මීගමුව බන්ධනාගාරය තුළ මෑතකදී හටගත් දරුණු ප්රචණ්ඩ ක්රියාවලින් බරපතළ ලෙස තුවාල ලබා සිටි ඩබ්ලිව්. උපාලි නැමැති බන්ධනාගාර නියාමකවරයා ඊයේ පෙරවරුවේ ජීවිතක්ෂයට පත්ව ඇත.
හිසට එල්ල වූ බරපතළ ප්රහාර හේතුවෙන් කොළඹ ජාතික රෝහලේ දැඩි සත්කාර ඒකකයේ ප්රතිකාර ලබමින් සිටි මෙම නිලධාරියාගේ මරණයත් සමඟ, අදාළ සිද්ධියෙන් මියගිය සමස්ත බන්ධනාගාර නිලධාරීන්ගේ සංඛ්යාව අට දක්වා ඉහළ ගොස් තිබේ. බන්ධනාගාර ආරංචි මාර්ගවලට අනුව, මෙම දරුණු ගැටුම් හේතුවෙන් මේ වන විට පුද්ගලයන් 28 දෙනෙකු ජීවිතක්ෂයට පත්ව ඇති අතර තුවාල ලැබූ තවත් බන්ධනාගාර නිලධාරීන් 14 දෙනෙකු තවදුරටත් රෝහල්ගතව ප්රතිකාර ලබමින් සිටී.මේ අතර, මීගමුව බන්ධනාගාර ගැටුමෙන් මියගිය අනෙක් බන්ධනාගාර නිලධාරීන් හත්දෙනාගේ දේහයන් පිළිබඳ අවසන් ගෞරව දැක්වීමේ කටයුතු ඊයේ (8) පෙරවරුවේ කොළඹ රිමාන්ඩ් බන්ධනාගාරයේ පුහුණු මධ්යස්ථානයේදී සිදු කෙරිණි. බන්ධනාගාර දෙපාර්තමේන්තුවේ හදිසි උපක්රමික බළකායට අනුයුක්තව සේවය කරමින් සිටියදී ඝාතනයට ලක්වූ මෙම නිලධාරීන් හත්දෙනාගේ මෘතදේහ විශේෂ රථ පෙරහරක් මඟින් බොරැල්ලේ පිහිටි කොළඹ බන්ධනාගාර පරිශ්රය වෙත රැගෙන එනු ලැබීය. මෙලෙස ඝාතනයට ලක්ව තිබුණේ ජේලර් චන්ද්රවංශ, බන්ධනාගාර නියාමකවරුන් වන එස්. ඩී. එස්. අබේවංශ, ඒ. ඩී. තරංග, ටී. එම්. ආර්. තිලකසිරි, බී. එන්. එන්. තරංග, ඩී. ඩබ්ලිව්. පුෂ්පකුමාර සහ ආර්. පී. ආර්. සංජීව යන මහත්වරුන්ය.
මෙම ශෝකජනක අවස්ථාව වෙනුවෙන් බන්ධනාගාර පරිශ්රය මෙන්ම ඒ ඉදිරිපිට මාර්ග ද සුදු කොඩිවලින් සරසා තිබූ අතර, සිය සහෝදර නිලධාරීන්ට අවසන් ගෞරව දැක්වීම සඳහා බන්ධනාගාර දෙපාර්තමේන්තුවේ විශාල පිරිසක් එදින එක්ව සිටියහ. මියගිය නිලධාරීන්ගේ නිසල දේහයන් රැගත් රථ පෙරහර බන්ධනාගාර පරිශ්රයට ඇතුළු වනවාත් සමඟම, තමන් සමඟ සේවය කළ සගයන්ට අත්වූ ඛේදජනක ඉරණම දරාගත නොහැකිව එහි සිටි නිලධාරීහු සහ නිලධාරිනියෝ හඬා වැටෙන්නට වූහ. මෙම අවස්ථාවට අධිකරණ අමාත්ය නීතිඥ හර්ෂණ නානායක්කාර මහතා ද සහභාගි වූ අතර, එහිදී බන්ධනාගාර නිලධාරීන් දැඩි සංවේදිතාවයකින් යුතුව අමාත්යවරයා සමඟ අදහස් හුවමාරු කරගනු ලැබීය. නිලධාරීන්ගේ දේහයන් වෙත අවසන් ගෞරව දැක්වූ අමාත්යවරයා ද එම අවස්ථාවේදී බෙහෙවින් සංවේදී වී සිටිනු දක්නට ලැබිණි.
පුහුණු මධ්යස්ථානයේ තැන්පත් කර තිබූ දේහයන් වෙත බන්ධනාගාර දෙපාර්තමේන්තුවේ උසස් නිලධාරීන් ඇතුළු සෙසු කාර්ය මණ්ඩලය සිය අවසන් ගෞරවය පුද කළහ. සිය සහෘදයන්ගේ අකල් වෙන්වීමෙන් දැඩි ලෙස කම්පනයට පත් බන්ධනාගාර නිලධාරීන්ගේ ශෝකී හැඟීම් මැද, මෙම මෘතදේහ පැය හතරකට ආසන්න කාලයක් එහි තැන්පත් කර තැබිණි. ඉන් අනතුරුව, එම ස්ථානයට පැමිණි මියගිය නිලධාරීන්ගේ ඥාතීන් වෙත අවසන් කටයුතු සඳහා දේහයන් නිවෙස් වෙත රැගෙන යාමට බන්ධනාගාර බලධාරීන් විසින් භාර දෙනු ලැබීය.
