වැඩි කාලයක සිට අඛණ්ඩව අරගලයක නිරත වෙති. පොලිස් මාර්ග බාධක කඩාගෙන ඉදිරියට යාමට විරෝධතාකරුවන් දැරූ උත්සාහයේදී, පිරිස විසිරුවා හැරීම සඳහා බැටන් ප්රහාර, ජල ප්රහාර සහ කඳුළු ගෑස් ප්රහාර එල්ල කිරීමට සිදුවූ බව බලධාරීහු පවසති. විරෝධතාවට එක්වූවන්ගෙන් සියයට 90ක් පමණ සාමකාමීව හැසිරුණු නමුත්, කුඩා කණ්ඩායමක් මාර්ග බාධක කඩාදමමින් නිලධාරීන්ට ගල් ප්රහාර එල්ල කළ බව රාංචි නගරයේ ජ්යෙෂ්ඨ පොලිස් අධිකාරී පරස් රානා ප්රකාශ කළ අතර, එම ප්රහාරවලින් පොලිස් නිලධාරීන් තිදෙනෙකු තුවාල ලබා ඇත.
විරෝධතාකරුවන් සිසුන් බැවින් පොලිසිය ඉතා ඉවසීමෙන් කටයුතු කළ බවත්, ඉතා කෙටි කාලයකට අවම බලයක් පමණක් භාවිතා කළ බවත් පෙන්වා දෙන පොලිස් අධිකාරීවරයා, ඔවුන්ගේ ඉල්ලීම් රජයට යොමුවෙමින් පවතින බැවින් සාමකාමීව සිටින ලෙස ඉල්ලීමක් කළේය. විභාග ප්රශ්න පත්ර පිටවීමේ සිද්ධීන් මුල්කරගනිමින් නව දේලි නුවර ජාතික පාර්ලිමේන්තුව දෙසට දහස් සංඛ්යාත තරුණයින් ගමන් කිරීමට උත්සාහ කිරීමෙන් සති කිහිපයකට පසුව මෙම ජාර්කන්ඩ් විරෝධතාව උග්ර වී තිබේ. රට පුරා සිසුන්ගේ සහයෝගය ලැබූ සහ දේශපාලන පක්ෂයක් නොවන "කොක්රෝච් ජනතා පාර්ශවය" (CJP) විසින් දියත් කරන ලද සති පහක විරෝධතාව, අධ්යාපන අමාත්ය ධර්මේන්ද්ර ප්රධාන් ඉල්ලා අස්වීමෙන් පසුව ජූලි 25 වන දින අත්හිටුවන ලදී.
රාංචි නගරයේ තත්ත්වය පිළිබඳ දර්ශනවලට අනුව දහස් සංඛ්යාත විරෝධතාකරුවන්, පොලිසිය සහ මාධ්යවේදීන් වීදිවල රැඳී සිටින අතර ප්රදේශයේ ආරක්ෂාව තදින් තර කර ඇත. විසිර යන ලෙස පොලිසිය කළ ඉල්ලීම් හමුවේ වුවද විශාල පිරිසක් ස්ථානයෙන් ඉවත් නොවී අඛණ්ඩව රැඳී සිටිති. ඉකුත් ජූලි 25 වන දින සිට රාංචි හි ක්රීඩාංගණයකට රැස්වූ ජාර්කන්ඩ් විරෝධතාකරුවන්ගෙන් ඇතැම් පිරිස් එළිමහනේ රාත්රිය ගතකරන අතර තවත් කිහිප දෙනෙකු උපවාසයක ද නිරත වෙති.
රජය සමඟ කිහිප වතාවක් පැවැති සාකච්ඡාවලදී ඉල්ලීම් කිහිපයකට එකඟතාව පළ කර තිබුණද, සියලු ඉල්ලීම් ඉටුවන තෙක් අරගලය නතර නොකරන බව විරෝධතාකරුවෝ අවධාරණය කරති. ඉකුත් අප්රේල් මාසයේදී ජාර්කන්ඩ් රාජ්ය සේවා කොමිෂන් සභාව (JPSC) මගින් පවත්වන ලද මූලික සිවිල් සේවා විභාගය මෙම විරෝධතාවලට ක්ෂණික හේතුව වී තිබේ. ජූලි මාසයේදී විභාග ප්රතිඵල නිකුත් කිරීමෙන් පසුව, සමාජ මාධ්ය ඔස්සේ හුවමාරු වූ පිළිතුරු පත්ර මගින් හෙළිවූයේ සමත් වූ ඇතැම් අයදුම්කරුවන් බලාපොරොත්තු වූවාට වඩා ඉතා අඩු ප්රශ්න සංඛ්යාවකට පිළිතුරු සපයා තිබූ බවයි. මේ හේතුවෙන් විභාග ප්රතිඵල සම්බන්ධයෙන් විශාල සැකයක් සහ විරෝධයක් ගොඩනැගුණි.
