මීගමුව බන්ධනාගාරය තුළ පසුගිය ජූලි 6 වනදා ඇති වූ දරුණු ප්රචණ්ඩකාරී ගැටුම පාලනය කිරීම සඳහා වෙඩි තැබූ බන්ධනාගාර නිලධාරියා වහාම ක්රියාත්මක වන පරිදි පල්ලෙකැලේ බන්ධනාගාරය වෙත තාවකාලිකව ස්ථාන මාරු කර යවා තිබේ. බන්ධනාගාර මාධ්ය ප්රකාශක සහ බන්ධනාගාර කොමසාරිස් ඒ.සී.
ගජනායක මහතා විසින් මෙම තීරණය තහවුරු කර ඇති අතර, අදාළ වෙඩි තැබීම බන්ධනාගාර රෙගුලාසිවලට අනුකූලව සිදු වූවක්ද නැතහොත් බලය ඉක්මවා යාමකද යන්න තීරණය කිරීම සඳහා මේ වන විට විශේෂ විමර්ශනයක් ද ආරම්භ කර ඇත.සිද්ධිය සම්බන්ධයෙන් සිදු කළ මූලික පරීක්ෂණවලදී හෙළි වී ඇත්තේ රැඳවියන් පිරිසක් එහි සිටි නිලධාරීන්ට අමානුෂික ලෙස පහර දෙමින් බන්ධනාගාරයේ අවසාන ලී දොර ද කඩාගෙන පළා යාමට දැඩි උත්සාහයක නිරත වී ඇති බවයි. බන්ධනාගාර නිලධාරීන් දස දෙනෙකු ඇතුළුව පුද්ගලයින් 33 දෙනෙකුට ජීවිත අහිමි කළ මෙම දරුණු ගැටුම අවස්ථාවේදී, කලහකාරී රැඳවියන් කිහිප දෙනෙකු ප්රාණ ඇපයට ගෙන සිටි සහෝදර නිලධාරීන්ගේ ජීවිත ආරක්ෂා කර ගැනීම සහ තත්ත්වය පාලනය කිරීම වෙනුවෙන් අදාළ නිලධාරියාට සිය ගිනිඅවිය භාවිත කිරීමට සිදු වී තිබේ.
බන්ධනාගාරයේ ප්රධාන දොරටුව අවහිර කරමින් පිටතට පැනීමට උත්සාහ කළ රැඳවියන් දෙසට මෙම නිලධාරියා ප්රධාන දොරටුවෙන් ඇතුළතට ක්ෂණික වෙඩි ප්රහාර එල්ල කර ඇති අතර, ඉන් කලබලයට පත් වූ රැඳවියන් දොරටුව අතහැර පළා ගොස් ඇත. ඉන් අනතුරුව ක්රියාත්මක වූ බන්ධනාගාර නිලධාරීන් සහ පොලිස් විශේෂ කාර්ය බලකායේ (STF) භටයින් වහාම දොරවල් විවෘත කර ප්රාණ ඇපයේ සිටි පිරිස් මෙන්ම තුවාල ලැබූ රැඳවියන් ද බේරාගෙන රෝහල්ගත කිරීමට පියවර ගෙන තිබේ.
තමන්ගේ ජීවිතය පරදුවට තබමින් බන්ධනාගාරයේ ආරක්ෂාව තහවුරු කළ මෙම නිලධාරියාට ඩුබායි රාජ්යය ඇතුළු විදේශයන්හි සිට ක්රියාත්මක වන පාතාල කල්ලිවලින් මේ වන විට දිගින් දිගටම මරණීය තර්ජන එල්ල වෙමින් පවතින බව වාර්තා වේ. ඝාතනයට ලක්වූ සහෝදර නිලධාරීන්ට අවසන් ගෞරව දැක්වීම සඳහා වැලිකඩ බන්ධනාගාරය වෙත පැමිණි අධිකරණ හා බන්ධනාගාර කටයුතු අමාත්ය හර්ෂණ නානායක්කාර මහතාව වටකරගත් බන්ධනාගාර නිලධාරීන්, පාතාල තර්ජනවලට ලක්ව සිටින මෙම නිලධාරියාගේ ජීවිතය ආරක්ෂා කර ගැනීමට වහාම නිසි ආරක්ෂාවක් සපයන ලෙස එක හඬින් ඉල්ලා සිටියහ.
