සංචාරක පොලිස් නිලධාරීන් ලෙස පෙනී සිටිමින් බ්රසීල ජාතිකයෙකු රඳවා තබාගෙන රුපියල් මිලියන තුනක කප්පම් මුදලක් ඉල්ලූ පුද්ගලයින් තිදෙනෙකු උණවටුන සංචාරක පොලිසිය විසින් අත්අඩංගුවට ගෙන තිබේ. මෙම බ්රසීල ජාතික සංචාරකයා ගාල්ල, තල්පේ ප්රදේශයේ පිහිටි ලැගුම්හලක නැවතී සිට ඇති අතර, එම ස්ථානයට පැමිණි සැකකරුවන් දෙදෙනෙකු තමන් සංචාරක පොලිසියේ බව පවසමින් ඔහුගේ කාමරය පරීක්ෂා කර ඇත. එහිදී ඔවුන් වින්දිතයා සතු බ්රසීල ගමන් බලපත්රය, ඇමරිකානු ලේඛන, ජංගම දුරකථන සහ තවත් පෞද්ගලික භාණ්ඩ කිහිපයක් තම භාරයට ගෙන ඇති බව පොලිසිය සඳහන් කරයි.
පසුව තවත් සැකකරුවෙකු මොවුන් සමඟ එකතු වී ඇති අතර, ඉන් අනතුරුව මෙම පිරිස විදේශිකයාට මාංචු දමා තර්ජනය කර තිබේ. තමාව අත්අඩංගුවට ගැනීම වැළැක්වීම සඳහා කොළඹ සිටින ජ්යෙෂ්ඨ පොලිස් නිලධාරියෙකුට අල්ලස් දිය යුතු බව පවසමින් සැකකරුවන් රුපියල් මිලියන 3ක මුදලක් ඉල්ලා ඇත. එහිදී යතුරුපැදියක් උකස් කිරීමෙන් තමන් දැනටමත් රුපියල් ලක්ෂ දෙකක මුදලක් සොයාගෙන ඇති බව පැවසූ සැකකරුවන්, ඉතිරි රුපියල් මිලියන 2.8ක මුදල වහාම ගෙවන ලෙසට වින්දිතයාට බලකර තිබේ.
සිද්ධිය සම්බන්ධයෙන් ලද පැමිණිල්ලකට අනුව ක්රියාත්මක වූ උණවටුන සංචාරක පොලිස් නිලධාරීන් විශේෂ මෙහෙයුමක් දියත් කර වයස අවුරුදු 25 සහ 26 යන වයස්වල පසුවන සැකකරුවන් තිදෙනා අත්අඩංගුවට ගෙන ඇත. මෙම අපරාධය සඳහා සැකකරුවන් විසින් භාවිතා කරන ලද ඇල්ටෝ වර්ගයේ මෝටර් රථයක් ද පොලිසිය විසින් අත්අඩංගුවට ගෙන තිබේ. අත්අඩංගුවට ගත් සැකකරුවන් ගාල්ල මහේස්ත්රාත් අධිකරණයට ඉදිරිපත් කිරීමට නියමිත අතර සිද්ධිය සම්බන්ධයෙන් වැඩිදුර විමර්ශන ක්රියාත්මකය.