යාපනය නගරයේදී තරුණයෙකු බලහත්කාරයෙන් පැහැරගෙන ගොස්, නිරුවත් කර අමානුෂික ලෙස වධහිංසා පැමිණවීමේ සාහසික සිද්ධියකට සම්බන්ධ පස්දෙනෙකුගෙන් යුත් දරුණු කල්ලියක් තියුණු කඩු සහ මත්ද්රව්ය ද සමඟින් කොටුකර ගැනීමට යාපනය පොලීසිය සමත්ව තිබේ. ඉකුත් 5 වැනිදා යාපනය හින්දු විද්යාලය අසල රැඳී සිටි මෙම තරුණයා මෙම පිරිස විසින් බලහත්කාරයෙන් පැහැරගෙන ගොස් ඇති බව අනාවරණය වේ.
එලෙස පැහැරගත් තරුණයා කිසියම් රහසිගත ස්ථානයකට රැගෙන ගොස්, ඔහුගේ ඇඳුම් ගලවා නිරුවත් කරමින් අතිශය අමානුෂික අන්දමින් වධහිංසා පමුණුවා ඇත. පසුව වධහිංසනයන් හේතුවෙන් බරපතළ ලෙස තුවාල ලබා සිටි එම තරුණයා යාපනය බොස්කෝ පාසල අසලට ගෙනවිත් දමා මෙම කල්ලිය එතැනින් පළාගොස් තිබේ. ලැබුණු බුද්ධි තොරතුරකට අනුව වහාම ක්රියාත්මක වූ පොලිස් නිලධාරීන් තුවාල ලබා සිටි තරුණයා සොයාගෙන, ඔහුව වෛද්ය පරීක්ෂණයක් සඳහා යොමු කිරීමට කටයුතු කර ඇත.
මේ අතරතුර, මාර්ගයේ රාජකාරියේ නිරතව සිටි පොලිස් නිලධාරීන්ට අධික වේගයෙන් සහ සැකකටයුතු ලෙස ධාවනය වූ මෝටර් රථයක් නිරීක්ෂණය වී තිබේ. පොලිසිය විසින් එය නැවැත්වීමට සංඥා කළ ද, එම නියෝග නොතකා නොනවත්වා ධාවනය කළ මෝටර් රථය පසුපස ලුහුබැඳ ගිය පොලිස් කණ්ඩායම, එය වටලා එහි සිටි සැකකරුවන් පස්දෙනා අත්අඩංගුවට ගැනීමට සමත් විය. මෙම මෝටර් රථය යාපනයේ ප්රමුඛ පෙළේ ව්යාපාරික සමාගමකට අයත් එකක් බවට පොලීසිය සැක කරයි.
අත්අඩංගුවට ගත් සැකකරුවන් සන්තකයේ තිබී සැලසුම් සහගත කඩු කැපීමේ සිදුවීම් සඳහා භාවිත කරන තියුණු කඩු දෙකක් සහ ග්රෑම් 2.5ක අයිස් මත්ද්රව්ය ප්රමාණයක් සොයාගෙන ඇත. විශේෂයෙන්ම, වැටලීමට ලක්වූ මෝටර් රථයේ දොරවල් සහ ආසන මත පැහැදිලි ලෙස ලේ පැල්ලම් තැවරී තිබූ බව නිරීක්ෂණය වී ඇති අතර, එහි තිබූ ලේ තැවරුණු ඇඳුමක් ද පොලිස් භාරයට ගැනීමට හැකි වී තිබේ.
මෙම සිදුවීම සම්බන්ධයෙන් යාපනය මූලස්ථාන පොලිස් පරීක්ෂකවරයාගේ සෘජු අධීක්ෂණය යටතේ යාපනය අපරාධ වැළැක්වීමේ ඒකකය මඟින් පුළුල් විමර්ශන කටයුතු අඛණ්ඩව සිදුකරනු ලබයි.