කුරුණෑගල ප්රදේශයේ කාර්මික විද්යාලයක සිසුන් දෙදෙනෙකුට රුපියල් සියයක මුදලක් ඉල්ලා සිදුකළ දරුණු පහරදීමක වීඩියෝ පටයක් සමාජ මාධ්ය ජාලාවල සංසරණය වීමත් සමඟ ක්රියාත්මක වූ කුරුණෑගල පොලිසිය, ඊට සම්බන්ධ සැකකරුවන් සිව්දෙනෙකු අත්අඩංගුවට ගෙන රක්ෂිත බන්ධනාගාරගත කිරීමට පියවර ගෙන තිබේ. පසුගිය 2026 ජූනි මස 25 වනදා සිදුවූ මෙම පහරදීමට අදාළ දර්ශන ප්රසිද්ධියට පත්වීමෙන් පසු පොලිස් නිලධාරීන් විසින් මේ පිළිබඳ පුළුල් විමර්ශනයක් ආරම්භ කර ඇත.
මෙලෙස ප්රහාරයට ලක්ව ඇත්තේ වයඹ ටෙක් කාර්මික විද්යාලයේ ඉගෙනුම ලබන, කුරුණෑගල බමුණුගෙදර ප්රදේශයේ ලැගුම්ගෙයක නේවාසිකව සිටින 19 හැවිරිදි වියේ පසුවන සිසුන් දෙදෙනෙකි. ඔවුන් දෙදෙනා සිය නේවාසිකාගාරය බලා ගමන් කරමින් සිටියදී මාර්ගයේදී ඇතිවූ බහින්බස්වීමක් දුරදිග යාමෙන් මෙම පහරදීම සිදුව ඇති අතර, තුවාල ලැබූ සිසුන් දෙදෙනා වහාම ප්රතිකාර සඳහා කුරුණෑගල රෝහලට ඇතුළත් කර තිබේ.
සිද්ධිය සම්බන්ධයෙන් පොලිසිය වෙත ලැබුණු පැමිණිලි සැලකිල්ලට ගනිමින් විශේෂ විමර්ශන කණ්ඩායම් දෙකක් යොදවා දියත් කළ මෙහෙයුමක ප්රතිඵලයක් ලෙස 2026 ජූනි මස 30 වනදා මෙම සැකකරුවන් සිව්දෙනා කොටුකර ගැනීමට පොලිසියට හැකිවී තිබේ. මෙලෙස අත්අඩංගුවට පත්ව ඇත්තේ වයස අවුරුදු 19, 24 සහ 25 යන වයස් කාණ්ඩවල පසුවන ගෙපල්ලව, වීරඹුගෙදර සහ උහුමිය යන ප්රදේශවල පදිංචිකරුවන් පිරිසකි.
අත්අඩංගුවට ගත් සැකකාර තරුණයින් පිරිස 2026 ජූලි මස 01 වනදා කුරුණෑගල ගරු මහේස්ත්රාත් අධිකරණය වෙත ඉදිරිපත් කිරීමෙන් අනතුරුව, එළඹෙන 2026 ජූලි මස 15 වනදා දක්වා රක්ෂිත බන්ධනාගාරගත කිරීමට මහේස්ත්රාත්වරයා නියෝග කර ඇත. මොවුන්ට එරෙහිව අයුතු ජනරාශියක සාමාජිකයන් ලෙස කටයුතු කරමින් බලහත්කාරයෙන් මුදල් ලබාගැනීමට උත්සාහ කිරීම සහ පුද්ගලයන් දෙදෙනෙකුට පහරදී තුවාල සිදුකිරීම යන චෝදනා යටතේ නඩු පවරා තිබේ. සැකකරුවන් සිද්ධිය සඳහා පැමිණි TVS වර්ගයේ යතුරුපැදිය ද පොලිසිය විසින් නඩු භාණ්ඩයක් ලෙස අධිකරණයට ඉදිරිපත් කර ඇති අතර කුරුණෑගල පොලිසිය මේ පිළිබඳ වැඩිදුර විමර්ශන මෙහෙයවයි.
