හලාවත ප්රදේශයේ වත්තකින් සුරතලයට ඇති දැඩි කිරීම සඳහා නිවසට රැගෙන ආ සති දෙකක් පමණ වයසැති බලු පැටවෙකු සපා කෑමේ සිද්ධියකින් පසු බිංගිරිය ප්රදේශයේ පදිංචි පුද්ගලයෙකු කුලියාපිටිය ශික්ෂණ රෝහලේ ප්රතිකාර ලබමින් සිටියදී ජීවිතක්ෂයට පත්ව තිබේ. මෙම මරණය සිදුවීමෙන් අනතුරුව, මියගිය පුද්ගලයා පදිංචිව සිටි නිවසේ සියලුම සාමාජිකයන්ට වහාම ක්රියාත්මක වන පරිදි ජල භීතිකා මර්දන එන්නත ලබා ගැනීමට පියවර ගන්නා ලෙස කුලියාපිටිය ශික්ෂණ රෝහලේ හදිසි මරණ පරීක්ෂක හෙට්ටිගමගේ නන්දන ප්රිය මහතා විසින් උපදෙස් දී ඇත.
බිංගිරිය පොලිසිය විසින් සිදු කරන ලද විමර්ශනවලට අනුව මීට මාසයකට පමණ ඉහතදී මෙම පුද්ගලයා අදාළ බලු පැටවා නිවසට රැගෙන විත් ඇති අතර, දිනක් අත්වැරදීමකින් බලු පැටවා ඔහුගේ පයට පෑගී ඇත. එහිදී කලබලයට පත් සත්වයා ඔහුව සපා කා ඇති අතර, ඉන් අනතුරුව මෙම පුද්ගලයා එල්ල කළ පා පහරක් හේතුවෙන් බලු පැටවා එම ස්ථානයේදීම මියගොස් තිබේ. පසුව මියගිය සත්වයාගේ සිරුර වළ දැමීමට ඔහු කටයුතු කර ඇත.
මියගිය අයගේ බිරිඳ සහ පුත්රයා විසින් හදිසි මරණ පරීක්ෂකවරයා ඉදිරියේ ලබාදුන් සාක්ෂි මගින් මෙම තොරතුරු අනාවරණය වී ඇති අතර, සපා කෑමෙන් පසු හදිසියේම රෝගාතුර වූ මෙම පුද්ගලයා කුලියාපිටිය ශික්ෂණ රෝහලට ඇතුළත් කර තිබේ. එහි විශේෂිත වෙන්කළ කාමරයක රඳවා ප්රතිකාර ලබමින් සිටියදී ඔහු මියගොස් ඇති අතර, සිරුර පිළිබඳ පශ්චාත් මරණ පරීක්ෂණය කුලියාපිටිය ශික්ෂණ රෝහලේ අධිකරණ වෛද්ය නිලධාරී කේ. ටී. ගවින්ද්ර මහතා විසින් පවත්වනු ලැබීය.
මරණයට නිශ්චිත හේතුව තහවුරු කරගැනීම සඳහා මියගිය තැනැත්තාගේ මොළයේ කොටස් වැඩිදුර විද්යාත්මක පරීක්ෂණ සඳහා රජයේ රස පරීක්ෂක දෙපාර්තමේන්තුවේ විශේෂඥයන් වෙත යොමු කිරීමට පියවර ගෙන ඇත. අදාළ රස පරීක්ෂක වාර්තාවන් ලැබීමෙන් අනතුරුව මරණයට නිල හේතුව ප්රකාශයට පත් කරන බව හදිසි මරණ පරීක්ෂකවරයා සඳහන් කළ අතර, බිංගිරිය පොලිසියේ පොලිස් සැරයන් අබේරුවන් මහතා (35918) විසින් මෙම මරණ පරීක්ෂණයේ සාක්ෂි මෙහෙයවීම සිදුකරන ලදී.
ජල භීතිකා රෝගය වැළඳීමෙන් මියගිය අයෙකු සම්බන්ධයෙන් ක්රියාත්මක වන විශේෂ සෞඛ්ය ආරක්ෂිත ක්රමවේදයන් අනුගමනය කරමින් මියගිය අයගේ දේහය තැන්පත් කළ මිනී පෙට්ටිය මුද්රා තැබීමට බලධාරීන් පියවර ගෙන තිබුණි. ඒ අනුව දැඩි සෞඛ්යාරක්ෂිත පියවර මධ්යයේ අවසන් කටයුතු කුලියාපිටිය කණදුල්ල පොදු සුසාන භූමියේදී සිදු කර අවසන් කෙරිණි.