විනිශ්චයකාරවරුන්ගේ විශ්රාම යාමේ වයස දීර්ඝ කිරීමේ යෝජනාව අධිකරණයේ පවතින නඩු කටයුතු ප්රමාදය විසඳීම සඳහා ගත් පරිපාලනමය පියවරක් බවට රජය කරන ප්රකාශය විශ්වාස කළ නොහැකි බවත්, එය පිළිගත නොහැකි බවත් දෙමළ ප්රගතිශීලී සන්ධානයේ (TPA) නායක, සමගි ජන බලවේගයේ පාර්ලිමේන්තු මන්ත්රී සහ හිටපු අමාත්ය මනෝ ගනේෂන් මහතා පවසයි. නඩු ප්රමාදය අලලා අධිකරණයේ සංයුතිය වෙනස් කිරීමට උත්සාහ කිරීම අධිකරණ ප්රතිසංස්කරණයක් නොවන අතර, මෙය ආණ්ඩුක්රම ව්යවස්ථාව අභිමත පරිදි හසුරුවමින් දේශපාලන අරමුණු ඉටු කර ගැනීමට දරන උත්සාහයක් බව ද ඔහු අවධාරණය කරයි.
අධිකරණ පද්ධතියේ පවතින ප්රමාදයන් අවස්ථාවක් කර ගනිමින් අධිකරණයේ ස්වාධීනත්වය හීන කිරීමට දැරෙන මෙම ප්රයත්නය නීතියේ ආධිපත්යයට එරෙහි කුමන්ත්රණයක් බවත්, අධිකරණ නඩු ප්රමාදයන්ට විසඳුම් සෙවීම අත්යවශ්ය සහ හදිසි කාර්යයක් බවත් මන්ත්රීවරයා සඳහන් කරයි.නඩු ප්රමාදයන් සඳහා ප්රධාන හේතු වන්නේ පරිපාලනමය අකාර්යක්ෂමතාව, ප්රමාණවත් තරම් කාර්ය මණ්ඩලයක් නොසිටීම, අනුමත පටිපාටිවල ප්රමාදයන් සහ සම්පත් හිඟකම මිස විනිසුරුවරුන්ගේ විශ්රාම වයස නොවන බවත්, මේ සඳහා ප්රායෝගික විසඳුම් ඇතුළත් යෝජනා මහේස්ත්රාත්වරුන්, අධිකරණ සේවා සාමාජිකයන් සහ නීතිඥයන් විසින් අධිකරණ අමාත්යාංශය වෙත ඉදිරිපත් කර ඇති බවත් මනෝ ගනේෂන් මහතා පෙන්වා දෙයි. එම වෘත්තීය යෝජනා ක්රියාත්මක කිරීමට පියවර ගන්නවා වෙනුවට, පරිපාලනමය ගැටලුවක් මුවාවෙන් අධිකරණ ස්වාධීනත්වයට තර්ජනයක් වන පරිදි ව්යවස්ථාපිත වෙනස්කම් කිරීමට රජය සැරසෙන බවට ඔහු චෝදනා කරයි. එමෙන්ම, මෙම විවේචන විපක්ෂයේ දේශපාලන උප්පරවැට්ටියක් ලෙස හමුකිරීමට රජය දැරූ උත්සාහයත්, පරීක්ෂණවලට ලක්ව සිටින හෝ ඇප මත සිටින දේශපාලනඥයන් පමණක් මීට එරෙහි වන බවට පැවසූ කතාවත් මේ වන විට සම්පූර්ණයෙන්ම බිඳ වැටී ඇති බව ඔහු පවසයි.
සාමාජිකයන් 30,000 කට ආසන්න සංඛ්යාවක් නියෝජනය කරන ශ්රී ලංකා නීතිඥ සංගමය (BASL) ද මෙම යෝජනාව නිල වශයෙන් ප්රතික්ෂේප කර ඇති අතර, දේශපාලන භේදයකින් තොරව ප්රමුඛ පෙළේ නීතිඥයන් සහ ආයතන එක්ව මීට එරෙහි වීම හමුවේ රජයට තවදුරටත් දේශපාලන මතවාද පිටුපස සැඟවී සිටීමට නොහැකි බව හිටපු අමාත්යවරයා පෙන්වා දෙයි. දූෂණ පරීක්ෂණ නතර කරන ලෙස හෝ සැකකරුවන් අත්අඩංගුවට නොගන්නා ලෙස කිසිවකු ඉල්ලා නොසිටින බවත්, දූෂණය පිළිබඳව විධිමත් ලෙස පරීක්ෂණ පවත්වා වැරදිකරුවන්ට නීතිය ක්රියාත්මක කළ යුතු බවත් සඳහන් කරන මනෝ ගනේෂන් මහතා, නමුත් නීතිය සැමට එක ලෙස ක්රියාත්මක විය යුතු බව පවසයි.
