රෝගීන්ගේ ආරක්ෂාව මෙන්ම ප්රතිකාර ක්රියාවලිය කෙරෙහි සෘජු බලපෑමක් එල්ල කළ හැකි ක්රියාකාරී දෝෂ කිහිපයක් වාර්තා වීම හේතුවෙන්, රජයේ රෝහල්වල භාවිත වන වෛද්ය උපකරණ වර්ග දෙකකට අයත් විශේෂ කාණ්ඩ කිහිපයක් වහාම ක්රියාත්මක වන පරිදි ඉවත් කිරීමට වෛද්ය සැපයුම් අංශය (MSD) පියවර ගෙන ඇත. ජාතික ඖෂධ නියාමන අධිකාරිය (NMRA) සහ වෛද්ය උපකරණ ඇගයීම් කමිටුව (MDEC) විසින් ලබා දෙන ලද නිර්දේශ පදනම් කර ගනිමින් මෙම තීරණය ගෙන තිබේ.
ඒ අනුව අදාළ උපකරණ භාවිතය වහාම නතර කර ඒවා සංසරණයෙන් ඉවත් කරන ලෙස දන්වමින් සියලුම රෝහල්, පළාත් සහ ප්රාදේශීය සෞඛ්ය සේවා අධ්යක්ෂවරුන් ඇතුළු බලධාරීන් වෙත විශේෂ චක්රලේඛ මගින් මේ වන විටත් උපදෙස් නිකුත් කර ඇත.මෙලෙස භාවිතයෙන් ඉවත් කිරීමට නියෝග කර ඇති එක් උපකරණයක් වන්නේ චීනයේ BAO Health Medical Instruments සමාගම විසින් නිෂ්පාදනය කර ඇති 'Colostomy Appliance Set Complete' වර්ගයේ කොලොස්ටොමි බෑග් විශේෂයකි. මෙහි DD202508-1301, DD202311-19 සහ DD202405-01 යන කාණ්ඩ අංක යටතේ පවතින උපකරණවල ඇලෙනසුලු ස්වභාවයේ දුර්වලතා පවතින බව සොයාගෙන තිබේ. මෙම දෝෂය හේතුවෙන් රෝගීන්ගේ සම මතුපිට ආසාදන ඇතිවීමේ අවදානමක් පවතින අතර, අදාළ බෑග් ඵලදායී ලෙස භාවිත කළ හැකි කාලසීමාව ද සැලකිය යුතු මට්ටමකින් පහත වැටී ඇති බව නිකුත් කළ වෘත්තීය උපදෙස් මාලාවේ සඳහන් වේ.
මීට සමගාමීව, හෘද රෝග ආශ්රිත පරීක්ෂණ සඳහා බහුලව භාවිත කරන 'Angiodyn' සන්නාමය සහිත ඇන්ජියෝග්රැෆික් කැතීටර් (Angiographic catheter) විශේෂයක් ද රෝහල් පද්ධතියෙන් ඉවත් කිරීමට කටයුතු කර ඇත. නෙදර්ලන්තයේ PendraCare International ආයතනය විසින් නිෂ්පාදිත මෙම කැතීටරවල අදාළ කාණ්ඩ අංකය 2307-0076 වන අතර, එහි කල් ඉකුත්වීමේ දිනය ලෙස සටහන්ව ඇත්තේ 2026 ජූනි 30 දිනයි. මෙම උපකරණය හැසිරවීමේදී ඇති වන අපහසුතා, දකුණු හෘද ධමනිය වෙත නිසි පරිදි ඇතුළු කිරීමට නොහැකි වීම සහ එය අනවශ්ය ලෙස ගැඹුරට ගමන් කිරීමේ ප්රවණතාවක් පැවතීම වැනි කරුණු වෛද්යවරුන් විසින් වාර්තා කර ඇති අතර, රෝගී ආරක්ෂාවට එල්ල වන මෙම බරපතළ තර්ජනය සැලකිල්ලට ගනිමින් වෛද්ය සැපයුම් අංශය මෙම පියවර ගෙන තිබේ.