සිසුන්ට සාධාරණය ඉටුකරන බවට ප්රාන්ත රජය සහතික වී ඇති අතර, විභාග අක්රමිකතා පිළිබඳ පරීක්ෂණ ජාර්කන්ඩ් අපරාධ පරීක්ෂණ දෙපාර්තමේන්තුව (CID) මගින් සිදු කරයි. එම පරීක්ෂණවලට අදාළව දැනට පුද්ගලයින් දොළොස් දෙනෙකුට වැඩි පිරිසක් අත්අඩංගුවට ගෙන ඇත. විභාග ක්රියාවලියේ ඇතැම් කොටස් මෙහෙයවූ පෞද්ගලික සමාගම තෝරාගත් ආකාරය පිළිබඳව ද සිසුන් ප්රශ්න කර ඇති බැවින්, ඒ සම්බන්ධයෙන් ද පරීක්ෂකයන්ගේ අවධානය යොමුව තිබේ.
විරෝධතාකරුවන් සමඟ ඉරිදා පැවැති සාකච්ඡාවලින් පසුව, අදාළ විභාගය සහ තවත් විභාග දෙකක් අහෝසි කිරීමට රජය එකඟ විය. එමෙන්ම JPSC හි සාමාජිකයින් තිදෙනෙකු ද ඉල්ලා අස්වූ අතර, ඊට පෙර ජූලි 22 වන දින එහි සභාපති එල්. ඛියාංතේ තනතුරෙන් ඉල්ලා අස්විය. විමර්ශනවලට ලක්වූ හිටපු සභාපතිවරයා සඳුදා දිනයේදී අත්අඩංගුවට ගන්නා ලදී. කෙසේ වෙතත්, ඉන්දියාවේ ප්රධාන ෆෙඩරල් විමර්ශන ඒජන්සිය වන මධ්යම විමර්ශන කාර්යාංශය (CBI) හරහා මෙම අක්රමිකතා පිළිබඳ පරීක්ෂණයක් පැවැත්වීම ඇතුළු ප්රධාන ඉල්ලීම් කිහිපයක් තවමත් ඉටුවී නොමැති බව විරෝධතාකරුවෝ පවසති.
දේශපාලන මැදිහත්වීම්වලින් තොරව ආරම්භ වූ කොක්රෝච් ජනතා පාර්ශවයේ විරෝධතාවට වඩා වෙනස්ව, රාංචි හි පැවැත්වෙන මෙම අරගලයට ප්රබල දේශපාලන සහයෝගයක් හිමිව තිබේ. ජාර්කන්ඩ් ප්රාන්තයේ විපක්ෂය වන භාරතීය ජනතා පක්ෂය (BJP) විරෝධතාකරුවන්ට සහය පළ කරමින්, පෙළපාලි පවත්වමින් සහ ප්රාන්ත සභාවේදී මෙම පුවත මතු කරමින් ෆෙඩරල් විමර්ශනයක් ඉල්ලා සිටියි. ප්රාන්ත රජයේ පාර්ශවකරුවෙකු වන නමුත් මධ්යම මට්ටමේදී BJP හි ප්රධාන ප්රතිවාදියා වන කොංග්රස් පක්ෂය ද සිසුන් වෙනුවෙන් සහය පළ කර ඇත. ජාර්කන්ඩ් මුක්ති මෝර්චා (JMM) පක්ෂයේ නායක සහ ප්රාන්ත මහ ඇමති හේමන්ත් සෝරන් චෝදනා කරන්නේ ඇතැම් පිරිස් ප්රාන්තයේ ප්රජාතන්ත්රවාදය කඩාකප්පල් කිරීමට උත්සාහ කරන බවයි. මෙම සිසු අරගලය දේශපාලනීකරණය නොකළ යුතු බවට හෙතෙම අනතුරු අඟවා සිටින අතර, සාධාරණය ඉටු කිරීමට පියවර ගන්නා බවට වූ පොරොන්දුව නැවත අවධාරණය කළේය.
