මහ බැංකු බැඳුම්කර වංචාව සම්බන්ධයෙන් අධිකරණයට අවශ්ය කර සිටින හිටපු මහ බැංකු අධිපති අර්ජුන මහේන්ද්රන් මහතා සිය නීත්යනුකූල නාමය ‘හර්ජාන් ඇලෙක්සැන්ඩර්’ ලෙස වෙනස් කරගෙන ඇති බව අනාවරණය වී තිබේ. රූපවාහිනී මාධ්ය සාකච්ඡාවකට එක්වෙමින් මහජන ආරක්ෂක හා පාර්ලිමේන්තු කටයුතු අමාත්ය ආනන්ද විජේපාල මහතා සඳහන් කළේ, සැකකරු නැවත ශ්රී ලංකාවට ගෙන ඒම සඳහා විකල්ප නීතිමය මාර්ග හා වෙනත් උපක්රමශීලී ක්රමවේද පිළිබඳ බලධාරීන්ගේ අවධානය යොමු වී ඇති බවයි.
අපරාධ පරීක්ෂණ දෙපාර්තමේන්තුවට ලැබී ඇති තොරතුරුවලට අනුව, ජාත්යන්තර පොලීසිය මඟින් අර්ජුන මහේන්ද්රන් මහතාට එරෙහිව රතු නිවේදනයක් නිකුත් කිරීමට කටයුතු කිරීමත් සමඟ ඔහු මෙලෙස සිය නම වෙනස් කරගෙන ඇත. සිංගප්පූරු පුරවැසියකු වන ඔහු එරට නීතිමය ප්රතිපාදන අනුව වෙනත් රටකට උදර්පණය කිරීමේ බාධා පැවතියද, අදාළ නීතිමය ක්රියාමාර්ග අඛණ්ඩව සිදුකරමින් ඔහුව මෙරටට ගෙන්වා ගැනීමට අවශ්ය කටයුතු සම්පාදනය කරමින් සිටින බව අමාත්යවරයා වැඩිදුරටත් පැහැදිලි කළේය.
2015 වසරේ සිදුවූ මෙම මහ බැංකු බැඳුම්කර සිදුවීමෙන් රජයට රුපියල් බිලියන දහයකට අධික පාඩුවක් සිදුකළ බවට අර්ජුන මහේන්ද්රන් මහතා ඇතුළු පිරිසකට එරෙහිව නඩුව පවරා තිබේ. පවතින නඩු විභාගය ඉදිරියටම පවත්වාගෙන යන අතරතුර ඊට අදාළ තොරතුරු රැසක්ද මේ වන විට හෙළිදරව් වෙමින් පවතින බව අමාත්යවරයා පෙන්වා දුන්නේය.
මෙම නඩු කටයුත්තට අදාළව අර්ජුන මහේන්ද්රන් මහතා සම්බන්ධයෙන් නිසි නීතිමය පියවර ගෙන සිතාසි ක්රියාත්මක කර ඒ පිළිබඳ වාර්තාවක් ඉදිරිපත් කරන ලෙස කොළඹ ප්රධාන මහේස්ත්රාත් අසංග එස්. බෝදරගම මහතා විසින් අල්ලස් කොමිසමට නියෝග කර ඇත. ඒ අනුව අදාළ බැඳුම්කර නඩුව නැවත කැඳවීමට නියමිතව ඇත්තේ එළඹෙන ඔක්තෝබර් 30 වැනිදාය.