ඩොනල්ඩ් ට්රම්ප් මහතා සිය වයසත් සමඟ මතුවන සෞඛ්යය සහ මානසික යෝග්යතාවය පිළිබඳව එල්ල වන දැඩි විවේචන සහ නිරීක්ෂණවලට නිරන්තරයෙන් මුහුණ දෙමින් සිටී. වයස අවුරුදු 80 සීමාවට පැමිණ සිටින ඔහුගේ සෞඛ්ය තත්ත්වය පිළිබඳව සමාජය සහ දේශපාලන ක්ෂේත්රය ප්රශ්න කළද, ට්රම්ප් මහතාගේ උපදේශකයින් සහ සහායකයින් එම චෝදනා තරයේ ප්රතික්ෂේප කරති.
ඔහු සතුව තවමත් ඉහළ ශක්තියක් සහ ක්රියාශීලීත්වයක් පවතින බව ඔවුහු පෙන්වා දෙති. කෙසේ වෙතත්, මෑතකදී සිදුකළ රොයිටර්/ඉප්සොස් (Reuters/Ipsos) මත විමසුමකට අනුව ඇමරිකානුවන් දස දෙනෙකුගෙන් හය දෙනෙකුම විශ්වාස කරන්නේ ට්රම්ප් මහතාගේ හැසිරීම් දිනෙන් දින අස්ථාවර වන බවයි.ට්රම්ප් මහතාගේ දෛනික කාලසටහන බොහෝ විට ප්රමාද වී ආරම්භ වන අතර, ඔහු රාත්රී කාලයේදී ඉතා ක්රියාශීලීව කටයුතු කරන බව වාර්තා වේ. ප්රමාද වී නින්දට යන ඔහු, නීතිඥයින් සහ දේශපාලනඥයින් සමඟ ප්රමාද වනතුරු දුරකථන සංවාදවල නිරත වන අතර, ඇතැම් රාත්රීන්වල ඔහුගේ 'ටෘත් සෝෂල්' (Truth Social) සමාජ මාධ්ය ජාලය ඔස්සේ 150 වතාවකට වඩා අදහස් පළ කරන බව සඳහන් වේ. මැඩිසන් ස්ක්වෙයාර් ගාඩන් හි පැවැති නිව්යෝර්ක් නික්ස් පැණසැරියක් අතරතුර ඔහු නින්දට වැටී සිටි බවට සැකයක් මතු වුවද, ඔහුගේ හිතවතුන් ප්රකාශ කළේ ඔහු ඉතා අවධියෙන් සහ අවධානයෙන් පසු වූ බවයි.
පසුගිය ජූනි 4 වනදා ඕවල් කාර්යාලයේ පැවැති සාකච්ඡාවකදී, පරිසර ආරක්ෂණ ඒජන්සියේ පරිපාලක ලී සෙල්ඩින් පරිසර නීති පිළිබඳව අදහස් දක්වමින් සිටියදී ට්රම්ප් මහතා තත්පර කිහිපයකට දෑස් පියාගෙන සිටින අයුරු දක්නට ලැබුණි. මෙම සිදුවීම ඔහුගේ සෞඛ්යය පිළිබඳ සැකයන් තවදුරටත් දැඩි කළද, ධවල මන්දිර නිලධාරීන් ප්රකාශ කළේ එය ඔහු තොරතුරු ග්රහණය කරගැනීමට දැක්වූ විශේෂ අවධානයක් මිස නින්දට යාමක් නොවන බවයි. මීට අමතරව, ඔහුගේ දෑත් නිතරම තැල්මකට ලක්වී හෝ වෙළුම් පටි දමා තිබීම පිළිබඳවද අවධානය යොමු වී ඇති අතර, නිලධාරීන් පවසන්නේ නිරන්තරයෙන් සිදුකරන දැඩි අතට අත දීම් (handshaking) හේතුවෙන් එය සිදුවී ඇති බවයි.
ට්රම්ප් මහතාගේ පෞද්ගලික වෛද්යවරයා වන වෛද්ය සීන් පී. බාබබෙල්ලා (Dr. Sean P. Barbabella) විසින් නිකුත් කරන ලද වෛද්ය වාර්තාවකට අනුව, ඔහු ඉතා විශිෂ්ට සෞඛ්ය තත්ත්වයකින් පසුවන බව සහතික කර ඇත. ඔහුගේ බුද්ධිමය සහ ශාරීරික ක්රියාකාරකම් ඉහළ මට්ටමක පවතින බව එම වාර්තාවේ සඳහන් වේ. එහි තවදුරටත් දැක්වෙන්නේ ඔහුගේ හෘද වාහිනී පද්ධතිය ස්ථාවර මට්ටමක පවතින නමුත්, කොලෙස්ටරෝල් පාලනය සඳහා ඖෂධ වර්ග දෙකක් ලබාගන්නා බවයි. එසේම, පාදවල නහර ආශ්රිතව ඇතිවන නිදන්ගත තත්ත්වයක් (chronic venous insufficiency) සඳහාද ඔහු ප්රතිකාර ලබන බව වෛද්ය වාර්තාවල සඳහන් වේ.
දේශපාලන ක්ෂේත්රයේ ප්රමුඛයින් වන රහ්ම් එමානුවෙල් වැනි ඩිමොක්රටික් පාක්ෂිකයින් පෙන්වා දෙන්නේ ජනාධිපති ධුරය වැනි ඉහළ වගකීමක් සහිත තනතුරක් දැරීමට දැඩි ශාරීරික හා මානසික ශක්තියක් අවශ්ය වන බැවින්, මෙතරම් වැඩිහිටි වයසක පසුවන අයෙකුට එය දැඩි අභියෝගයක් විය හැකි බවයි. එහෙත් ට්රම්ප් මහතාගේ පාර්ශවය සහ ඔහුගේ ආධාරකරුවන් නිරන්තරයෙන් අවධාරණය කරන්නේ ඔහු ඕනෑම තරුණ අයෙකුට වඩා ක්රියාශීලීව සහ ජවයකින් යුතුව කටයුතු කරන බැවින්, වයස ඔහුගේ රාජකාරි කටයුතුවලට හෝ නායකත්වයට කිසිදු බාධාවක් නොවන බවයි.
