ගල්ගමුව, කොහොබන්කුලම ප්රදේශයේ පදිංචි ඩී. එම්.කීර්තිසේන නමැති අයෙකු බන්ධනාගාරය තුළදී මියගිය බවට
පොලීසිය විසින් කරන ලද දැනුම්දීමකින් පසුව, ඔහු වෙනුවෙන් අවමංගල්ය සංවිධානය කරමින් සිටියදී අදාළ පුද්ගලයා පණපිටින් නිවසට පැමිණීමේ පුවතක් වාර්තා වේ.වාරියපොල බන්ධනාගාරයේ රඳවා සිටි කීර්තිසේන මහතා මියගොස් ඇති බවට නාන්නේරිය පොලීසිය විසින් ඥාතීන්ට පවසා තිබුණි. මෙම හදිසි පණිවිඩයෙන් දැඩි සංවේගයට පත් ඥාතීන් සහ ප්රදේශවාසීන් එකමුතුව අවසන් කටයුතු සංවිධානය කිරීමට වහා පියවර ගෙන ඇත.
ඒ අනුව ප්රදේශය පුරා අවමංගල්ය බැනර් ප්රදර්ශනය කරමින්, මළගෙදර සඳහා පන්දලම් ඉදිකරමින් සහ ආදාහන කටයුතු සඳහා සියලු පූර්ව සූදානම්වීම් සිදු කරමින් සිටි මොහොතක, සැවොම අන්දමන්ද කරමින් කීර්තිසේන මහතා හදිසියේම නිවසට පැමිණ තිබේ. තමන් වෙනුවෙන්ම ලෑස්ති වෙමින් පැවැති අවමංගල්ය භූමියටම මියගියා යැයි කියූ තැනැත්තා මෙලෙස පණපිටින් පැමිණීමත් සමග මුළු ගම්මානය පුරාම දැඩි ආන්දෝලනාත්මක හා විමතිය දනවන සුළු වාතාවරණයක් නිර්මාණය වී ඇත.