ඉන්දියාවේ තංජාවූර් දිස්ත්රික්කයට අයත් ප්රදේශයක දැඩි හිරු රශ්මිය හමුවේ නවතා තිබූ මෝටර් රථයක් තුළ සිරවීමෙන් හුස්ම හිරවී හය හැවිරිදි පිරිමි දරුවෙකු ජීවිතක්ෂයට පත්වීමේ ශෝකජනක පුවතක් වාර්තා වේ. මෙම අවාසනාවන්ත සිදුවීමෙන් මියගොස් ඇත්තේ තමන් (Thaman) නැමැති වයස අවුරුදු හයක කුඩා දරුවෙකි.
පසුගිය ඉරිදා දින නිවාඩුව ගත කිරීම සඳහා මියගිය දරුවා සිය ලොකු තාත්තා සහ ඔහුගේ පුත්රයා සමඟ මෝටර් රථයකින් පිටතට ගොස් ඇති අතර, ගමන නිමා කර නැවත නිවස බලා පැමිණි අවස්ථාවේදී මෙම අනතුර සිදුව ඇත. එහිදී දරුවාගේ ලොකු තාත්තා තම පුත්රයාව පමණක් කැටුව රථයෙන් බැස ඇති අතර, කුඩා තමන් මෝටර් රථයේ පසුපස අසුනේ සිටින බව ඔහුට නිරීක්ෂණය වී නොමැත. ඒ අනුව ඔහු මෝටර් රථයේ දොර ජනෙල් සම්පූර්ණයෙන්ම වසා දමා නිවස තුළට ගොස් තිබේ.
කාලය ගත වෙද්දී දරුවා නිවසේ නොමැති බව වටහාගත් පවුලේ සාමාජිකයන් දැඩි කලබලයට පත්ව ඔහු සෙල්ලම් කරන ස්ථාන සහ අසල්වැසි නිවාසවල දැඩි සෝදිසියක් දියත් කර ඇත. නෑදෑ හිතමිතුරන් එකතු වී විවිධ ස්ථානවල සෙව්වත් දරුවා පිළිබඳ කිසිදු තොරතුරක් සොයා ගැනීමට ඔවුන්ට හැකි වී නැත. පසුව එදින පස්වරු 7.00 ට පමණ ඇති වූ සැකයක් මත නිවස අසල නවතා තිබූ මෝටර් රථයේ දොරවල් හැර බලා ඇත.
එම අවස්ථාවේදී මෝටර් රථය තුළ පැවති අධික උෂ්ණත්වය සහ ඔක්සිජන් හිඟකම හේතුවෙන් හුස්ම හිරවී සිහිය නැති වී සිටි කුඩා දරුවා ඒ වන විටත් මියගොස් සිටිනු දැක පවුලේ අය විලාප තබා තිබේ. සිද්ධිය සැලවීමත් සමඟ වහාම ක්රියාත්මක වූ පොලිස් නිලධාරීන් එම ස්ථානයට පැමිණ දරුවාගේ සිරුර පශ්චාත් මරණ පරීක්ෂණය සඳහා රජයේ රෝහල වෙත යොමු කර ඇති අතර, සිදුවීම සම්බන්ධයෙන් වැඩිදුර විමර්ශන ආරම්භ කර ඇත.
මේ අතර, මෙවැනි ඛේදවාචක වළක්වා ගැනීම සඳහා පොදු ස්ථානවල හෝ නිවස අසල වාහන නවතා යන විට එහි ඇතුළත දරුවන් සිටීදැයි වැඩිහිටියන් කිහිප වතාවක්ම පරීක්ෂා කළ යුතු බව පොලිසිය අවධාරණය කරයි. විශේෂයෙන්ම පවතින උණුසුම් කාලගුණයත් සමඟ වසා දැමූ වාහනයක් තුළ උෂ්ණත්වය මිනිත්තු කිහිපයකින් ඉතා භයානක මට්ටමකට ඉහළ යා හැකි බැවින්, මහජනතාව මේ පිළිබඳව දැඩි අවධානයකින් සහ සැලකිල්ලකින් පසුවිය යුතු බවද පොලිසිය වැඩිදුරටත් දැනුම් දෙයි.
