වත්මන් රජයේ ක්රියාකලාපය සහ අමාත්ය කේ.ඩී. ලාල්කාන්ත මහතාගේ හැසිරීම දැඩි විවේචනයට ලක් කරමින් ඒකාබද්ධ විපක්ෂය විසින් අලුත් චෝදනා පත්රයක් සමාජගත කර තිබේ.
ඒකාබද්ධ විපක්ෂය මෙහෙයවූ සම්මන්ත්රණයකට එක්වෙමින් විපක්ෂ පාර්ලිමේන්තු මන්ත්රී චාමර සම්පත් දසනායක මහතා අනාවරණය කළේ, අමාත්ය ලාල්කාන්ත මහතා රුපියල් මිලියන ගණනක අතිවිශාල මුදලක් වැය කරමින් මහරගම සහ කඩුවෙල යන ප්රදේශවල සුඛෝපභෝගී මන්දිර දෙකක් නිර්මාණය කරමින් සිටින බවයි. මහනුවර දිස්ත්රික්කයේ ජනතාවගෙන් මනාප තුන්ලක්ෂයකට අධික බලගතු ජනවරමක් ලබාගෙන පාර්ලිමේන්තුවට පිවිසි මෙම අමාත්යවරයා, මෑතකදී සිදුවූ 'දිට්වා' (Ditwah) ආපදාවෙන් අසරණ වූ පොදු ජනතාවට නිවාස සලසා දෙනු වෙනුවට තමන්ගේ පෞද්ගලික පරිහරණය සඳහා මෙලෙස නිවාස ඉදිකිරීම කණගාටුදායක බව මන්ත්රීවරයා පැවසීය. මීට අමතරව, නව සුඛෝපභෝගී වාහන පරිහරණයෙන් වැළකී සිටින බවට ජනතාව හමුවේ දිවුරා ප්රකාශ කළ වත්මන් රජයේ අමාත්යවරුන්, අද වන විට එම පොරොන්දු සම්පූර්ණයෙන්ම අමතක කර ඊට හාත්පසින්ම වෙනස් ආකාරයකින් කටයුතු කරන බවද ඔහු වැඩිදුරටත් කියා සිටියේය.පසුගිය 2024 වසරේ පැවැති මහ මැතිවරණයට විපක්ෂයේ ඇතැම් දේශපාලන කණ්ඩායම් තරග නොකිරීමට තීරණය කිරීමේ වාසිය ජාතික ජන බලවේගය වෙත හිමිවූ බවත්, ඒ හේතුවෙන් ඔවුන්ට පාර්ලිමේන්තුවේ ආසන 150 ඉක්මවා යාමට හැකිවූ බවත් දසනායක මහතා මෙහිදී පෙන්වා දුන්නේය. එම දේශපාලනඥයන් මැතිවරණයට ඉදිරිපත් වූයේ නම් වත්මන් රජයට ලබාගත හැක්කේ ආසන 120කට ආසන්න සංඛ්යාවක් පමණක් බව පැවසූ මන්ත්රීවරයා, රූපවාහිනී වැඩසටහනක් හරහා තමන් සිදුකළ මෙම ප්රකාශයෙන් පසුව තමන්ව සිරගත කිරීම සඳහා අවශ්ය සාක්ෂි සොයන ලෙස රජය විසින් බලධාරීන්ට නියෝග කර ඇති බවද අනාවරණය කළේය.
මේ අතර, පසුගිය දිනවල මෙරට මුහුණ දුන් 'දිට්වා' ආපදා තත්ත්වය ස්වාභාවික හේතූන් මත සිදුවූවක් නොව මිනිස් වැරදි නිසා නිර්මාණය වූවක් බව හිටපු පාර්ලිමේන්තු මන්ත්රී පාඨලී චම්පික රණවක මහතා ප්රකාශ කර තිබේ. කාලගුණ විද්යා දෙපාර්තමේන්තුව විසින් නොවැම්බර් මස 12 වැනිදා ඒ සම්බන්ධයෙන් පළමු අනතුරු ඇඟවීම නිකුත් කර තිබියදීත්, ප්රධාන ජලාශවල වාන් දොරටු ක්රමවත් සැලසුමකට අනුව විවෘත කිරීමට පියවර නොගෙන, නොවැම්බර් 27 වැනිදායින් පසු කොත්මලේ ඇතුළු ජලාශවල දොරටු එකවරම සහ හදිසියේ විවෘත කිරීම මෙම මහා ව්යසනයට මඟ පෑදූ බව ඔහු පැවසීය. විශේෂයෙන්ම රන්දෙනිගල ජලාශයේ දොරටු හදිසියේ විවෘත කිරීම නිසා ලාංකීය ඉතිහාසයේ ප්රථම වතාවට මහියංගනය නගරය ජලයෙන් යටවූ බව පෙන්වා දුන් රණවක මහතා, ආපදා කළමනාකරණ විෂය භාරව කටයුතු කරන ජනාධිපති අනුර කුමාර දිසානායක සහ මහවැලි විෂය භාර අමාත්ය ලාල්කාන්ත යන මහත්වරුන් මෙම විනාශයට සෘජුවම වගකිව යුතු බවට චෝදනා කළේය. නිසි වේලාවට බලධාරීන් නිවැරදි තීරණ ගත්තේ නම් මෙම මහා ජන පීඩාව වළක්වා ගැනීමට ඕනෑවටත් වඩා ඉඩකඩ තිබූ බවද ඔහු අවධාරණය කළේය.
