රජය විසින් මෑතකදී වාහන ආනයන අධිභාරය සියයට 50 කින් ඉහළ නැංවීමට ගත් තීරණය, ජාත්යන්තර මූල්ය අරමුදල (IMF) ශ්රී ලංකාව වෙනුවෙන් ක්රියාත්මක කරන ආධාර වැඩසටහනේ එකඟතාවන් උල්ලංඝනය කිරීමක් බව එම අරමුදලේ මෙරට දූත මණ්ඩල ප්රධානී එවන් පැපජෝර්ජියෝ මහතා පවසයි. ඊයේ (30) පැවැති මාධ්ය හමුවකදී අදහස් දක්වමින් ඔහු සඳහන් කළේ, මෙම අතිරේක බදු පැනවීම මාස තුනක් අවසානයේදී රජය විසින් ඉවත් කරනු ඇතැයි මූල්ය අරමුදල දැඩිව විශ්වාස කරන බවයි.
මූල්ය අරමුදලේ ආධාර වැඩසටහන් යටතේ මෙලෙස ආනයන සීමාවන් පැනවීම සඳහා කිසිසේත්ම දිරි නොගන්වන බවද හෙතෙම මෙහිදී අවධාරණය කළේය.මෙරට අපනයන ආදායම සහ ආනයන වියදම් අතර පවතින පරතරය ශීඝ්රයෙන් පුළුල් වීම හේතුවෙන්, එය පාලනය කිරීම සඳහා තාවකාලික පියවරක් ලෙස මෙම බදු වැඩිකිරීම සිදුකළ බව ශ්රී ලංකා බලධාරීන් පස්වැනි සහ හයවැනි සමාලෝචනවලදී මූල්ය අරමුදලේ විධායක කමිටුව වෙත දැනුම් දී තිබේ. එම කරුණු සැලකිල්ලට ගනිමින්, එළඹෙන අගෝස්තු මස 15 වැනිදා වන විට මෙම සියයට 50 ක අතිරේක අධිභාරය නැවත ඉවත් කරනු ඇතැයි විධායක කමිටුව අපේක්ෂා කරයි. මීට අමතරව, නව අරමුදල් වැඩසටහනක් පිළිබඳව සාකච්ඡා කිරීමට පෙර දැනට පවතින වැඩසටහන සාර්ථකව අවසන් කළ යුතු අතර, වත්මන් වැඩපිළිවෙළ යටතේ තවත් සමාලෝචන දෙකක් ඉතිරිව පවතී.
වත්මන් අරමුදල් සහන වැඩසටහන ලබන වසරේ මාර්තු මාසයෙන් අවසන් වීමට නියමිතව ඇති අතර, ශ්රී ලංකාව ලබා ඇති ප්රගතිය විධිමත්ව ඇගයීමට ලක් කෙරෙන හත්වැනි සමාලෝචනය මෙම වසර අවසානයේදී පැවැත්වීමට සැලසුම් කර ඇත. මෙම වැඩසටහනේ අවසන් ප්රතිඵලය කුමක් වුවත්, ජාත්යන්තර මූල්ය අරමුදල සැමවිටම ශ්රී ලංකාවේ විශ්වාසවන්ත උපදේශකයෙකු ලෙස රැඳී සිටින බවත්, රටට අවශ්ය ඕනෑම අවස්ථාවක මූල්ය අරමුදලේ සහාය ලබාගත හැකි බවත් පැපජෝර්ජියෝ මහතා පැවසීය.
මැදපෙරදිග කලාපයේ පවතින යුදමය වාතාවරණය හේතුවෙන් ශ්රී ලංකා ආර්ථිකයට දැඩි පීඩනයක් එල්ල වී ඇති අතර, ඒ හේතුවෙන් රටේ ආර්ථිකය තුළ ඉහළ අවිනිශ්චිතතාවක් නිර්මාණය වී තිබේ. බලශක්ති මිල ගණන් ඉහළ යාම හේතුවෙන් පසුගිය පෙබරවාරි මාසයේදී සියයට 1.6 ක් ලෙස පැවති මෙරට උද්ධමනය, මැයි මාසය වන විට සියයට 5.5 ක් දක්වා කැපී පෙනෙන ලෙස ඉහළ ගොස් ඇත. මීට අමතරව, විදේශීය සංචාරකයින්ගේ පැමිණීම මෙන්ම දළ විදේශ සංචිත ගොඩනැගීමේ ක්රියාවලියද මේ වන විට මන්දගාමී වී ඇති බව දූත මණ්ඩල ප්රධානියා පෙන්වා දුන්නේය.
මෙම ආර්ථික තත්ත්වයට ප්රතිචාර දක්වමින් ශ්රී ලංකා මහ බැංකුව සිය ප්රතිපත්ති පොලී අනුපාතය සියයට 1 කින් ඉහළ නැංවීමට පියවර ගත් අතර, මුළු මහත් මූල්ය පද්ධතියටම එල්ල විය හැකි පුළුල් අවදානම් වළක්වා ගැනීමටද විවිධ ක්රියාමාර්ග ගෙන ඇත. එමෙන්ම පවතින තත්ත්වය හමුවේ අවදානමට ලක්විය හැකි ජනකොටස් වෙනුවෙන් සහන පැකේජයක් ක්රියාත්මක කිරීමටද රජය කටයුතු කර තිබේ. දැනට අත්පත් කරගෙන ඇති ආර්ථික ප්රගතිය ස්ථාවර කරගැනීම සහ බාහිර කම්පනවලට ඔරොත්තු දීමේ හැකියාව වර්ධනය කරගැනීම සඳහා මෙරට ආර්ථික ප්රතිසංස්කරණ න්යාය පත්රය අඛණ්ඩව ඉදිරියට ගෙන යාම අත්යවශ්ය වේ.
ජාත්යන්තර මූල්ය අරමුදලේ දූත පිරිස පසුගිය ජුනි 24 වැනිදා සිට ඊයේ (30) දක්වා මෙරට නිල සංචාරයක නිරත වූ අතර, එහිදී ජනාධිපතිවරයා ඇතුළු මෙරට උසස් බලධාරීන් සමඟ සාකච්ඡා වට කිහිපයක් පවත්වනු ලැබීය. මෙම සංචාරය නිල සමාලෝචනයක් නොවන නමුත්, වසර අවසානයේ පැවැත්වෙන හත්වැනි සමාලෝචනයේදී ශ්රී ලංකාව ලබා ඇති ආර්ථික ප්රගතිය පිළිබඳව පුළුල් ලෙස විමර්ශනය කිරීමට නියමිතය.