ඩුබායි නගර මධ්යයේ පිපිරීම් කිහිපයක් සිදු වූ බවට පළ වූ අසත්ය පුවතක් සම්බන්ධයෙන් එක්සත් අරාබි එමීර් රාජ්යයේ රජයේ නීතිඥ කාර්යාලය (Public Prosecution) සිය විමර්ශන කටයුතු පුළුල් කර තිබේ. මෙම සාවද්ය වාර්තාව සැකසීමට, අනුමත කිරීමට සහ ප්රකාශයට පත් කිරීමට සම්බන්ධ වූ පුවත් ඒජන්සි නිලධාරීන් සහ ඊට අදාළ වාර්තාකරු කැඳවා ඔවුන්ගෙන් ප්රකාශ ලබා ගත් බව එක්සත් අරාබි එමීර් රාජ්යයේ නීතිපති කවුන්සලර් ආචාර්ය හමාඩ් සයිෆ් අල් ෂම්සි මහතා ප්රකාශ කළ බව නිල පුවත් සේවය වන 'වෑම්' (Wam) විසින් වාර්තා කර ඇත.
මෙම පුවත පළ කිරීමේ ක්රියාවලියේ විවිධ අවස්ථා වලදී ඊට සම්බන්ධ වූ එක් එක් පුද්ගලයින්ගේ වගකීම කුමක්ද යන්නත්, තොරතුරු තහවුරු කිරීමේදී ඔවුන් නීතිමය මෙන්ම වෘත්තීය ප්රමිතීන්ට කොතරම් දුරට අනුගත වී ඇත්ද යන්නත් මෙම විමර්ශනය හරහා තක්සේරු කිරීමට නියමිතය. අදාළ පුවත් ඒජන්සිය විසින් සිය වාර්තාව ඉල්ලා අස්කර ගනිමින් සමාව අයැද සිටීමට තීරණය කර තිබුණද, එයින් ඔවුන්ගේ නීතිමය වගකීම මග හැරෙන්නේ නැති බවත්, නීතියෙන් නියම කර ඇති පරිදි අඛණ්ඩව විමර්ශන පවත්වා අවශ්ය පියවර ගන්නා බවත් නීතිපතිවරයා වැඩිදුරටත් අවධාරණය කර තිබේ.
ජූලි 16 වන බ්රහස්පතින්දා ඩවුන්ටවුන් ඩුබායි (Downtown Dubai) ප්රදේශයේ පිපිරීම් ඇති වූ බවට රොයිටර් (Reuters) පුවත් සේවය විසින් පළ කළ වාර්තාව අසත්ය බව ඩුබායි මාධ්ය කාර්යාලය විසින් එදිනම තහවුරු කරන ලදී. ඒ අනුව එදිනම සවස අදාළ ප්රවෘත්තිය ඉවත් කරගත් රොයිටර් ආයතනය, සිය ප්රවෘත්තිය සම්මත ප්රමිතීන්ට අනුකූල නොවන බව පිළිගනිමින් කනගාටුව පළ කර නිවේදනයක් නිකුත් කළේය. අදාළ ශබ්ද නිකුත් වූයේ කොතැනින්ද යන්න හෝ ඒවායේ ස්වභාවය ක්ෂණිකව තහවුරු කර ගැනීමට ඔවුන්ට නොහැකි වූ බවත්, ඒ පිළිබඳව නිසි පැහැදිලි කිරීමක් මුල් වාර්තාව මගින් ලබා දී නොමැති බවත් එම නිවේදනයේ වැඩිදුරටත් සඳහන් විය. මීට අමතරව ඩුබායි මාධ්ය කාර්යාලය විසින් නිකුත් කළ ප්රතික්ෂේප කිරීමේ ප්රකාශයද ඇතුළත් කරමින් නව වාර්තාවක් ඔවුන් විසින් ප්රකාශයට පත් කරන ලදී.
ඕනෑම වැදගත් සිදුවීමක් සම්බන්ධයෙන් නිල සමාජ මාධ්ය සහ අනෙකුත් නාලිකා ඔස්සේ මහජනතාව දැනුවත් කිරීමට එක්සත් අරාබි එමීර් බලධාරීන් නිරන්තරයෙන් කටයුතු කරන බැවින්, සෑම විටම නිල මූලාශ්ර කෙරෙහි පමණක් විශ්වාසය තබන ලෙසත් කටකතා පැතිරවීමෙන් වළකින ලෙසත් ඩුබායි මාධ්ය කාර්යාලය ජනතාවගෙන් ඉල්ලා සිටියි. දේශීය හා ෆෙඩරල් නීති උල්ලංඝනය කරමින් අසත්ය හෝ තහවුරු නොකළ තොරතුරු පළ කරන මාධ්ය ආයතනවලට එරෙහිව පියවර ගන්නා බවටද බලධාරීන් අනතුරු අඟවා ඇත. තහවුරු නොකළ අන්තර්ගතයන් හුවමාරු කිරීම සහ සමාජගත කිරීම සම්බන්ධයෙන් පසුගිය මාර්තු මාසයේදී ඩුබායි පොලිසිය විසින්ද අනතුරු ඇඟවීමක් කර තිබූ අතර, එවැනි නීති උල්ලංඝනය කරන්නන්ට සිරදඬුවම් සහ ඩිරාම් 200,000 කට නොඅඩු දඩයක් ඇතුළු අපරාධ දඬුවම්වලට මුහුණ දීමට සිදුවන බව ඔවුන් සිහිපත් කර දී තිබුණි.