ප්රකට පේනකාරියක වන බාබා වන්ගා විසින් සිදුකරන ලදැයි පැවසෙන ‘ලෝක මට්ටමේ ක්රීඩා තරඟයකදී සිදුවන පිටසක්වල ජීවීන්ගේ ආක්රමණයක්’ පිළිබඳ අනාවැකියක් නැවතත් කරළියට පැමිණ තිබේ. බ්රසීල ජාතික, තමන්වම අධ්යාත්මික උපදේශකවරියක ලෙස හඳුන්වාගන්නා වෝ බහියානා නමැති කාන්තාව ප්රකාශ කරන්නේ ජූනි 24 වනදා ෆ්ලොරිඩාහි පැවැත්වෙන ලෝක කුසලාන පාපන්දු තරඟයකට පිටසක්වල ජීවීන් කඩා වැදී ක්රීඩකයින් සහ ප්රේක්ෂකයින් පැහැරගනු ඇති බවයි.
බ්රසීලය සහ ස්කොට්ලන්තය අතර මියාමිහි පැවැත්වීමට නියමිත මෙම තරඟයේදී සජීවී රූපවාහිනී විකාශනයක් මධ්යයේ දහස් සංඛ්යාත පිරිසක් පිටසක්වල ජීවීන්ගේ ග්රහණයට ලක්වීමට නියමිත බවට ඇය අනතුරු අඟවයි.සමාජ මාධ්ය ඔස්සේ මිලියන 23කට අධික අනුගාමිකයින් පිරිසක් සිටින බහියානා පවසන්නේ මෙම මස තුළ තමන් දෙවතාවක්ම මේ පිළිබඳව සිහිනෙන් දුටු බවයි. මියාමි ක්රීඩාංගණයට පිටසක්වල යානා කිහිපයක් පැමිණෙන බවත්, ඉන් ප්රධාන මව් යානය මඟින් විශාල යාන්ත්රික අත් වැනි උපකරණ භාවිත කරමින් මිනිසුන් පැහැරගන්නා අයුරුත් තමන් සිහිනයෙන් දුටු බව ඇය කඳුළු පිරි දෑසින් යුතුව ඉන්ස්ටග්රෑම් වීඩියෝවක් මඟින් ප්රකාශ කර තිබේ. එහිදී ක්රීඩකයින් සහ ප්රේක්ෂකයින් දැඩි ලෙස බියට පත්ව හඬා වැලපෙන දර්ශන තමන්ට පැහැදිලිව දර්ශනය වූ බව පවසන ඇය, මේ සඳහා කෘතිම බුද්ධිය (AI) මඟින් නිර්මාණය කරන ලද වීඩියෝවක්ද සමාජ මාධ්ය වෙත මුදාහැර ඇත.
ඇයගේ ප්රකාශයට අනුව, මෙම ප්රධාන යානයට අමතරව 'රෙප්ටිලියන්ස්' ලෙස හැඳින්වෙන, පෘථිවියේ මිනිසුන් මෙන් ජීවත් වන බවට කුමන්ත්රණන්කාරී මත පවතින පිටසක්වල ජීවී කණ්ඩායමක් රැගත් දෙවන යානයක්ද එදිනට පැමිණීමට නියමිතය. කෙසේ වෙතත්, මෙම අද්භූත අනාවැකිය හේතුවෙන් සමාජ මාධ්ය පරිශීලකයින් බහුතරයක් ඇයව දැඩි උපහාසයකට සහ විවේචනයට ලක් කර තිබේ.
මෙවැනි විවේචන මධ්යයේ වුවද, බ්රසීලය තුළ ඇයට විශාල ජනප්රියත්වයක් හිමිව ඇත්තේ මීට පෙර ඇය විසින් කරන ලදැයි කියන සමහර අනාවැකි සත්ය වීම හේතුවෙනි. බ්රසීලයේ රියෝ ග්රෑන්ඩ් ඩෝ සුල් ප්රාන්තයේ ඇති වූ විනාශකාරී ගංවතුර තත්ත්වය මෙන්ම ක්රිස්ටියන් සහ ජෝ කාර්නෙයිරෝ වැනි ප්රකට සංගීතඥයින්ගේ හදිසි මරණ පිළිබඳවද ඇය කලින් ප්රකාශ කර තිබූ බව ඇයගේ ආධාරකරුවෝ පවසති. කෙසේ වෙතත්, මෙවැනි පිටසක්වල ආක්රමණයක් සිදුවීමට ඇති ඉඩකඩ පිළිබඳව අමෙරිකානු මධ්යම විමර්ශන කාර්යාංශය (FBI) සහ දේශීය ආරක්ෂක දෙපාර්තමේන්තුව (DHS) අවධාරණය කරන්නේ එවැනි සිදුවීමක් පිළිබඳව කිසිදු සාක්ෂියක් හෝ තොරතුරක් තමන් සතුව නොමැති බවයි.
හිටපු අමෙරිකානු ජනාධිපති ඩොනල්ඩ් ට්රම්ප් විසින් දශක ගණනාවක් පුරා එකතු කරන ලද පිටසක්වල ජීවීන් සහ හඳුනානොගත් පියාසර වස්තූන් (UFOs) පිළිබඳ රහස්ය ගොනු ප්රසිද්ධ කිරීමට නියෝග කිරීමෙන් පසු මේ පිළිබඳව ලෝක අවධානය නැවතත් දැඩි ලෙස යොමු විය. මේ වන විට අදියර තුනකින් නිකුත් කර ඇති මෙම නිල වාර්තා මඟින් මෙතෙක් පැහැදිලි කළ නොහැකි වූ අද්භූත සිදුවීම් සහ දර්ශන රැසක් අනාවරණය කර ඇතත්, රජය මෙවැනි ක්ෂණික පිටසක්වල ආක්රමණ පිළිබඳ මතයන් මෙතෙක් තහවුරු කර නොමැත.