ගර්භණී සමයේදී මව කුස තුළ සිටින දරුවාගේ තත්ත්වය අඛණ්ඩව නිරීක්ෂණය කිරීම සඳහා පැළඳිය හැකි අතිධ්වනිත (ultrasound) පැච් එකක් නිපදවීමට විද්යාඥයින් පිරිසක් සමත් වී තිබේ. මෙම නව නිපැයුමේ ප්රධාන අරමුණ වන්නේ ගර්භණී සමයේ ඇතිවිය හැකි සංකූලතා කල්තියා හඳුනා ගැනීමට සහාය වීමයි.
දැනට පවතින සාම්ප්රදායික අතිධ්වනිත ස්කෑන් පරීක්ෂණ මගින් දරුවාගේ හෘද ස්පන්දනය සහ ගර්භාෂ හැකිලීම් නිරීක්ෂණය කළද, ඒවා බොහෝ විට සාවද්ය අනතුරු ඇඟවීම් ලබා දෙන බවත්, ඒ සඳහා විශේෂ පුහුණුවක් ලත් ක්රියාකරුවෙකුගේ සහාය අත්යවශ්ය බවත් පර්යේෂකයෝ පෙන්වා දෙති. ස්ටැන්ෆර්ඩ් විශ්වවිද්යාලයේ මහාචාර්ය ෂෙන්ග් ෂු (Sheng Xu) සඳහන් කරන පරිදි, පවතින උපකරණ මගින් ලබා දෙන්නේ දරුවාගේ තත්ත්වය පිළිබඳව එක් නිශ්චිත මොහොතක රූප සටහනක් පමණක් වන බැවින් රෝහල් චාරිකා අතරතුර වැදගත් තොරතුරු රැසක් මග හැරී යා හැකිය.මෙම ගැටලුවට සාර්ථක විසඳුමක් ලෙස, අඛණ්ඩව දත්ත ලබා ගත හැකි මෙම පැළඳිය හැකි නව උපකරණය ක්රියාත්මක වේ. ඒ හරහා ඕනෑම ස්ථානයකදී මවගේ සහ දරුවාගේ තත්ත්වය නිරීක්ෂණය කළ හැකි අතර, රෝගියාගේ මූලික සංඥා හඳුනාගනිමින් ඒවායේ සිදුවන වෙනස්කම් විශ්ලේෂණය කිරීමට ද වෛද්යවරුන්ට අවස්ථාව සැලසේ. මෙමගින් නිවැරදි රෝග විනිශ්චයන් වෙත එළඹීමට හැකි වේ. මෙම උපකරණය හරහා කුස තුළ සිටින කලලයේ රූප මෙන්ම නහවැල වැනි චලනය වන ව්යුහයන්හි රුධිර ගමනාගමනය පවා තථ්ය කාලීනව (real-time) පැය ගණනාවක් පුරා අඛණ්ඩව නිරීක්ෂණය කළ හැක. මේ වන විට මෙම උපකරණය බාහිර ඉලෙක්ට්රොනික උපාංගවලට රැහැන් මගින් සම්බන්ධ කර ඇති මූලික සංකල්ප ආකෘතියක් (proof-of-concept) ලෙස පවතින අතර, එය පළඳවන පළමු අවස්ථාවේදී නිවැරදි ස්ථානය හඳුනාගැනීමට සාම්ප්රදායික ස්කෑන් යන්ත්රයක සහාය ලබාගත යුතුය. කෙසේ වෙතත්, "UPatch" ලෙස නම් කර ඇති මෙම තාක්ෂණය මෙවැනි ආකාරයේ ප්රථම නිර්මාණය ලෙස සැලකේ.
