හෝමාගම කටුවන කර්මාන්ත පුරයේ පිහිටි හිස්වැසුම් (හෙල්මට්) නිෂ්පාදනය කරන කර්මාන්තශාලාවක ඊයේ පෙරවරුවේ හටගත් දරුණු ගිනිගැනීමකින් එහි සේවය කරමින් සිටි පුද්ගලයන් පස්දෙනෙකු ජීවිතක්ෂයට පත්ව ඇති අතර තවත් තිදෙනෙකු තුවාල ලබා රෝහල්ගත කර තිබේ. සිද්ධිය වන අවස්ථාවේදී සේවකයින් අසූවකට ආසන්න පිරිසක් ආයතනය තුළ රැඳී සිට ඇති අතර, මියගිය අය අතර කාන්තාවක් සහ පිරිමි පුද්ගලයින් සිව්දෙනෙකු සිටින බව තහවුරු වී ඇත.
ගින්න සාර්ථකව නිවා දැමීමෙන් අනතුරුව ගොඩනැගිල්ලේ ඉහළ මහලේ තිබී සොයාගන්නා ලද මෘත ශරීර දැඩි ලෙස පිළිස්සීමට ලක්ව තිබීම හේතුවෙන් එම පුද්ගලයන්ගේ අනන්යතාව වහාම තහවුරු කරගැනීමට නොහැකි වී ඇති අතර, සිරුරු පශ්චාත් මරණ පරීක්ෂණ කටයුතු සඳහා හෝමාගම රෝහලේ මෘත ශරීරාගාරය වෙත යොමු කර ඇත. මීට අමතරව අධික දුම් ආඝ්රාණය වීම සහ පිළිස්සුම් තුවාල ලැබීම නිසා රෝහල්ගත කළ පිරිස අතර කාන්තාවක ද වන බව සඳහන් වේ.
මූලික පරීක්ෂණවලදී අනාවරණය වී ඇත්තේ කර්මාන්තශාලාවේ තිබූ විදුලි පංකාවක ඇති වූ විදුලි කාන්දුවක් මෙම අනතුරට හේතු වී ඇති බවයි. ගොඩනැගිල්ලේ පළමු මහලෙන් ආරම්භ වූ ගින්න, හිස්වැසුම් නිෂ්පාදනය සඳහා ගබඩා කර තිබූ රිජිෆෝම්, ටිනර්, රසායනික ද්රව්ය සහ ඇට වර්ග වැනි ශීඝ්රයෙන් ගිනි ඇවිළෙන සුළු ද්රව්ය හේතුවෙන් ඉතා කෙටි කාලයකදී සමස්ත ගොඩනැගිල්ල පුරාම ව්යාප්ත වී තිබේ.
කර්මාන්ත පුරය තුළ ක්ෂණික ගිනි නිවීමේ ඒකකයක් නොමැති වීම ගින්න දරුණු ලෙස පැතිරීමට තවත් හේතුවක් වූ අතර, පසුව දෙහිවල-ගල්කිස්ස සහ කෝට්ටේ මහ නගර සභාවලට අයත් ගිනි නිවන රථ 6ක් එම ස්ථානයට කැඳවීමට කටයුතු කෙරිණි. යුද හමුදාව, පොලීසිය, විදුලි බල මණ්ඩල නිලධාරීන් සහ ප්රදේශවාසීන් එක්ව පැය පහකට ආසන්න කාලයක් සිදුකළ ඒකාබද්ධ මෙහෙයුමකින් අනතුරුව ගින්න සම්පූර්ණයෙන්ම පාලනය කිරීමට හැකි විය. ගින්නෙහි සැරබව නිසා ගොඩනැගිල්ලේ ඉහළ මහල කඩා වැටී ඇති අතර, යන්ත්ර සූත්ර රැසක් සහ ප්රදේශයේ විදුලි රැහැන් පද්ධතියට ද දැඩි හානි සිදුව ඇත.
හෝමාගම වැඩබලන මහේස්ත්රාත් රොෂාන් කුරුප්පුආරච්චි මහතා විසින් විපත සිදුවූ ස්ථානය පරීක්ෂාවට ලක් කරන ලද අතර, ගින්නෙන් සිදු වූ සමස්ත මූල්ය හානිය මෙතෙක් තක්සේරු කර නොමැත. සිද්ධිය සම්බන්ධයෙන් රජයේ රස පරීක්ෂක කාර්යාලයේ ගිනි අංශයේ විශේෂඥයන් සහ හෝමාගම පොලීසිය එක්ව වැඩිදුර විමර්ශන පවත්වයි.
