වසරේ ගත වූ කාලසීමාව තුළ මෙරට වාර්තා වී ඇති සමස්ත ඩෙංගු මරණ සංඛ්යාව 31 දක්වා ඉහළ ගොස් ඇති බව ජාතික ඩෙංගු මර්දන ඒකකය නිවේදනය කරයි. මෙම කාලය තුළ දිවයින පුරා සෞඛ්ය නිලධාරී කොට්ඨාස 124ක් අධි අවදානම් කලාප ලෙස හඳුනාගෙන තිබේ.
දැනට වාර්තා වී ඇති සමස්ත ඩෙංගු රෝගීන් සංඛ්යාව 51,049ක් වන අතර, ඉන් මියගිය පිරිස ප්රතිශතයක් ලෙස සලකා බැලීමේදී එය සියයට 0.06ක අගයක් ගන්නා බව එම ඒකකය වැඩිදුරටත් සඳහන් කරයි.රෝගීන් වාර්තා වීම අතින් බස්නාහිර පළාත පෙරමුණේ පසුවන අතර සමස්ත රෝගීන්ගෙන් සියයට 51ක්ම වාර්තා වී ඇත්තේ එම පළාතෙනි. ජුනි මාසය තුළ පමණක් රෝගීන් 17,208 දෙනෙකු අලුතින් හඳුනාගෙන ඇතැයි ජාතික ඩෙංගු මර්දන ඒකකය පවසයි. බස්නාහිර පළාතට අමතරව දකුණ, සබරගමුව, මධ්යම සහ නැඟෙනහිර පළාත්වලින් ද ඉහළ රෝගීන් සංඛ්යාවක් වාර්තා වන බව අනාවරණය වී තිබේ.
පවතින දැඩි අවදානම් තත්ත්වය හේතුවෙන් කොළඹ ජාතික රෝහල, කළුබෝවිල රෝහල සහ අයි.ඩී.එච්. රෝහල ඇතුළු රෝහල් කිහිපයකම ඩෙංගු රෝගී ධාරිතාව මේ වන විට ඉක්මවා ගොස් ඇති බව සෞඛ්ය අංශ පෙන්වා දෙයි. මෙම වසංගත තත්ත්වය පාලනය කිරීම සඳහා දිවයිනේ සියලුම ප්රදේශ ආවරණය වන පරිදි මදුරු මර්දන වැඩසටහන් සක්රියව ක්රියාත්මක කිරීමට ජාතික ඩෙංගු මර්දන ඒකකය පියවර ගෙන ඇත.