'Nature Biotechnology' සඟරාවේ පළ කර ඇති මෙම පර්යේෂණ වාර්තාවට අනුව, දරුවා කුස තුළ චලනය වීමේදී සංඥා ගිලිහී යාම සහ රුධිර නාලවල පිහිටීමේ ගැඹුර නිසා ඇතිවන දුර්වල සංඥා ලබාගැනීම වැනි අභියෝග ජයගැනීම සඳහා විවිධ ඉලෙක්ට්රොනික උපාංග සහ ඇල්ගොරිතම එහි භාවිත කර ඇත. මෙම පර්යේෂණය සඳහා ඇමරිකා එක්සත් ජනපදයේ සහ එක්සත් රාජධානියේ සායනික අත්හදා බැලීම් සිදු කර තිබේ. ගර්භණී කාන්තාවන් 62 දෙනෙකු යොදාගනිමින් සිදු කළ එක් පරීක්ෂණයකදී, මෙම නව පැළඳිය හැකි UPatch උපකරණයෙන් සහ සාම්ප්රදායික අත් ගෙන යා හැකි ස්කෑන් යන්ත්රවලින් ලබාගත් රුධිර ප්රවාහ දත්ත එකිනෙකට ඉතා සමීපව ගැළපෙන බව කැලිෆෝනියා විශ්වවිද්යාලයේ (UC San Diego) ඉංජිනේරු පීඨයේ ආචාර්ය උපාධි අපේක්ෂක සහ පර්යේෂණයේ ප්රධාන කර්තෘ ටොම් පාර්ක් (Tom Park) ප්රකාශ කළේය.
මෙම උපකරණය යොදාගනිමින් ගර්භණී කාන්තාවන් 52 දෙනෙකුගේ දරුවන්ගේ හෘද ස්පන්දනය සහ රුධිර ප්රවාහය අඛණ්ඩව නිරීක්ෂණය කළ අතර, එක් අවස්ථාවකදී ගර්භාෂය තුළ වර්ධනය හීන වීමේ බරපතල තත්ත්වයක් කල්තියා හඳුනාගැනීමට පර්යේෂකයන්ට හැකි විය. ඒ හරහා සිදුවිය හැකිව තිබූ මළදරු උපතක් වළක්වා ගනිමින් සිසේරියන් සැත්කමක් මගින් දරුවා සුරක්ෂිතව පිටතට ගැනීමට වෛද්යවරු සමත් වූහ. කලලයේ රුධිර ප්රවාහය කාලයත් සමඟ ගතිකව වෙනස් විය හැකි බැවින්, කෙටි කාලීන ස්කෑන් පරීක්ෂණ මත පමණක් යැපීමේ ඇති අවදානම මෙයින් මනාව පැහැදිලි වන බව පාර්ක් අවධාරණය කරයි. මේ වන විට පර්යේෂණ කණ්ඩායම එදිනෙදා ජීවිතයේදී සහ නිවසේදී සාමාන්ය ක්රියාකාරකම්වල නිරත වන අතරතුර භාවිත කළ හැකි මෙම තාක්ෂණයේ රැහැන් රහිත (wireless) සංස්කරණයක් සංවර්ධනය කරමින් සිටී.
ඔක්ස්ෆර්ඩ් විශ්වවිද්යාලයේ ජ්යෙෂ්ඨ කර්තෘ ආචාර්ය ඇන්ටෝනියා ජෝර්ජිවා (Antoniya Georgieva) පවසන පරිදි, මෙම තාක්ෂණය ප්රායෝගිකව යොදාගත හැකි ආකාරය පෙන්වා දෙන ඉතා වැදගත් සන්ධිස්ථානයකි. අඩු සහ මධ්යම ආදායම්ලාභී රටවල් වැනි සීමිත සම්පත් ඇති ප්රදේශ සඳහා මෙවැනි පැළඳිය හැකි උපකරණ වඩාත් යෝග්ය වන බව මහාචාර්ය ෂු පෙන්වා දෙයි. මළදරු උපත් සෘජුවම වළක්වා ගැනීමේ විශාල හැකියාවක් මෙම තාක්ෂණය සතුව පවතින අතර, කුස තුළ සිටින සමහර දරුවන් නිරුපද්රිතව ජීවත් වන්නේත් තවත් දරුවන් අහිමි වන්නේත් ඇයිද යන්න පිළිබඳව තීරණාත්මක විද්යාත්මක අවබෝධයක් ලබා ගැනීමට ද මෙම අඛණ්ඩ දත්ත මගින් අනාගතයේදී දොරටු විවර කරනු ඇත.