හිටපු ජනාධිපති රනිල් වික්රමසිංහ මහතාගේ පාලන සමය තුළදී ජාත්යන්තර මූල්ය අරමුදල සමඟ ඇති කරගත් නිල එකඟතා සහ වැඩපිළිවෙළ වත්මන් රජය විසින් සම්පූර්ණයෙන්ම පැහැර හරිමින් සිටින බව හිටපු පාර්ලිමේන්තු මන්ත්රී වජිර අබේවර්ධන මහතා ප්රකාශ කළේය. රටේ ආර්ථික ස්ථාවරත්වය වෙනුවෙන් ඇමරිකානු ඩොලර් බිලියන 8ක විදේශ සංචිතයක් පවත්වාගෙන යාමට ශ්රී ලංකාව බැඳී සිටියද, වත්මන් පාලනය එය සාක්ෂාත් කර ගැනීමට අපොහොසත් වී ඇති බව ඔහු පැවසීය. එමෙන්ම, ඩොලර් මිලියන 2.5ක මුදලක් වංචා කිරීම, විදේශ ණය පියවන ආකාරය සම්බන්ධයෙන් ප්රතිපාදන සලසා ඇති මහ බැංකු සංශෝධන පනත සෘජුවම උල්ලංඝනය කිරීමක් බවද හෙතෙම පෙන්වා දුන්නේය.
වත්මන් ආණ්ඩුවේ ක්රියාකලාපයන් හේතුවෙන් ශ්රී ලාංකීය ජන සමාජයේ පවතින මූලික හර පද්ධතීන් මෙන්ම බුදුදහමට හිමි තැනද විනාශ වෙමින් පවතින බව පාර්ලිමේන්තු මන්ත්රී දයාසිරි ජයසේකර මහතා ප්රකාශ කළ අතර, ජනතාව සතු මෙම උතුම් වටිනාකම් ආරක්ෂා කර ගැනීම වෙනුවෙන් සියලුම විපක්ෂ දේශපාලන කණ්ඩායම් පොදු අරමුණක් වටා කඩිනමින් රොද බැඳගත යුතු බවට ඔහු යෝජනා කළේය. මේ අතර, රටම කැළඹූ පාස්කු ඉරිදා ත්රස්ත ප්රහාරයේ විමර්ශන සම්බන්ධයෙන් අදහස් දැක්වූ හිටපු අමාත්ය විජයදාස රාජපක්ෂ මහතා කියා සිටියේ, මෙම ප්රහාරය පිටුපස සංවිධානාත්මක කුමන්ත්රණයක් පවතින බවට තමන් ධුරයෙන් විශ්රාම ගන්නා දිනයේදී ප්රසිද්ධියේ ප්රකාශ කළ හිටපු නීතිපති දප්පුල ද ලිවේරා මහතාගෙන් ප්රකාශයක් සටහන් කර ගැනීමට රජය මෙතෙක් අපොහොසත් වී ඇති බවයි. කොළඹ අගරදගුරු මැල්කම් රංජිත් කාදිනල්තුමන් පවා මෙම කරුණ සම්බන්ධයෙන් දැඩි අවධානයක් යොමු කරමින් යුක්තිය ඉල්ලා සිටින පසුබිමක, රජය විසින් හිටපු නීතිපතිවරයාව මෙතෙක් ප්රශ්න නොකිරීම බරපතළ අඩුපාඩුවක් බව ඔහු වැඩිදුරටත් සඳහන් කළේය.
