පොලිස් නිලධාරීන් මෙන්ම විවිධ රාජ්ය නිලධාරීන් ලෙස පෙනී සිටිමින් ජනතාවගේ මුදල් සහ සංවේදී බැංකු තොරතුරු සොරකම් කිරීමේ සංවිධානාත්මක වංචා රැල්ලක් පිළිබඳව ශ්රී ලංකා පොලිසිය විසින් ප්රජාව වෙත විශේෂ හදිසි දැනුම්දීමක් සිදු කර තිබේ. සොරකම් කරන ලද හෝ කෘත්රිමව සකස් කරන ලද ඡායාරූප වට්ස්ඇප් (WhatsApp) සහ ටෙලිග්රෑම් (Telegram) වැනි සන්නිවේදන යෙදුම් හරහා යොදාගනිමින් මෙම වංචාකරුවන් මහජනතාව නොමඟ යැවීමට කටයුතු කරයි.
මීට පෙර අවස්ථාවලදීද මෙවැනි ජාවාරම්කරුවන් අත්අඩංගුවට ගනිමින් ජනතාව දැනුවත් කිරීමට පියවර ගෙන තිබුණද, තවමත් සැලකිය යුතු පිරිසක් මෙම උපක්රමවලට ගොදුරු වන බව පොලිස් වාර්තා පෙන්වා දෙයි.ශ්රී ලංකා මහ බැංකුව, අපරාධ පරීක්ෂණ දෙපාර්තමේන්තුව (CID) හෝ වෙනත් පොලිස් විමර්ශන ඒකක නියෝජනය කරන බව පවසමින් සැකකරුවන් විසින් ජනතාව වෙත දුරකථන ඇමතුම් ලබාදීම සිදු කරයි. අදාළ තැනැත්තන්ගේ ජාතික හැඳුනුම්පත් අංක නීති විරෝධී කටයුතු සඳහා යොදාගෙන ඇති බවට හෝ ඔවුන්ගේ බැංකු ගිණුම් මුදල් විශුද්ධිකරණය වැනි බරපතල අපරාධවලට සම්බන්ධ වී ඇති බවට අසත්ය චෝදනා නැගීම මොවුන්ගේ ප්රධාන උපක්රමය වී තිබේ. තම ප්රකාශ විශ්වාසනීය කිරීමට ව්යාජ ලෙස සකස් කළ පොලිස් හැඳුනුම්පත්, නිල ලේඛන සහ රාජ්ය ලාංඡන සමාජ මාධ්ය ඔස්සේ යොමු කරන මොවුන්, නීතිමය පියවර ගන්නා බවට බියගන්වමින් අදාළ විමර්ශන විසඳීමට සහාය වන මුවාවෙන් ජනතාව නොමඟ යවයි.
මේ හරහා වින්දිතයන් නම්යශීලී කරවා ගනිමින් එක්වරක් පමණක් භාවිත කරන මුරපද (OTP), බැංකු පද්ධතිවලට පිවිසෙන දත්ත සහ රහස් අංක ලබා ගැනීමට වංචාකරුවෝ කටයුතු කරති. එමෙන්ම, ඇතැම් අවස්ථාවලදී නොදන්නා බැංකු ගිණුම්වලට මුදල් තැන්පත් කිරීමට හෝ USDT ඇතුළු ක්රිප්ටෝ මුදල් මිලදී ගෙන හුවමාරු කිරීමටද බලපෑම් කෙරේ. කෙසේ වෙතත්, කිසිදු රාජ්ය හෝ පෞද්ගලික ආයතනයක් විසින් දුරකථන ඇමතුම් හෝ සමාජ මාධ්ය ජාල හරහා OTP අංක, CVC අංක, බැංකු මුරපද හෝ වෙනත් රහස්ය තොරතුරු කිසිවිටෙකත් ඉල්ලා නොසිටින බව පොලිසිය අවධාරණය කරයි.
ශ්රී ලංකා පොලිසියේ නිල සන්නිවේදන කටයුතු සිදුවන්නේ විධිමත් ලිඛිත දැනුම්දීම් හරහා හෝ නිල රාජකාරිවල නිරත නිලධාරීන් සෘජුවම පුද්ගලිකව හමුවීමෙන් පමණි. එම නිසා සැකකටයුතු වෙබ් අඩවි සබැඳි (Links) ක්ලික් කිරීමෙන්, නොදන්නා මූලාශ්රවලින් ගොනු (Files) බාගත කිරීමෙන් හෝ තහවුරු නොකළ QR කේත ස්කෑන් කිරීමෙන් වළකින ලෙස මහජනතාවට උපදෙස් දී ඇත. රාජ්ය ලාංඡන සහිත ව්යාජ ලේඛන හෝ පණිවිඩ ලැබෙන්නේ නම් ඒ පිළිබඳව වහාම ළඟම පිහිටි පොලිස් ස්ථානය වෙත තොරතුරු ලබාදිය යුතුය.
අපරාධ පරීක්ෂණ සිදුකිරීම සඳහා පොලිසිය විසින් කිසිදු මුදලක් අය නොකරන බවද වැඩිදුරටත් අවධාරණය කෙරේ. මෙවැනි වංචාවලට ලක්වූ හෝ එවැනි තර්ජනයන්ට මුහුණදුන් තැනැත්තන්ට 011-2300756, 071-8592918 හෝ 071-8591765 යන දුරකථන අංක ඔස්සේ පරිගණක අපරාධ විමර්ශන අංශය ඇමතීමට හැකියාව පවතී. එසේ නැතහොත් පැමිණිල්ලක් සටහන් කිරීම සඳහා අපරාධ පරීක්ෂණ දෙපාර්තමේන්තුව (CID) වෙත සෘජුවම පැමිණිය හැකිය.