ශ්රී ලංකාවට ආනයනය කරනු ලබන පාවිච්චි කළ වාහන සඳහා මෙතෙක් ක්රියාත්මක වූ සියයට 15ක වටිනාකම් අඩු කිරීමේ පටිපාටිය ඉවත් කිරීමට පියවර ගැනීමත් සමඟ, ඉදිරි කාලයේදී මෙරට වෙළඳපොළේ එම වාහනවල මිල ගණන් සැලකිය යුතු මට්ටමකින් ඉහළ යාමේ අවදානමක් මතුව තිබේ. ශ්රී ලංකා වාහන ආනයනකරුවන්ගේ සංගමය (VIASL) පෙන්වා දෙන්නේ රේගු වාහන තක්සේරු කිරීමේ ක්රමවේදයට එක් කර ඇති මෙම නව වෙනස්කම් හේතුවෙන් මෙරට පාරිභෝගිකයන් අතර බෙහෙවින් ජනප්රිය වාහන මාදිලි රැසක මිල ගණන් විශාල වශයෙන් ඉහළ යනු ඇති බවයි.
මේ යටතේ හොන්ඩා වෙසල් (Honda Vezel) වර්ගයේ මෝටර් රථයක මිල රුපියල් මිලියන 2කින් පමණ සහ සුසුකි වැගන් ආර් (Suzuki Wagon R) වර්ගයේ රථයක මිල රුපියල් ලක්ෂ 7කින් පමණ ඉහළ යා හැකි බව එම සංගමයේ මාධ්ය ප්රකාශක ආරෝෂ රොද්රිගෝ මහතා ප්රකාශ කර සිටියි.මෙතෙක් පැවති සියයට 15ක අගය අඩු කිරීමේ සහනය අහෝසි කිරීම හේතුවෙන් වාහනවල රේගු තක්සේරු වටිනාකම ඉහළ යන අතර, එහි සෘජු ප්රතිඵලයක් ලෙස වාහන මත පනවන බදු සහ තීරු ගාස්තුද ඉහළ යනු ඇත. මෙහි අවසාන බලපෑම එල්ල වන්නේ සාමාන්ය පාරිභෝගිකයා වෙත වන අතර ඔවුන්ට වාහන සඳහා අධික මිලක් ගෙවීමට සිදුවන බව වාහන ආනයනකරුවන්ගේ සංගමය පවසයි. මෝටර් රථවල රේගු වටිනාකම නිර්ණය කිරීම සඳහා වූ ක්රමවේද දෙකක් 2016 ජුනි මස 14 වන දින නිකුත් කරන ලද අංක 1971/10 දරන විශේෂ ගැසට් පත්රය මගින් හඳුන්වා දී තිබූ අතර, ඉන් පාවිච්චි කරන ලද වාහන සඳහා අදාළ වන රෙගුලාසිවලට මෙම සංශෝධනය සිදු කර ඇත. වෙළඳපොළේ පවතින සැබෑ ගනුදෙනු වටිනාකම සහ සිල්ලර මිල අතර පවතින පරතරය නිවැරදිව ගැලපීමේ අරමුණින් මුල් වකවානුවේදී මෙම සියයට 15ක සහනය ලබා දීමට කටයුතු කර තිබුණි.
පාවිච්චි කළ වාහන සඳහා මෙවැනි සහනයක් ලබා දීම හේතුවෙන් රජයට ලැබිය යුතු ආදායම් අහිමි වන බවට ඇතැම් පාර්ශව නගන චෝදනා වාහන ආනයනකරුවන්ගේ සංගමය සපුරා ප්රතික්ෂේප කරයි. ඔවුන් පෙන්වා දෙන්නේ විදේශීය වෙළඳපොළේ පවතින සිල්ලර මිල ගණන් යනු නියමිත ගනුදෙනු සිදුවන මිල නොවන බවයි. තොග වශයෙන් මිලදී ගැනීමේදී හිමිවන වට්ටම්, අලෙවිකරුවන්ගේ ලාභාංශ මෙන්ම අදාළ රටවල දේශීය බදු වැනි විවිධ සාධක නිසා වාහනයක සැබෑ වටිනාකම සහ සිල්ලර මිල අතර පැහැදිලි වෙනසක් පවතින බව ඔවුහු අවධාරණය කරති. එබැවින් මෙම පියවර රජයෙන් ලබා දුන් විශේෂ වරප්රසාදයක් නොව වෙළඳපොළ යථාර්ථයන්ට අනුකූලව රේගු වටිනාකම සැකසීමක් පමණක් වන බැවින්, ජනතාවගේ වාහන මිලදී ගැනීමේ හැකියාව සහ වාහන ආනයන ක්ෂේත්රයේ පැවැත්ම වෙනුවෙන් මෙම තීරණය නැවත සමාලෝචනය කරන ලෙස ඔවුහු බලධාරීන්ගෙන් ඉල්ලා සිටිති.
