කොළඹ සෞන්දර්ය කලා විශ්වවිද්යාලය තුළ ඩෙංගු රෝගය ශීඝ්රයෙන් පැතිර යාම හේතුවෙන් එය තාවකාලිකව වසා දැමීමට පියවර ගෙන ඇති බව අධ්යාපන නියෝජ්ය අමාත්ය වෛද්ය මධුර සෙනෙවිරත්න මහතා ප්රකාශ කළේය. ඒ අනුව ඉකුත් 30 වැනිදා සිට ක්රියාත්මක වන පරිදි වසා දැමූ මෙම විශ්වවිද්යාලය නැවත විවෘත කිරීමට නියමිතව ඇත්තේ ලබන 13 වැනිදාය.
මෙම කාලසීමාව තුළ විශ්වවිද්යාලයේ සියලුම අධ්යයන කටයුතු මෙන්ම විභාග සහ පරීක්ෂණ කටයුතු ද කල් තැබීමට බලධාරීන් තීරණය කර ඇති අතර සිසුන් රැඳී සිටින නේවාසිකාගාර ද සම්පූර්ණයෙන්ම වසා තැබෙනු ඇත.විශ්වවිද්යාලය මෙලෙස හදිසියේ වසා දැමීමට මූලික හේතුව වී ඇත්තේ එහි අධ්යාපනය ලබන සිසුන් තිස් හය දෙනෙකුට ඩෙංගු රෝගය වැළඳී ඇති බව තහවුරු වීම සහ තවත් සිසුන් පිරිසක් උණ රෝගයෙන් පෙළෙන බව හඳුනා ගැනීමයි. සෞඛ්ය අංශ ලබා දුන් උපදෙස් හා නිර්දේශවලට අනුකූලව, රෝගය තවදුරටත් ව්යාප්ත වීම පාලනය කිරීමේ කඩිනම් පියවරක් ලෙස මෙම තීරණය ගත් බව නියෝජ්ය අමාත්යවරයා වැඩිදුරටත් පැහැදිලි කළේය.
මෙම විශ්වවිද්යාලයට අයත් නේවාසිකාගාර දෙකක් රාජගිරිය සහ දෙහිවල යන ප්රදේශවල පිහිටා ඇති අතර, එම නේවාසිකාගාරවලින් බැහැර පිටත අවට ප්රදේශවල ද ඩෙංගු රෝග ව්යාප්තිය ඉහළ ගොස් ඇති බවට සෞඛ්ය අංශ විසින් අධ්යාපන අමාත්යාංශය වෙත දැනුම් දී තිබේ. මේ හේතුවෙන් විශ්වවිද්යාලය වසා දැමීමත් සමඟම, අදාළ නේවාසිකාගාර පරිශ්රයන් මෙන්ම ඒවාට මායිම් වූ අවට ප්රදේශ කේන්ද්ර කර ගනිමින් විශේෂ මදුරු මර්දන වැඩපිළිවෙළක් සෞඛ්ය අංශ විසින් වහාම ක්රියාත්මක කර ඇත.
මේ සම්බන්ධයෙන් සෞන්දර්ය කලා විශ්වවිද්යාලයේ උපකුලපති මහාචාර්ය රොහාන් නෙත්සිංහ මහතාගෙන් විමසූ විට ඔහු ප්රකාශ කළේ සිසුන් අතර ඩෙංගු සහ වෙනත් වෛරස් උණ රෝග ශීඝ්රයෙන් ව්යාප්ත වෙමින් පවතින බව සෞඛ්ය ප්රධානීන් තමන් වෙත දැනුම් දුන් බවයි. එම තත්ත්වය සලකා බලා සිසුන්ගේ ආරක්ෂාව වෙනුවෙන් විශ්වවිද්යාලය මෙලෙස වසා දැමීමට කටයුතු කළ බව හෙතෙම පැවසීය. එමෙන්ම, විශ්වවිද්යාලය තුළ උද්ගතව ඇති මෙම බරපතළ තත්ත්වය සහ ඉදිරි පියවර සම්බන්ධයෙන් උපකුලපතිවරයා ඉකුත් 01 වැනිදා විශ්වවිද්යාල ප්රතිපාදන කොමිෂන් සභාවේ ප්රධානීන් සමඟ ද දීර්ඝ වශයෙන් සාකච්ඡා කර තිබේ.