තමිල්නාඩු ප්රාන්තයේ නව රජයක් පිහිටුවීම සම්බන්ධයෙන් පවතින දේශපාලන අවිනිශ්චිතතාවය මේ වන විට දැඩි අර්බුදකාරී මුහුණුවරක් ගෙන ඇති අතර නළුවෙකු මෙන්ම දේශපාලනඥයෙකු වන විජේගේ තමිලග වෙට්ට්රි කසාගම් (TVK) පක්ෂය බලය ලබාගැනීම සඳහා දැඩි උත්සාහයක නිරත වෙයි. මෑතකදී නිමාවට පත් වූ මැතිවරණයෙන් ආසන 108ක් දිනා ගනිමින් විශාලතම තනි පක්ෂය බවට පත්ව සිටින විජේගේ පක්ෂයට කොන්ග්රසය සහ වාමාංශික පක්ෂවල සහයෝගය ලැබෙන බවට මුලින් ඉඟි පළ වුවද, මුස්ලිම් ලීගය (IUML) දිගින් දිගටම DMK සන්ධානයට පක්ෂපාතීත්වය දැක්වීම සහ VCK පක්ෂය සිය ස්ථාවරය ප්රකාශ කිරීම ප්රමාද කිරීම හේතුවෙන් රජයක් පිහිටුවීමට අවශ්ය බහුතරය සපුරා ගැනීම අභියෝගයක් වී තිබේ.
කැබිනට් මණ්ඩලයේ නියෝජනය සහ තෝල් තිරුමාවලවන් මහතාට නියෝජ්ය මහ ඇමති ධුරය ලබාදීම සම්බන්ධයෙන් TVK සහ VCK පක්ෂ අතර පවතින රහසිගත සාකච්ඡා තවමත් එකඟතාවයකින් තොරව පවතින බව වාර්තා වේ.මේ අතර අම්මා මක්කල් මුන්නේත්ර කසාගම් (AMMK) පක්ෂයේ නායක ටී.ටී.වී. දිනකරන් විසින් විජේගේ පක්ෂයට එරෙහිව පොලිසියට සහ ආණ්ඩුකාරවරයාට පැමිණිලි ඉදිරිපත් කර ඇත්තේ තම පක්ෂයේ සිටින එකම මන්ත්රීවරයා වන කාමරාජ්ගේ අත්සන සහිත ව්යාජ ලිපියක් මගින් සහයෝගය පළ කර ඇති බව පවසමිනි. මෙම චෝදනාව ප්රතික්ෂේප කරමින් විජේගේ පක්ෂය විසින් අදාළ මන්ත්රීවරයා සහයෝගය දක්වන බවට පෙනී යන වීඩියෝ දර්ශනයක් ප්රසිද්ධ කර ඇති අතර, දිනකරන් පවසන්නේ අදාළ වීඩියෝව සහ ලිපිය වංචනික ලෙස සකස් කරන ලද්දක් බවයි. ආණ්ඩුකාර රාජේන්ද්ර විශ්වනාත් අර්ලේකාර් හමුවූ දිනකරන් මහතා අවධාරණය කළේ තම පක්ෂය AIADMK පක්ෂය ප්රමුඛ සන්ධානයට සහය දක්වන බවත්, විජේගේ පක්ෂය ඉදිරිපත් කර ඇත්තේ සාවද්ය ලේඛන බවත්ය.
තමිල්නාඩු දේශපාලන කරළිය උණුසුම් කරමින් AIADMK පක්ෂයේ මන්ත්රීවරුන් 25කට අධික පිරිසක් පුදුචේරි හි සුඛෝපභෝගී නිකේතනයක රැඳී සිට නැවත චෙන්නායි බලා පැමිණෙමින් සිටින බව වාර්තා වන අතර මන්ත්රීවරුන් වෙනත් පාර්ශවයන්ට නම්මා ගැනීමේ (Poaching) බිය හේතුවෙන් කොන්ග්රස් මන්ත්රීවරුන් පස්දෙනා බැංගලෝරය වෙත යොමු කර තිබේ. මැතිවරණ ප්රතිඵලවලට අනුව DMK පක්ෂය ආසන 59ක් ද, AIADMK පක්ෂය ආසන 47ක් ද ලබාගෙන ඇති පසුබිමක, ආසන 108ක් ලබා සිටින විජේට රජයක් පිහිටුවීමට අවශ්ය ආසන 118ක බහුතරය පෙන්වීමට තවත් මන්ත්රීවරුන් කිහිප දෙනෙකුගේ සහය අත්යවශ්ය වී තිබේ. දැනට විජේගේ පාර්ශවය විසින් මන්ත්රීවරුන් 116කගේ අත්සන් සහිත ලේඛන ඉදිරිපත් කර ඇතත් VCK පක්ෂයේ මන්ත්රීවරුන් දෙදෙනාගේ සහයෝගය නිල වශයෙන් ලැබෙන තෙක් ආණ්ඩුකාරවරයා දිවුරුම් දීමේ උත්සවය සඳහා ආරාධනා කිරීම ප්රමාද කරමින් සිටී.
මෙම අර්බුදකාරී තත්ත්වය හමුවේ එසීලරසී නම් TVK පාක්ෂිකාවක විසින් ශ්රේෂ්ඨාධිකරණය හමුවේ පෙත්සමක් ගොනු කරමින් ඉල්ලා ඇත්තේ වැඩිම ආසන සංඛ්යාවක් ලබා ඇති පක්ෂයේ නායක විජේට රජයක් පිහිටුවීමට වහාම ආරාධනා කරන ලෙස ආණ්ඩුකාරවරයාට නියෝගයක් නිකුත් කරන ලෙසයි. මීට සමගාමීව දකුණු ඉන්දීය නිළි ජෙනීලියා ද්සූසා ඇතුළු කලාකරුවන් රැසක් විජේගේ දේශපාලන ජයග්රහණය අගය කරමින් සුබ පැතුම් එක් කර ඇති අතර මෙය තමිල්නාඩු දේශපාලනයේ පැරණි සම්ප්රදායන් බිඳ දමමින් නව පරිච්ඡේදයක් ආරම්භ වීමක් ලෙස විචාරකයෝ හඳුන්වති. අද පෙරවරු 11ට ටී.ටී.වී. දිනකරන් විසින් විශේෂ මාධ්ය සාකච්ඡාවක් කැඳවා ඇති අතර එහිදී වත්මන් දේශපාලන අර්බුදය සහ ඉදිරි පියවර සම්බන්ධයෙන් තීරණාත්මක අනාවරණයන් සිදු කරනු ඇතැයි අපේක්ෂා කෙරේ.