පැලවත්තේ පිහිටි ජනතා විමුක්ති පෙරමුණේ ප්රධාන කාර්යාලයේදී එහි ප්රධාන ලේකම් ටිල්වින් සිල්වා මහතාට පහරදීමක් සිදුව ඇති බවටත්, ඉන් තුවාල ලැබූ ඒ මහතා රෝහල්ගත කර ඇති බවටත් සමාජ මාධ්ය ඔස්සේ පැතිර ගිය වාර්තා සම්පූර්ණයෙන්ම අසත්ය බව ඔහු විසින්ම දැඩිව ප්රකාශ කර තිබේ. මෙම අසත්ය තොරතුර මත පදනම්ව ශ්රී ලංකා පොදුජන පෙරමුණේ ක්රියාකාරිකයෙකු වන මිලින්ද රාජපක්ෂ මහතා විසින් ප්රවෘත්ති සාකච්ඡාවක්ද පවත්වමින් ටිල්වින් සිල්වා මහතා රෝහල්ගත වීම සම්බන්ධයෙන් සිය අනුකම්පාව පළ කිරීමටද කටයුතු කර තිබුණි.
මෙම ආන්දෝලනාත්මක පුවත නිර්මාණය වීමට මූලික වී තිබුණේ ජ්යෙෂ්ඨ මාධ්යවේදී උවිඳු කුරුකුලසූරිය මහතා විසින් සමාජ මාධ්යයේ තබන ලද සටහනකි. කෙසේ වෙතත්, පසුව ඒ සම්බන්ධයෙන් යළිත් පැහැදිලි කිරීමක් සිදුකළ කුරුකුලසූරිය මහතා සඳහන් කර සිටියේ සිය මූලික සටහනින් අදහස් කළේ ටිල්වින් සිල්වා මහතා ගැන නොව තම වෙනත් මිතුරෙකු සම්බන්ධයෙන් බවයි. ජනතා විමුක්ති පෙරමුණ යනු මතවාදී ගැටුම් පැවතියද ඒවා නිරාකරණය කර ගැනීම සඳහා පහරදීම් වැනි ගෝත්රික ක්රමවේද භාවිතා නොකරන, අතිශය විනයගරුක දේශපාලන පක්ෂයක් බවත්, ඔවුන් ඕනෑම අර්බුදයක් දීර්ඝ වශයෙන් සාකච්ඡා කර හෝ පක්ෂ ව්යවස්ථාවට අනුව විනය ක්රියාමාර්ග හරහා විසඳා ගන්නා බවත් මේ හරහා යළිත් වරක් තහවුරු වී ඇත.
තමන්ට එරෙහිව මෙවැනි අසත්ය ප්රචාරයන් දියත් කිරීම සම්බන්ධයෙන් අදහස් දක්වන ටිල්වින් සිල්වා මහතා පෙන්වා දෙන්නේ, ජාතික ජන බලවේගය විසින් දිස්ත්රික්ක විසි එකක් පුරා පවත්වන ලද දැවැන්ත මැයි දින රැලියේ සාර්ථකත්වය හමුවේ දේශපාලනිකව බංකොලොත් වූ කණ්ඩායම් විසින් මෙවැනි පහත් ක්රියාවන් සිදුකරන බවයි. මෙය හුදෙක්ම දේශපාලන බංකොලොත්භාවය මෙන්ම මන්දබුද්ධිකත්වය ප්රදර්ශනය කිරීමක් බව පවසන ඔහු, මෙම අසත්ය පුවත් නිර්මාණය කරන්නන් තමන් රාත්රියට දකින සිහින උදෑසන සමාජ මාධ්ය සටහන් ලෙස පළකරන බවටද උපහාසයෙන් යුතුව ප්රකාශ කර තිබේ.
තමා මේ වන විට ඉතාමත් යහපත් සෞඛ්ය තත්ත්වයෙන් පසුවන බව තහවුරු කරන ජවිපෙ ප්රධාන ලේකම්වරයා, මෙවැනි පුවත් වාර්තා කිරීමට පෙර තමන්ට එක් දුරකථන ඇමතුමක් හෝ ලබාදී සත්ය අසත්යතාව තහවුරු කරගැනීමට තරම් සමාජ මාධ්ය ක්රියාකරුවන් සහ මාධ්යවේදීන් වගකීම් සහගත විය යුතු බව අවධාරණය කළේය. කිසිදු විචාර බුද්ධියකින් තොරව මෙවැනි මඩ ප්රචාරයන් සමාජගත කරන දේශපාලන කණ්ඩායම් ජනතාව විසින් අනිවාර්යයෙන්ම ප්රතික්ෂේප කරනු ඇති බවත්, මෙවැනි හාස්යජනක ක්රියා මගින් සිය දේශපාලන ව්යාපාරය සතු ජනවරම කිසිසේත්ම පරාජය කළ නොහැකි බවත් ඔහු වැඩිදුරටත් සඳහන් කර සිටී.
