මෙම වසරේ දෙවන සහ තෙවන කාර්තු ඉලක්ක කරගනිමින් විදුලි ඒකක 180 ඉක්මවා පරිභෝජනය කරන කාණ්ඩ සඳහා සියයට 18ක විදුලි ගාස්තු ඉහළ දැමීමකට ශ්රී ලංකා මහජන උපයෝගිතා කොමිෂන් සභාවේ අනුමැතිය හිමිව තිබේ.
කෙසේ වෙතත්, මෙම ගාස්තු සංශෝධනය හේතුවෙන් ජනතාවට සිදුවන පීඩාව අවම කිරීමේ අරමුණින් රුපියල් බිලියන 15ක විශේෂ සහනාධාරයක් ලබා දීමට රජය විසින් කොමිසම වෙත ලිඛිත එකඟතාවය පළ කර ඇත. රජයේ මෙම මැදිහත්වීම හේතුවෙන් මෙරට සමස්ත විදුලි පාරිභෝගිකයින්ගෙන් සියයට 95කට ආසන්න බහුතරයකට මෙම නව ගාස්තු වැඩිවීම කිසිදු ආකාරයකින් බලපාන්නේ නැත.
නව ගාස්තු ක්රමවේදයට අනුව, ගෘහස්ථ විදුලි පරිභෝජන කාණ්ඩය යටතේ ඒකක 0 සිට 180 දක්වා විදුලිය භාවිතා කරන පාරිභෝගිකයින්ගේ බිල්පත් සඳහා කිසිදු මුදලක් වැඩිවීමක් සිදු නොවේ. එහෙත් මාසිකව ඒකක 181 සීමාව ඉක්මවා විදුලිය පරිභෝජනය කරන පිරිස් සඳහා මෙම නව ගාස්තු ඉහළ යාම සෘජුවම අදාළ වනු ඇත.
මෙම සංශෝධනයත් සමඟ මාසිකව ඒකක 210ක් භාවිතා කරන පාරිභෝගිකයෙකු මෙතෙක් ගෙවූ රුපියල් 9,570ක බිල්පත රුපියල් 1,760කින් ඉහළ යන අතර ඔවුන්ගේ නව බිල්පත රුපියල් 11,330ක් ලෙස ගණනය කෙරේ. මීට අමතරව ඒකක 240ක් වැය කරන පුද්ගලයෙකුගේ රුපියල් 12,120ක්ව පැවති විදුලි බිල රුපියල් 2,210කින් ඉහළ ගොස් රුපියල් 14,330ක් දක්වා වෙනස් වී තිබේ. එලෙසම, ඒකක 270ක් සහ ඒකක 300ක් භාවිතා කරන ගෘහස්ථ පාරිභෝගිකයින්ගේ මාසික විදුලි බිල පිළිවෙළින් රුපියල් 2,660කින් සහ රුපියල් 3,110කින් ඉහළ යනු ඇති බවද වැඩිදුරටත් තහවුරු කර ඇත.
