මීගමුව බන්ධනාගාරය තුළ ඇති වූ මෙම දරුණු නොසන්සුන්තාවත් සමඟ බන්ධනාගාරයෙන් පිටත පරිසරය ද දැඩි උණුසුම් මුහුණුවරක් ගත්තේය. සිද්ධිය සැලවීමත් සමඟම තම දරුවන්ගේ සහ ඥාතීන්ගේ සුවදුක් සෙවීම සඳහා දෙදහසකට අධික ඥාතීන් පිරිසක් බන්ධනාගාරය ඉදිරිපිටට රොක් වී හඬා වැටෙමින් කලබලකාරී ලෙස හැසිරෙන්නට වූහ.
වියරු වැටුණු ඇතැම් ඥාතීන් ආරක්ෂක මුරපොලු ද කඩාගෙන බන්ධනාගාරය තුළට යාමට උත්සාහ කළ අතර, තත්ත්වය පාලනය කිරීමට ආරක්ෂක අංශවලට දැඩි පරිශ්රමයක් දැරීමට සිදු විය. බන්ධනාගාරය අවට ප්රදේශයේ පැවති දැඩි නොසන්සුන්කාරී සහ අවදානම් සහගත වාතාවරණය හේතුවෙන්, බන්ධනාගාරය අසල පිහිටි නිවුස්ටඩ් බාලිකා විද්යාලයේ අධ්යයන කටයුතු ද එදින පස්වරු 12.30 වන විට කඩිනමින් අවසන් කර සිසුවියන් ඔවුන්ගේ දෙමාපියන් වෙත ආරක්ෂිතව බාර දීමට පාසල් බලධාරීන් පියවර ගත්හ.බන්ධනාගාර දොරටුව අභියස රැඳී සිටි මව්වරුන් සහ පියවරුන් තමන් මුහුණ දෙන අසීමිත පීඩාව පුවත්පත් කලාවේදීන් හමුවේ කඳුළු සලමින් අනාවරණය කළහ. ගැටුමෙන් මියගිය ගයාන් සම්පත් නමැති රැඳවියාගේ මව වූ නන්දනී මහත්මිය ප්රකාශ කළේ, තම පුතා කෑම පෝලිමේ යමින් සිටියදී පොලුවලින් සහ තහඩු කෑලිවලින් පහර දී ඉතා අමානුෂික ලෙස වධහිංසා පමුණුවා ඝාතනය කර ඇති බවයි. ඇගේ අනෙක් පුත්රයා ද තවමත් බන්ධනාගාරය තුළ සිටින බැවින් ඔහුගේ ජීවිතය හෝ බේරා දෙන ලෙස ඇය හඬා වැටෙමින් ඉල්ලා සිටියාය. එමෙන්ම මීට පෙර 2020 වසරේදී මහර බන්ධනාගාරයේ සිදු වූ ගැටුමෙන් ද තුවාල ලබා සිටි තම පුත්රයා වර්තමානයේ මීගමුව බන්ධනාගාරය තුළ රඳවා සිටින බවත්, ඔහු පිළිබඳ කිසිදු තොරතුරක් ලබා ගැනීමට නොහැකිව තමන් අන්ත අසරණ වී සිටින බවත් මිනුවන්ගොඩ ප්රදේශයේ පදිංචි ශ්රියාණි මහත්මිය ප්රකාශ කළාය. සිරකරුවන් රාජ්ය භාරයේ සිටියදී මෙලෙස ඝාතනයට ලක්වීම පිළිබඳව ඥාතීන් රජයට සහ පාලකයන්ට දැඩි චෝදනා එල්ල කළහ.
මෙම මහා ඛේදවාචකයෙන් පසුව මීගමුව බන්ධනාගාරයේ ආරක්ෂාව තහවුරු කිරීම සහ යළිත් එවැනි තත්ත්වයක් ඇතිවීම වැළැක්වීම සඳහා බන්ධනාගාර බලධාරීන් එහි සිටි රැඳවියන් 675 දෙනකු බස් රථ මඟින් පල්ලන්සේන සහ දුම්බර ඇතුළු වෙනත් බන්ධනාගාර වෙත වහාම මාරු කර යැවීමට පියවර ගත්තේය. මේ අතර, මෙම ප්රචණ්ඩකාරී සිද්ධිය සම්බන්ධයෙන් විධිමත් හා පුළුල් විමර්ශනයක් සිදු කර වාර්තාවක් ඉදිරිපත් කිරීම සඳහා ජනාධිපති අනුර කුමාර දිසානායක මහතාගේ ප්රධානත්වයෙන් රැස්වූ කැබිනට් මණ්ඩලය විසින් විශේෂ ත්රිපුද්ගල කමිටුවක් පත් කිරීමට අනුමැතිය ලබා දී තිබේ. විශ්රාමික ශ්රේෂ්ඨාධිකරණ විනිසුරු ප්රියන්ත ප්රනාන්දු මහතාගේ සභාපතිත්වයෙන් යුත් මෙම කමිටුවේ සෙසු සාමාජිකයන් ලෙස විශ්රාමික අතිරේක සොලිසිටර් ජනරාල්, ජනාධිපති නීතිඥ මිලින්ද ගුණතිලක මහතා සහ ජනාධිපති නීතිඥ මොහාන් වීරකෝන් මහතා පත් කර ඇත. මෙම සිද්ධියට හේතු වූ කරුණු, ඒ පිළිබඳ ගත යුතු ක්රියාමාර්ග සහ මෙවැනි විනාශයන් යළි ඇතිවීම වැළැක්වීම සඳහා ගත යුතු නිර්දේශ ඇතුළත් වාර්තාවක් කඩිනමින් රජයට ඉදිරිපත් කිරීමට මෙම කමිටුවට නියමිතය. බස්නාහිර පළාත භාර ජ්යෙෂ්ඨ නියෝජ්ය පොලිස්පති සජීව මැදවත්ත මහතා ද සිද්ධිය වූ ස්ථානය නිරීක්ෂණය කළ අතර වැඩබලන පොලිස්පති සංජීව ධර්මරත්න මහතාගේ පූර්ණ අධීක්ෂණය යටතේ විශේෂ පොලිස් විමර්ශනයක් ද ක්රියාත්මක වේ.