රජය සැබැවින්ම දූෂණය සහ අපරාධ මර්දනයට කැපවී සිටින්නේ නම්, එම පරීක්ෂණ තේරූ අයට පමණක් සීමා නොවිය යුතු බවත්, අමාත්ය වසන්ත සමරසිංහ, නියෝජ්ය අමාත්ය මහින්ද සමරසිංහ, කඩුවෙල එන්.පී.පී. නගරාධිපති රංජන් ජයලාල් යන මහත්වරුන්ට එරෙහි චෝදනා මෙන්ම කන්ටේනර් 300 කට වැඩි ප්රමාණයේ සිද්ධිය, ගල්අඟුරු මිලදී ගැනීමේ වංචාව, ඩොලර් මිලියන 2.5 ක මුදලක් අතුරුදහන් වීම සහ අල්ලස් හෝ දූෂණ චෝදනා විමර්ශන කොමිෂන් සභාවට හා අපරාධ පරීක්ෂණ දෙපාර්තමේන්තුවට ඉදිරිපත් කර ඇති පැමිණිලි සම්බන්ධයෙන් ද එම පරීක්ෂණ පැවැත්විය යුතු බවත් ඔහු පෙන්වා දෙයි.
රජයේ සැබෑ අරමුණ දූෂණය මර්දනය කිරීම නොව තම දේශපාලන අභිමතාර්ථයන්ට අනුකූල වන පරිදි අධිකරණයේ ස්වාධීනත්වයට අතපෙවීම බවට හිටපු අමාත්යවරයා චෝදනා කරයි. ස්වාධීන ආයතන ක්රමයෙන් දුර්වල කරමින් බලය ඒකරාශී කර ගැනීමේ පුළුල් දේශපාලන වැඩපිළිවෙළක කොටසක් ලෙස මෙය හැඳින්වූ ඔහු, මෙය "උතුරු කොරියානු මාදිලියේ" එක් පක්ෂ ඒකාධිපති දේශපාලන ව්යාපෘතියක් බවට තමන් මීට පෙර ද කළ ප්රකාශය මතක් කර දෙයි. අතීතයේදී හිටපු විධායක ජනාධිපති මහින්ද රාජපක්ෂ මහතා හිටපු අග්රවිනිශ්චයකාර ශිරාණි බණ්ඩාරනායක මහත්මියට එරෙහිව කටයුතු කළ අවස්ථාවේදී "අධිකරණයට අත නොතබනු" යන තේමාව යටතේ පැවැති අරගලයේ තමන් සමඟ ඉදිරියෙන්ම සිටියේ වත්මන් ජනාධිපති අනුර කුමාර දිසානායක මහතා බවත්, නමුත් අද වන විට දෙදෙනාගේ මාවත් වෙනස් වී ඇති බවත් මනෝ ගනේෂන් මහතා සඳහන් කරයි.
ආණ්ඩු මාරු වුවද තමන් නිරන්තරයෙන් එකම ව්යවස්ථාපිත ප්රතිපත්ති වෙනුවෙන් පෙනී සිටි බව සඳහන් කරන මන්ත්රීවරයා, මෙම පනත් කෙටුම්පත පාර්ලිමේන්තුවේ තුනෙන් දෙකක බහුතරයකින් පමණක් සම්මත කර නීතියක් බවට පත් කළ නොහැකි බවත්, ඊට ජනමත විචාරණයක අනුමැතිය අවශ්ය විය හැකි බවට ව්යවස්ථා විශාරදයන් තර්ක කරන බවත් පෙන්වා දෙයි. ජනමත විචාරණයක් අවශ්යද නැද්ද යන්න පිළිබඳ තීරණය කිරීමට සිදුවන්නේ යෝජිත ධුර කාලය දීර්ඝ කිරීමේ වාසිය ඍජුවම හිමිවන ශ්රේෂ්ඨාධිකරණ විනිසුරුවරුන්ටම වීම හාස්යජනක කරුණක් බවත්, ශ්රේෂ්ඨාධිකරණ තීන්දුවක් තෙක් නොසිට ජනමත විචාරණයක් සඳහා මෙය ඍජුවම ජනතාව හමුවට තැබීමට ආණ්ඩුක්රම ව්යවස්ථාවෙන් ජනාධිපතිවරයාට බලය ඇති බැවින්, ජනාධිපති අනුර කුමාර දිසානායක මහතා එම ව්යවස්ථාපිත බලතල භාවිතා කළ යුතු බවත් මනෝ ගනේෂන් මහතා වැඩිදුරටත් අවධාරණය කරයි.