සංවිධානාත්මක අපරාධ සහ මත්ද්රව්ය ජාවාරම් මගින් නීතිවිරෝධී ලෙස උපයාගත් බවට සැකකෙරෙන රුපියල් මිලියන 150 ක් (කෝටි 15 ක්) වටිනා දේපළ තහනම් කිරීමට පොලිසිය පියවර ගෙන තිබේ. රත්ගම, දෙවනිගොඩ ප්රදේශයේදී මෙම දේපළ අත්පත් කරගෙන ඇති බව වාර්තා වේ.
සිද්ධිය සම්බන්ධයෙන් ලැබුණු පැමිණිල්ලකට අනුව අපරාධ පරීක්ෂණ දෙපාර්තමේන්තුව විසින් මූලික විමර්ශන ආරම්භ කර ඇති අතර, ඊට අදාළ තොරතුරු ගාල්ල මහේස්ත්රාත් අධිකරණය වෙතද වාර්තා කිරීමට කටයුතු කර තිබිණි. එම පරීක්ෂණවලදී අනාවරණය වූ කරුණු පදනම් කරගනිමින් වැඩිදුර විමර්ශන කටයුතු නීති විරෝධී වත්කම් විමර්ශන කොට්ඨාසය වෙත යොමු කෙරිණි.
අදාළ කොට්ඨාසය මගින් සිදුකරන ලද දීර්ඝ විමර්ශනවලදී හෙළිවී ඇත්තේ, ප්රධාන සැකකරු සහ ඔහුගේ බිරිඳගේ සොහොයුරා විසින් එක්ව නීතිවිරෝධී ලෙස උපයාගත් මුදල් යොදවා, සැකකරුගේ නැන්දම්මාගේ නමින් මෙම දේපළ මිලදී ගෙන ඇති බවයි.
මෙසේ තහනමට ලක්ව ඇත්තේ රුපියල් මිලියන 60 ක වටිනාකමකින් යුත් පර්චස් 31.7 ක ඉඩම සහ තෙමහල් ගොඩනැගිල්ල, රුපියල් මිලියන 45 ක් වටිනා පර්චස් 9.30 ක ඉඩම සහ අර්ධ වශයෙන් නිමකර ඇති තෙමහල් ගොඩනැගිල්ල මෙන්ම රුපියල් මිලියන 10 ක් වටිනා පර්චස් 9.88 ක ඉඩම සහ තනි මහල් නිවසයි. ඊට අමතරව රුපියල් මිලියන 5 ක් වටිනා පර්චස් 3.1 ක ඉඩමද මෙම තහනම් කරන ලද දේපළ ලැයිස්තුවට අයත් වේ.
මුදල් විශුද්ධිකරණය වැළැක්වීමේ පනතේ ප්රතිපාදනවලට අනුව 2026 ජූලි 23 වන දින සිට බලපැවැත්වෙන පරිදි දින හතක කාලයක් සඳහා මෙම දේපළවල අයිතිය තහනම් කිරීමේ නියෝග නිකුත් කර ඇත.